Cana na naftu, a razam ź joj i zarobki biełarusaŭ upali na ŭzrovień 2009 hoda
Ekśpierty paraŭnoŭvajuć situacyju z 1980-mi hadami. Ceny na naftu padajuć vośmy tydzień zapar. Daŭžejšaje padzieńnie fiksavałasia tolki ŭ 1986 hodzie. Tady ceny na naftu adkacilisia prykładna z 30 dalaraŭ da 10. I trymalisia na adnosna nizkim uzroŭni 4 hady. Vynikam takoha stanu syravinnaha rynku tady stali tektaničnyja hieapalityčnyja pracesy. Saviecki Sajuz, faktyčna, zbankrutavaŭ i razvaliŭsia.
Ciapierašniaje padzieńnie adroźnivajecca da tahačasnaha tym, što ŭzrovień cenaŭ usio ž našmat vyšejšy.
Uranku ŭ piatnicu cana barala nafty Brent apuściłasia da $46,06. Cana amierykanskaha sortu WTI źniziłasia da $40,21, paviedamlajuć suśvietnyja infarmacyjnyja ahienctvy. Heta najnižejšy ad 2009 hoda ŭzrovień. Tady ceny na syravinu ŭpali praz suśvietny finansavy i ekanamičny kryzis, jaki źniziŭ popyt. Ciapier pryčyna inšaja — raźvićcio novych technałohij pavysiła zdabyču vuhlevadarodaŭ, a enierhaaščadžeńnie pryviało da źnižeńnia vytrat.
Saudaŭskaja Aravija mahła b źnizić prapanovu nafty na rynku, ale čamuści nie choča. Astatnija hulcy — Rasija, Vieniesueła, Iran — nie mohuć sabie dazvolić źnižeńnie abjomaŭ zdabyčy, bo abmiežavanyja ŭ srodkach. Nie źmianšajecca prapanova nafty j hazu i ŭ ZŠA. Kampanii imknucca akupić srodki, inviestavanyja ŭ słancavyja naftu i haz i nie admaŭlajucca ad śvidravin, navat kali prybytak ad ich źniziŭsia.
U vyniku vyjhrajuć krainy, zaležnyja ad impartu nafty i hazu. Ažyvilisia ekanomiki Niamieččyny, Francyi, Ispanii. Kitaj i ZŠA naraścili zapasy nafty da rekordnych.
U toj ža čas rasijskaja ekanomika praciahvaje padzieńnie, a rasijski rubiel padbirajecca da 70 za dalar.
Padaje i biełaruskaja ekanomika, całkam pryviazanaja da rasijskaj i zaležnaja ad pierapracoŭki subsidyjavanych rasijskich nafty i hazu. Učora na tarhach biełaruski rubiel padabraŭsia da 16500 za dalar — absalutny lidar abiasceńvańnia ŭ Jeŭropie jak za pieryjad 2010—2015, tak i za pieryjad 2000—2015. A razam z rublom i zarobki apuścilisia na ŭzrovień 2009 hoda — taho samaha, na ŭzrovień jakoha apuścilisia ceny na naftu.
Kamientary