Tysiačy čałaviek pryjšli raźvitacca z Ryhoram Baradulinym

U Minsku, u Čyrvonym kaściole, pačałosia raźvitańnie z narodnym paetam Biełarusi Ryhoram Baradulinym, jaki pamior viečaram 2 sakavika.

Kala 9:40 — trunu ź niabožčykam zanieśli ŭ chram. Ihraje arhan, ludzi iduć da truny pa centralnym prachodzie, niekalki žančyn siadziać i molacca. U kaściole znachodzicca niekalki sotniaŭ čałaviek, ludzi pavoli padychodziać da truny.

Ź niabožčykam raźvitaŭsia jaho siabra, piśmieńnik Uładzimir Niaklajeŭ. Ad pačatku ŭ kaściole znachodziacca piśmieńniki Uładzimir Arłoŭ, Barys Piatrovič i Aleś Paškievič.

A 10-j ksiondz pačaŭ čytać malitvu. Pakrysie ludziej usio boleje. Tamu ksiondz prapanavaŭ, kab ludzi padychodzili da truny z dvuch bakoŭ.

Tym časam z Baradulinym raźvitalisia staršynia Biełaruskaha PEN-centra Andrej Chadanovič, hałoŭny redaktar vydaviectva «Mastackaja litaratura» Viktar Šnip, były ministr kultury Anatol Butevič.

A 10:30 — kaścioł poŭny ludziej, ludzi šukajuć miesca, dzie sieści. Čytajuć psałmy.

Z Baradulinym raźvitalisia pieršy kiraŭnik niezaležnaj Biełarusi Stanisłaŭ Šuškievič (mienavita pry im Ryhor Ivanavič atrymaŭ zvańnie narodnaha paeta Biełarusi), piśmieńnik Viktar Karamazaŭ, paet i pierakładčyk Siarhiej Paniźnik, staršynia Partyi BNF Alaksiej Janukievič.

10:54 – Ludziej prykmietna paboleła, čarha ad uvachodu, usia truna patanaje ŭ kvietkach.

Pryjšło kiraŭnictva praŭładnaha sajuza piśmieńnikaŭ — paet Hienadź Paškoŭ, pieršy namieśnik Čarhinca, i niekalki jaho kaleh. Z Baradulinym raźvitałasia dyrektar Biełaruskaha archiva-muzieja biełaruskaj litaratury Hanna Zapartyka.

11:15 Pryjšła taksama hrupa mastakoŭ na čale z kiraŭnikom Sajuza mastakoŭ Ryhoram Sitnicam. Da chrama praciahvajuć padychodzić ludzi z kvietkami.

Pačynajecca imša. Śpiarša projdzie raźvitalnaja panichida pavodle hreka-katalickaha abradu, bo Baradulin byŭ unijatam.

A 12.00 pačałasia imša pavodle ryma-katalickaha abradu. Uvieś chram byŭ zapoŭnieny viernikami.

A 13:00. Imša skončyłasia. Z kaścioła vychodziać mastak Mikoła Kupava, piśmieńnik Kastuś Ćvirka, litaraturaznaŭca Cichan Čarniakievič. Tym časam na płoščy źbirajucca sotni ludziej. Jany žadajuć raźvitacca z Ryhoram Ivanavičam, kali vyniasuć jaho hrob. U natoŭpie zaŭvažany palityki Vincuk Viačorka, Siarhiej Kalakin, Valeryj Ščukin, Piatro Kraŭčanka, kulturołah Maksim Žbankoŭ.

13:25. Z chrama pačynajuć vynosić kvietki i vianki. Žurnalist Hleb Łabadzienka niasie kryž, Uładzimir Niaklajeŭ – partret Baradulina. Vynosiać trunu. Słova biare Niaklajeŭ, jaki ŭ ścisłaj pramovie paraŭnoŭvaje Ryhora Ivanaviča z Kołasam, Kupałam i Bahdanovičam.

Barys Piatrovič kaža, što pachavalnuju pracesiju čakaje doŭhaja daroha (Baradulin znojdzie viečny spačyn na Ušackaj ziamli, pobač z maci), tamu inšych pramoŭ nie budzie. Ludziam, jakija žadajuć jechać va Ušacki rajon, prapanujuć sadzicca ŭ śpiecyjalny aŭtobus.

Čałaviek u natoŭpie padymaje bieł-čyrvona-bieły ściah. Chtości niaśmieła vyhukaje «Žyvie Biełaruś!». Ludzi, jakija stajać vakoł, jaho padtrymlivajuć.

Naprykancy ledź nie adbyvajecca pravakacyja. Niejkaja žančyna raptoŭna pačynaje kryčać pa-rusku: «Da zdravstvujet Biełaja Ruś! Da zdravstvujet vielikaja Rośsija!». Ale jaje chutka vyšturchoŭvajuć z natoŭpu.

Raźvitacca z Ryhoram Baradulinym prajšło niekalki tysiač biełarusaŭ.

• 0
• 0
• 0
• 0
• 0
• 0
• 0
• 0