Abvieščany łonh-list konkursu maładych vykanaŭcaŭ «Zaśpiavaj-5», jaki pravodziać partał TuzinFM razam z fondam «Viartańnie». «My ŭ zachapleńni ad sioletnich kankursantaŭ!», — kanstatuje pradusar konkursu Siarhiej Budkin.
Na pieršym etapie konkursu žury «Zaśpiavaj» pryniali i adsłuchali zajavy ad kankursantaŭ. Sioleta muzykam ad 16 da 30 hadoŭ prapanavałasia pakłaści na muzyku vierš adnaho ź laŭreataŭ litaraturnaj premii «Debiut» imia Maksima Bahdanoviča. U žury ŭvajšli śpiavačka i kampazytarka Natalla Kunickaja (Mustelide), muzyka Aleś-Francišak Myškievič (The Superbullz, Volski), śpiavačka i pedahoh Irena Katvickaja (Akana, Kazalpin, Warsoba), saŭndpradusar Andrej Akataŭ (Belsat Music Live), muzyka i vykładčyk Aleh Chamienka («Pałac»), a taksama arhanizatary konkursu — kiraŭnik partału TuzinFM Siarhiej Budkin i kiraŭnik fondu «Viartańnie» Pavał Bierahovič.
U vyniku z 28 zajavaŭ u łonh-list konkursu «Zaśpiavaj-5» trapili 25 vykanaŭcaŭ. Ciapier ich čakaje žyvoje prasłuchoŭvańnie žury, pa vyniku jakoha buduć adabranyja 3 finalisty, ź jakimi budzie praviedzienaja indyvidualnaja praca. Jany daduć kancerty pry padtrymcy viadomych vykanaŭcaŭ i prezentujuć studyjnyja versii svaich konkursnych piesień. Pa vyniku budzie abrany pieramožca, jaki atrymaje jašče i 1500 BYN na realizacyju svaich tvorčych zadumaŭ. Usie, chto padaŭ zajavy na «Zaśpiavaj-5», atrymajuć mahčymaść paŭdzielničać u trochdzionnaj adukacyjnaj sesii.
U miežach adukacyjnaj sesii ciaham troch dzion u śniežni projduć lekcyi, majstar-klasy i praktyčnyja zaniatki. Irena Katvickaja praviadzie treninhi pa vakalnaj technicy, Andrej Akataŭ raspaviadzie pra tonkaści studyjnaje pracy, dyzajnerka Nasta Šastak pra vizualnuju kancepcyju vykanaŭcy, Alaksandar Čarnucha pra supracu sa ŚMI, Aleh Chamienka — pra markietynhavyja technalohii ŭ muzycy, kiraŭnik łejbłu «Ezhevika» Dźmitry Litvinovič pra toje, jak pradavać svaju muzyku. Taksama projduć admysłova raspracavanyja dla hetaj sesii lekcyi «Sučasnaja biełaruskaja paezija ŭ kantekście suśvietnaj» (čytaje Andrej Chadanovič) i «Sučasnaja biełaruskaja muzyka ŭ kantekście suśvietnaj» (Viktar Siamaška). Lekcyi pryznačajucca tolki dla kankursantaŭ, ale kali imi zacikaviacca inšyja, to možna pakinuć svaju zajaŭku na mejle 12tuzin@gmail.com. U adkazie my napišam, jak možna na jaje trapić.
Takim čynam, łonh-list z 25 kankursantaŭ: Pavał Kozič & Cichan Bukraba, Anastasija Kazakova, «Lichtar», Maximalism, Mikita (Mikita Ihnacienka), Sofja Astapiuk, Roman Voloznev, BarRokka, Ihar Pałynski, Lear (Valeryja Suravickaja), Absolem Cloud, Ihnat Sielun (L-Tanig), «Rajon119», Dymna Lotva, Lesia Stasievič, Ksienija Valšonak, Atesta, Uładzisłaŭ Lepiašynski ft. Lear, Vojstrau, Arciom Pietraševič i Michaś Lipski, Volha Dzieviałtoŭskaja i Aleh Kiecmur, Raman Najdzioncaŭ, Renoir Project, «Chołst Drajziera», iLi Family.
«My dziakujem usim, chto padaŭ zajavy na konkurs. Sapraŭdy, zadańnie było davoli niaprostym, i my radyja, što kankursanty nie zbajalisia, nie palenavalisia i dobra papracavali z sučasnymi paetyčnymi tekstami. Pa vyniku vieršy natchnili muzykaŭ na stvareńnie cikavaj dy aryhinalnaj muzyki i my majem vialikuju kolkaść patencyjnych hitoŭ. Hetyja zajaŭki biezumoŭna natchniajuć i radujuć. My ŭ zachapleńni!», — kaža suzasnavalnik i pradusar konkursu Siarhiej Budkin i raić usim biełaruskim vykanaŭcam u niezaležnaści ad uzrostu źviartacca da sučasnaj biełaruskaj paezii. Staronka sa spasyłkami na tvorčaść laŭreataŭ premii «Debiut» pryznačanaja dla ŭsich vykanaŭcaŭ, jakija šukajuć dobryja teksty.
Za navinami konkursu možna sačyć na aficyjnych staronkach Facebook i UKantakcie.
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1818
Kamientary