Rejtynh pieradrukaŭ u «Sovietskoj Biełoruśsii» 

Ideja hetaha materyjału pryjšła mnie, kali ja pračytaŭ u prezidenckaj haziecie artykuł «Varšava i Kijeŭ abkłali adzin adnaho hienacydami».

Pra rašeńnie polskaha Sojma pryznać hienacydam zabojstvy palakaŭ na Vałyni banderaŭcami hazieta pieradrukavała artykuł z… rasijskaha resursu Utro.ru. Nie ź biełaruskaha, polskaha, nie z ukrainskaha ci niamieckaha — z rasijskaha. Aŭtar artykuła zło radavaŭsia razłomam u adnosinach miž jeŭrapiejskimi krainami. Choć Biełarusi, niesumnienna, niama nijakaj karyści ad takich razłomaŭ.

Inšy cykł mianie taksama ŭraziŭ: karespandentka «Sovietskoj Biełoruśsii» pabyvała ŭ Vienhryi. Jana zrabiła tam vialikija intervju z palitykami. Ź jakich partyj? Z kvazinacysckaha «Jobika» i kampartyi (jakaja ŭ Vienhryi atrymlivaje navat nie doli pracenta hałasoŭ, a jašče mienš). Nie z hałoŭnymi, mejnstrymavymi partyjami — sacyjalistami i libierałami, a ź nieanacystami i nieakamunistami.

Mienavita ultrapravyja i ultralevyja partyi adnačasova prasoŭvaje i finansuje Maskva, spadziejučysia takim čynam destabilizavać ES.

Čamu ŭ toj sama łohicy dziejničaje reśpiektabielnaja žurnalistka «Sovietskoj Biełoruśsii»? Supadzieńnie? Nie dumaju.

Heta vynik usprymańnia śvietu praz rasijskija akulary. I «Jobik», i viernyja lenincy nie majuć nijakich šancaŭ pryjści da ŭłady ci stać upłyvovymi ŭ Vienhryi Orbana. Adnak u «SB — Biełaruś siehodnia» jany — sa svajoj ksienafobskim ci katastrafalnym apisańniem jeŭrapiejskaj realnaści. Takaja infarmacyja pra jeŭrapiejskuju rečaisnaść, dam taki hruby prykład, nie dapamahaje pradavać biełaruskija traktary. Pradukcyju ty možaš pradać tady, kali realistyčna ŭjaŭlaješ svaje rynki zbytu. Tak pra śviet pišuć, kali jaho treba apisać jak svajho patencyjnaha praciŭnika.

Ja vyrašyŭ padličyć, kolki «Sovietskaja Biełoruśsija» zrabiła pieradrukaŭ z rasijskich krynic, a kolki — ź inšych.

Voś źviestki za žnivień.

Z rasijskich krynic — 30

Ź jeŭrapiejskich krynic — 3

Ja tut jašče nie ŭličvaŭ dadatki — takija jak «Sajuz» ci teletydzień. Inakš adnosina byli b jašče bolš vyraznaj.

Pryčym havorka idzie pra pieryjad paciapleńnia ŭ staŭleńni biełaruskich uładaŭ da Jeŭropy.

Što ž za try artykuły z zachodnich ŚMI prabilisia ŭ «SB» za žnivień?

Heta karotki artykuł ab pratahaniście vajny na Danbasie pałkoŭnika Hirkina z Le Monde.

Heta infarmacyja pra vykryćcio rasijskaha raźviedčyka-nielehała ŭ Ispanii z Politico.

I, treci, — materyjał pra daŭhalećcie ź Bi-Bi-Si.

Z rasijskich krynic pieradruki iduć praktyčna štodzionna. Nie tolki naturalna rasijskaje — historyi žyćcia Fainy Ranieŭskaj ci inšych rasijskich akcioraŭ. Ale i takija temy, jak imknieńnie Šatłandyi da niezaležnaści ci «Praha hatovaja sudzicca ź ES».

Tak, lubyja sprečki ci prablemy ŭ ES atrymlivajuć pryjarytetnuju ŭvahu rasijskich ŚMI. Dla Rasii heta stratehija: jana imkniecca lubym sposabam raskałoć i asłabić ES, a ŭ ideale — dabicca jaho raspadu. Dla Biełarusi pośpiech takoj stratehii mieŭ by katastrafičnyja nastupstvy.

Kab dabicca šmatviektarnaści, «palotu na dvuch kryłach», kab vyjści na suśvietnyja rynki, biełarusam pryjdziecca taksama pavialičyć i dolu infarmacyi, jakuju jany atrymlivajuć ź jakasnych jeŭrapiejskich krynic.

• 0
• 0
• 0
• 0
• 0
• 0
• 0
• 0