U Rasii čarhovy «raśpiaty chłopčyk»: «bas-hitarysta «Lube» zabili za razmovy pra Danbas»
Rasijskija ŚMI praciahvajuć množyć fejki, jakija majuć na mecie padtrymańnie varožaści da ŭkraincaŭ, a taksama praciŭnikaŭ Pucina ŭ Rasii.
Čarhovaj nahodaj dla hetaha stała śmierć bas-hitarysta hurtu «Lube», što śpiavaje muzyku błatnoha tołku.
Viersiju zapuściŭ piśmieńnik Zachar Prylepin. Jaje padchapiła aficyjnaja pradstaŭnica MZS Rasii Maryja Zacharava.
Zachar Prylepin napisaŭ u svaim błohu na sajcie RIEN TV: «Paša siadzieŭ u bary, abmiarkoŭvaŭ jakraz tyja samyja temy, što i my ź im abmiarkoŭvali — Danbas. U nas heta baleła ź im — i, niama čaho chavać, havaryli my pra heta časta», — napisaŭ Prylepin.
Pavodle jaho słoŭ, adnamu z prysutnych va ŭstanovie hutarka nie spadabałasia. «Pašu padyšli i ŭdaryli pa hałavie. Zzadu. Tvaram da tvaru ź im zabojca mieŭ kudy mienš šancaŭ. Paša moh za siabie pastajać. Vynik: pierałom asnovy čerapa i ŭnutrymazhavaja hiematoma», — adznačyŭ piśmieńnik.
Choć Prylepin sam nie prysutničaŭ u restaranie, u jakim adbyŭsia kanflikt, i jahonyja słovy — tolki hipoteza, ich prakamientavała aficyjnaja pradstaŭnica MZS Rasii Maryja Zacharava. «Pravy čałavieka im padavaj, kaštoŭnaści jeŭrapiejskija, pavahu. Nie budzie vam ni kaštoŭnaściaŭ, ni pavahi, pakul nie pierastaniecie ludziej stralać na Majdanie, palić u damach prafsajuzaŭ i zabivać u barach pa nacyjanalna-ideałahičnaj prykmiecie. Spačatku intensiŭnaja reabilitacyja ad nacyjanalizmu, potym usio astatniaje. Inakš — kliničnaja śmierć ad atručvańnia samimi saboj», — napisała jana na svajoj staroncy ŭ fejsbuku.
Bas-hitaryst «Lube» Pavieł Usanaŭ byŭ źbity 2 krasavika. 19 krasavika jon pamior u adnoj z maskoŭskich balnic.
3 krasavika ŭ Padmaskoŭi zatrymali padazravanaha ŭ napadzie na Usanava. Heta 39-hadovy žychar Soniečnahorskaha rajona Maskoŭskaj vobłaści. Suprać jaho zaviedzienaja kryminalnaja sprava pa častcy 1 artykuła 111 KK RF ( «Naŭmysnaje pryčynieńnie ciažkaj škody zdaroŭju»).
Usanaŭ u 2014 hodzie vystupaŭ na akupavanych terytoryjach Ukrainy.
Zatrymany za bojku z Usanavym mužčyna śćviardžaje, što bas-hitaryst «Lube» sam na jaho napaŭ, a jon tolki abaraniaŭsia.
U restaran Usanaŭ pryjšoŭ adznačać dzień naradžeńnia syna svajho siabra.
Ciapier čytajuć
«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy136136
Kamientary