Samaje pryhožaje słova ŭ śviecie — z Novaj Ziełandyi. Što jano aznačaje?
Jaho ciažka vymavić, jašče radziej možna pačuć.
I ŭsio ž śpiecyjalnaje mižnarodnaje žury pryznała samym pryhožym słovam u śviecie «kajcijakitanha» (kaitiakitanga). Za hetym słovam chavajecca paniaćcie, dla jakoha ŭ słavianskich movach niama dakładnaha adpaviednika, piša Bild.
Hetaje słova pachodzić z movy maary — karennaha naroda Novaj Ziełandyi. Jano aznačaje adkaznaść čałavieka pierad pryrodaj, jaho pryzvańnie abaraniać i zachoŭvać jaje dla budučych pakaleńniaŭ.
Pry hetym majecca na ŭvazie značna bolš, čym prosta achova navakolnaha asiarodździa: pavodle śvietapohladu maary, čałaviek — nie ŭładalnik pryrody, a jaje častka i jaje zachavalnik.
Zvańnie samaha pryhožaha słova ŭ śviecie prysudzili ŭpieršyniu.
Heta zrabiła płatforma dla vyvučeńnia moŭ Babbel. Kab vybrać pieramožcu, jaje kamanda praanalizavała dyskusii ŭ sacyjalnych sietkach i na moŭnych forumach. Mižnarodnaje žury ź linhvistaŭ i ekśpiertaŭ u halinie kultury vyznačyła pieramožcu.
Za hetaje zvańnie spaborničali 223 słovy z bolš jak 75 moŭ. Aceńvalisia nie tolki hučańnie i vymaŭleńnie, ale i značeńnie paniaćcia, jaho kulturnaja ŭnikalnaść i aktualnaść dla ludziej va ŭsim śviecie.
Finalisty — słovy z partuhalskaj, japonskaj i inšych moŭ
Siarod inšych finalistaŭ byli partuhalskaje «Saudade» — hłybokaja tuha (takaja sumnaja pieśnia jość u Sezaryi Evary), japonskaje «Ikigai» — sens žyćcia, valijskaje «Hiraeth» — tuha pa stračanaj radzimie, słova «Ubuntu» z movy zułu, jakoje aznačaje čałaviečnaść i jednaść, a taksama «Luftmensch» ź idyšu. Tak nazyvajuć letuciennaha, idealistyčnaha čałavieka, jakoha mała cikaviać materyjalnyja rečy i jaki žyvie chutčej u śviecie idej.
Ciapier čytajuć
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca7
Kamientary