«Sovietskaja Biełoruśsija»: ES prapanuje źmiakčeńnie vizavaha režymu, kab vierbavać u Biełarusi novych ahientaŭ upłyvu
Pra heta piša Usievaład Šymaŭ, syn byłoha ministra ekanomiki i ciapierašniaha rektara Ekanamičnaha ŭniviersiteta.
«Nie paśpieŭ Jeŭrasajuz prałanhavać svaje śmiešnyja i jaŭna niezakonnyja «sankcyi» ŭ dačynieńni da biełaruskich hramadzianaŭ i pradpryjemstvaŭ, jak z Zachadu ŭ dačynieńni da našaj krainy nadyšli novyja sihnały, pryčym zusim inšaha kštałtu», — piša Šymaŭ.
Jon maje na ŭvazie prapanovu pasła Polščy ŭ Biełarusi pra ŭzajemnuju admienu vizaŭ i słovy Hunara Vihanda, dyrektara departamienta pa pytańniach krain Uschodniaj Jeŭropy, Paŭdniovaha Kaŭkaza i Centralnaj Azii hienieralnaha dyrektarata ES pa zamiežnych adnosinach. «Ale što za fasadam hetaj rytoryki?» — pytajecca Šymaŭ.
«Tut pracuje ŭsio toj ža mietad procistaŭleńnia hramadzianskaj supolnaści i dziaržavy, — piša jon. — Adnak partnioraŭ u biełaruskaj hramadzianskaj supolnaści Jeŭropa padbirała sabie vyklučna sabie da hustu».
Šymaŭ miarkuje, što «technałohii raboty z hramadzianskaj supolnaściu ŭ Jeŭropie pastaŭlenyja vielmi niakiepska. Niamožna zabyvać, što «kalarovyja revalucyi», što ŭzrušyli šmat jakija postsavieckija dziaržavy ŭ 2000-ja, byli vynikam u tym liku ŭdarnaj pracy ES i ZŠA z hramadzianskimi supolnaściami hetych krain».
Hazieta zaścierahaje suprać źmiakčeńnia vizavaha režymu, što dało b hramadzianam Biełarusi lahčej vyjazdžać u Jeŭropu, a jeŭrapiejskim turystam — praściej traplać u našu krainu. «Mierkavanyja vizavyja «pasłableńni» z boku ES skiravany na pašyreńnie sacyjalnaj bazy jeŭrapiejskaj prysutnaści ŭ Biełarusi, — papiaredžvaje «Sovietskaja Biełoruśsija». — Bo asłableńnie vizavaha režymu, biezumoŭna, padvysić rejtynh ES u vačach šmat kaho ź biełaruskich hramadzianaŭ, a taksama intensifikuje biełaruska-jeŭrapiejskija kantakty na ŭsich kirunkach, što budzie nadta ž jomka dla viarboŭki novych ahientaŭ upłyvu ŭ Biełarusi».
«Sovietskaja Biełoruśsija» — heta hazieta Administracyi Alaksandra Łukašenki.
«Nadzieja Ściapanaŭna». Mikita Najdzionaŭ apublikavaŭ paemu, jakaja naradziłasia ŭ Žodzinskaj turmie. Takoha paetyčnaha epasu ŭ biełaruskaj paezii XXI stahodździa jašče nie było66
Kamientary