Sud pryznaŭ knihu Bialackaha zabaronienaj i pastanaviŭ vyvieźci nakład za miažu

11 lutaha ŭ sudzie Ašmianskaha rajona sudździa Taćciana Jemieljanovič ahučyła rašeńnie pa vynikach hramadzianskaj spravie pravaabaroncy Taćciany Raviaki suprać Ašmianskaj mytni.

Nahadajem, što mytniki zabaranili ŭvozić u Biełaruś knihu litaraturaznaŭčych artykułaŭ i ese «Aśviečanyja Biełaruščynaj» Alesia Bialackaha. U zborniku znajšli škodu dziaržaŭnym intaresam Biełarusi — takuju vysnovu zrabili ekśpierty mytni, jaki vyvučali knihu.

Pry hetym abiedźvie ekśpiertyzy pryznanyja nieprymalnymi. Sud znajšoŭ u ich farmalnyja parušeńni pracedury.

Sudździa pastanaviła, što kniha padlahaje zabaronie i vyvazu z terytoryi Respubliki Biełaruś, paviedamlaje sajt pravaabaroncaŭ-viasnoŭcaŭ Spring96.org.

Pakul što niekalki dziasiatkaŭ knih zastajucca na Ašmianskaj mytni. Taćciana Raviaka źbirajecca padavać kasacyjnuju skarhu ŭ Hrodzienski abłasny sud.

Tym nie mienš, rašeńniem Ašmianskaha suda jana častkova zadavolenaja. Pravaabaronca spadziajecca, što ciapier Ašmianskaja mytnia spynić niezakonnyja ekśpiertyzy, jakija pryznačalisia na vydańnie «Biełaruś Pres Fota» i knihu Valeryja Karbaleviča «Alaksandr Łukašenka. Palityčny partret».

Kniha «Aśviečanyja Biełaruščynaj» składajecca z artykułaŭ i ese Bialackaha pra tvory biełaruskaj kultury i tvorcaŭ, jakija publikavalisia ŭ apošnija 20 hadoŭ u roznych hazietach i časopisach. Tvory napisanyja ź niezaležnickich pazicyj. U knizie niama ničoha vostrapalityčnaha. Zabarona hruntujecca, vidać, prosta na imieni aŭtara, jaki znachodzicca ŭ čornych śpisach śpiecsłužbaŭ.

Aleś Bialacki — palitviazień, jaki byŭ kiraŭnikom pravaabarončaha centra «Viasna».

«Ekśpiertyza praviedziena ekśpiertnaj kamisijaj u składzie supracoŭnikaŭ Hrodzienskaha ŭniviersitieta — Jahoryčava Uładzimira i Chiluty Vadzima. Chacieła b zadać pytańnie pradstaŭnikam Ašmianskaj mytni: «Chto hetyja ludzi ŭ dadzienaj spravie? Jakim čynam jany tut źjavilisia? Chto im daručaŭ praviadzieńnie mytnaj ekśpiertyzy, kali takim pravam nadzieleny tolki mytnyja orhany? Chto ich papiaredžvaŭ i ci papiaredžvaŭ uvohule pra adkaznaść za daču iłžyvaha zaklučeńnia?» — pytałasia Taćciana Raviaka ŭ sudzie. — Adkazu na hetyja pytańni ja nie atrymała da hetaha času. Na jakoj padstavie vynosicca Ašmianskaj mytniaj rašeńnie ab uniasieńni knihi «Aśviečanyja Biełaruščynaj» u pieralik tavaraŭ, da jakich užyvajecca zabarona ci abmiežavańnie na ŭvoz? Da jakoj katehoryi ź pieraličanych u dadzienym pieraliku (parnahrafičnych, ekstremisckich, terarystyčnych, nacysckich ci niejkich inšych) adnosicca infarmacyja, jakaja ŭtrymlivajecca ŭ vydańni? Ja z usioj adkaznaściu mahu zajavić, što da nivodnaj ź pieraličanych katehoryj kniha Alesia Bialackaha nie adnosicca», — skazała Raviaka.

• 0
• 0
• 0
• 0
• 0
• 0
• 0
• 0