Na viadučych pazicyjach u Biełaruskaj nacyjanalnaj bijatechnałahičnaj karparacyi (BNBK) pačynajuć źjaŭlacca dobra viadomyja dziaržaŭnyja top-mieniedžary.
Jašče ŭ kancy 2017 hoda na pasadu namieśnika hiendyrektara BNBK pryjšła Nadzieja Katkaviec. 8 vieraśnia jana pakinuła pasadu namieśnika kiraŭnika spravami prezidenta Biełarusi, dzie adpracavała kala 4 hadoŭ. Z 2003 hoda Katkaviec pracavała namieśnikam i pieršym namieśnikam ministra sielskaj haspadarki i charčavańnia Biełarusi, a taksama hod była dyrektaram Departamienta ahrapramysłovaha kompleksu JEEK.
Katkaviec aktyŭna prapahanduje idei BNBK. Tak 12 studzienia jana pračytała lekcyju dla studentaŭ i vykładčykaŭ Paleskaha dziaržaŭnaha univiersiteta i raspaviała pra pierśpiektyvy raźvićcia bijatechnałahičnaj vytvorčaści ŭ Biełarusi, ab prajektavańni i budaŭnictvie kompleksu vysokatechnałahičnych pradpryjemstvaŭ u krainie, havorycca na sajcie VNU.
Źjaŭleńnie daśviedčanaha eks-čynoŭnika varta razhladać u kantekście taho, što niadaŭna kuratarstva prajekta BNBK pierajšło ad Minabłvykankama da Minsielhascharču. Na dniach namieśnik ministra sielskaj haspadarki i charčavańnia Ihar Bryło pryznačany pradstaŭnikom dziaržavy ŭ orhanach kiravańnia ZAT «Biełaruskaja nacyjanalnaja bijatechnałahičnaja karparacyja».
Pa dadzienych na siaredzinu 2017 hoda, staršynioj rady dyrektaraŭ ZAT «BNBK» byŭ hramadzianin Kyrhyzstana Ryfat Uciušaŭ. Jon z 2007 da krasavika 2010 hoda zajmaŭ pasadu finansavaha dyrektara Fondu raźvićcia Kyrhyzstana, jaki byŭ padkantrolny Maksimu Bakijevu.
Pieršapačatkova čutki prypisvali ideju stvareńnia BNBK strukturam, źviazanyja z byłym kiraŭnictvam Kyrhyzstana. Litaralna napiaredadni Novaha hoda hramadskaje abjadnańnie «Ajkoł Ała-Too» zajaviła, što były premjer-ministr Kyrhyzstana Danijar Usienaŭ viadzie biznes u Biełarusi ad imia Daniiła Uryckaha. Hod tamu paviedamlałasia, što čałaviek z takimi imiem i proźviščam kiruje BNBK.
Rašeńnie ab budaŭnictvie ahrapramysłovaha kompleksu pablizu Rudzienska ŭ Puchavickim rajonie było ŭchvalena Alaksandram Łukašenkam ŭ 2016 hodzie. Na płoščy kala 160 ha da 2032 hoda BNBK płanuje pabudavać niekalki zavodaŭ pa vytvorčaści lizinu, treaninu, tryptafanu i kambikarmoŭ. U vyniku budzie stvorana bolš za 1 tys. pracoŭnych miescaŭ. Niadaŭna ŭrad Biełarusi paprasiŭ u kitajskich bankaŭ lhotny kredyt na sumu ŭ 628 młn dołaraŭ dla realizacyi ahraprajekta pad Minskam. BNBK pahadziłasia dać Biełarusi ŭ zakład majomaść, jakoje budzie stvorana pry realizacyi inviestprajekta. Kitajskaja CITIC Construction vystupaje hienieralnym padradčykam prajekta.
Niadaŭna ź inviestprajekta vyklučyli budaŭnictva zavoda pa pierapracoŭcy nasieńnia alejnych kultur, hazaturbinnaj ŭstanoŭki i padprajekt «Ziemlarobstva», havorycca ŭ paviedamleńni pres-słužby prezidenta Biełarusi.
Ciapier čytajuć
Redki vypadak: pamiłavany biełaruski palitviazień pajšoŭ na vajnu suprać Ukrainy17
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary