Tak receptaŭ biełaruskich straŭ jašče nichto nie zdymaŭ VIDEA
Ahrasiadziba pieratvaryła biełaruskuju viosku ŭ internet-šou i skaryła haradžan.
«Heta samy niebiaśpiečny buterbrod leta», «mietr čystaha zadavalnieńnia», «takoha dranika vy jašče nie bačyli» — prykładna tak vyhladajuć zahałoŭki rolikaŭ prajekta ahrasiadziby «Viasiołaja chata».
U kadry — ahoń, sała, bulba, čyhuny, vyšyvanki i stravy, ad jakich dyjetołahi schapilisia b za serca. Ale mienavita hetyja videa źbirajuć sotni tysiač, a časam i miljony prahladaŭ.
Ahrasiadziba «Viasiołaja chata» znachodzicca ŭ vioscy Kaluha Kapylskaha rajona, prykładna za 75 kiłamietraŭ ad Minska. Siadziba isnuje ŭžo šmat hadoŭ: dva adnoŭlenyja draŭlanyja damy, ułasnaja ekafierma, voziera, łaźni, muziej biełaruskaha pobytu, koni, staradaŭnija abrady i kuchnia pa tradycyjnych receptach. Uładalnik prajekta — Andrej Kruk.
Na terytoryi pravodziać Kupalle, Kalady, Hukańnie viasny, Bahač, arhanizujuć majstar-kłasy, ekskursii i kulinarnyja šou. Haściej sustrakajuć chlebam, sollu i stravami, pryhatavanymi ŭ biełaruskaj piečy z praduktaŭ ułasnaj haspadarki.
U peŭny momant «Viasiołaja chata» pierastała vyhladać jak prosta miesca adpačynku i turystyčny biznes i stała paŭnavartasnym miedyjaprajektam sa svajoj estetykaj i hierojami.
Bolšaść videa «Viasiołaj chaty» pačynajucca z kanfliktu, žarta abo absurdnaj situacyi.
Haspadar ahrasiadziby Andrej i haspadynia, jakaja zaŭsiody źjaŭlajecca ŭ kadry ŭ nacyjanalnym stroi, razyhryvajuć nievialikija scenki, a ŭžo potym pačynajuć hatavać. Jon moža atrymać taz chałodnaj vady prosta ŭ tvar, sprabavać łavić haspadyniu łaso ci haniacca za parasiatkam. Jana — łajać jaho za stałom, ździŭlacca niezvyčajnamu padarunku ŭ vyhladzie račnoj ryby ci rulki abo abiacać nakarmić sapraŭdnaj biełaruskaj stravaj, kab jon nie niervavaŭsia.
Usio heta jany imknucca zrabić maksimalna efiektna. Čaho tolki varty recept zakuski sa śvinych vušej:
Chaładnik, naprykład, jany hatujuć nie ŭ miscy i navat nie ŭ viadry. Dla jaho haspadynia bienzapiłoj vyrazaje čašu ź vielizarnaj hłyby lodu. Unutr adpraŭlajucca buraki, jajki, ahurki i krop, paśla čaho ružovy sup źmiešvajuć vializnaj draŭlanaj łyžkaj. A finalnaja dehustacyja pieratvarajecca ŭ čarhovy žart: Andrej pje chaładnik prosta ź ledzianoj čašy i litaralna «zamiarzaje» na vačach hledačoŭ.
U inšym roliku Andrej łović parasia, kab paśla pryhatavać zakusku sa śvinych nožak. Pakul u kazanie varacca nožki z morkvaj, časnakom i piercam, piać žančyn u nacyjanalnych strojach patrabujuć pačastunku. Kali ž strava narešcie hatovaja i pakryvajecca karamielizavanaj skarynkaj nad vuhlami, hości litaralna nakidvajucca na jaje. A sam Andrej u finale adpraŭlajecca ŭdalečyniu na žanočych plačach jak hieroj narodnaha epasu.
U pačatku rolika pra burakovaje piva (chacia heta chutčej kvas) haspadynia demanstratyŭna źmiataje sa stała mnostva butelek kramnaha piva i abviaščaje, što zaraz budzie sapraŭdny napoj. Dalej usio adbyvajecca ŭžo pavodle tradycyjnaha receptu: buraki, vada, razynki, niekalki dzion čakańnia. Tak chatniaja kuchnia pieramahaje fabryčnuju vytvorčaść. A videa ŭ instahramie nabrała bolš za miljon prahladaŭ.
Ci voźmiem historyju z ruletam z rulki. Usio pačynajecca jak scena z ramantyčnaj kamiedyi: Andrej prychodzić da haspadyni ź vialikim bukietam, pieraviazanym čyrvonym bantam. Praŭda, zamiest kvietak unutry chavajecca śvinaja rulka. Dalej idzie padrabiazny majstar-kłas pa hatavańni miasnoha ruleta.
U rolikach centralnaje miesca zajmajuć kłasičnyja biełaruskija stravy. Tut jość i kiška — bulbianaja kaŭbasa, jakuju haspadynia nabivaje praz samarobnuju varonku z płastykavaj butelki, i zakuska ź sieladca, dzie Andrej efiektna razryvaje rybu na dva idealnyja file, i zelc z vušej i jazykoŭ, jaki presujecca pad ciažaram butelki śpirtnoha.
Zvyčajnyja pradmiety sielskaj pracy niečakana pieratvarajucca ŭ kuchonnyja instrumienty: tut smažać bulbu prosta na łapacie nad vohniščam, a sała — na sadovych viłach zamiest šampuraŭ.
Jašče adna admietnaść — luboŭ da niečakanych pavierchniaŭ dla pryhatavańnia ježy. Kali patelnia, to hihanckaja. Kali jaječnia, to na pałatnie staroj dvuchručnaj piły. Pakul dvoje mužčyn piłujuć bierviano, budučaja «patelnia» nahravajecca nad ahniom. Na mietał kładuć sała, raźbivajuć jajki, a paśla jaječniu padajuć z čornym chlebam, časnakom i chrenam sa burakami.
Biełaruskaść tut pachnie dymam ź piečy, hučyć treskam droŭ, vyhladaje jak rumiany dranik, jaki tolki što dastali z patelni. I ŭsio heta — z humaram i pazityvam.
-
«Šanoŭnyja siabry, dziakuju vam za padtrymku». Rasijski błohier Illa Varłamaŭ u intervju zhadaŭ Biełaruś i biełaruskuju movu
-
Błohierka, što pierajechała ź Piciera pad Minsk, skardzicca, što nivodzin zabudoŭščyk nie źviarnuŭsia da jaje pa rekłamu
-
Staražytnyja suśliki jeli miasa mamantaŭ. Dokaz znajšli ŭ ich kakaškach
Kamientary