«Lepš vykinuć, čym addać?» Fiermier pakazaŭ, jak vykidaje kłubnicy, i vyklikaŭ abureńnie
Fiermier z Bresckaj vobłaści apublikavaŭ u tyktoku videa, na jakim ź mikraaŭtobusa na śmietnik vykidaje niekalki skrynak kłubnic. Rolik chutka nabraŭ prahlady, adnak aŭtar u roliku nie ŭdakładniŭ važnuju detal: havorka išła nie pra śviežy ŭradžaj, a pra reštki niepradadzienych jahad, jakija ŭžo pačali psavacca i stracili tavarny vyhlad, piša vydańnie Pinsk.life.
Tym nie mienš, u kamientarach razharełasia sapraŭdnaja sprečka. Mnohija karystalniki vyrašyli, što fiermiery addajuć pieravahu tamu, kab vykinuć pradukcyju, zamiest taho kab źnizić canu ci biaspłatna razdać tym, chto maje patrebu.
«Sam nie ham i nikomu nie dam. Lepš vykinuć, čym zrabić dobruju źnižku i pradać», — napisała adna z karystalnic.
Inšyja prapanoŭvali pradavać kłubnicy z ucenkaj:
«50% źnižku zrabić — raźbiaruć».
«Pradavali b tańniej, nie pryjšłosia b vykidać».
Niekatoryja kamientatary paličyli, što fiermiery prosta nie chočuć zajmacca dabračynnaściu:
«Našy kamiersanty dabračynnaściu nie zajmajucca, lepš vykinuć».
Hučali i prapanovy biaspłatna pieradavać jahady ludziam abo sacyjalnym ustanovam.
«Pra dziciačyja damy nie čuŭ?»
Adnak častka karystalnikaŭ stała na bok fiermiera. Jany nahadali, što havorka idzie pra pradukt, jaki chutka psujecca i paśla niekalkich dzion zachoŭvańnia moža stać nieprydatnym dla prodažu i spažyvańnia.
Pry hetym inšyja karystalniki zaŭvažyli, što pieradača praduktaŭ u sacyjalnyja ŭstanovy nie zaŭsiody takaja prostaja, jak zdajecca. Dla hetaha isnujuć peŭnyja patrabavańni i pracedury, asabliva kali havorka idzie pra pradukcyju, jakaja chutka psujecca.
Adzin z kamientataraŭ adznačyŭ:
«Adzin raz biaspłatna razdaŭ — u nastupnym siezonie znoŭ buduć čakać chalavu».
Sam aŭtar rolika paźniej umiašaŭsia ŭ abmierkavańnie i patłumačyŭ situacyju:
«Dyk ludzi nie razumiejuć. Heta reštki, jakija nie paśpieŭ pradać. Jany sapsavalisia».
Na prapanovu pieradać jahady ŭ dziciačyja damy fiermier adkazaŭ z dolaj ironii:
«Čuŭ! Zaŭtra ŭ mianie vybarka, možaš pryjechać!»
Sprečka pra ceny na kłubnicy
Paralelna ŭ kamientarach razharnułasia jašče adna dyskusija — pra košt jahad u roznych rehijonach krainy.
Adna z karystalnic napisała:
«Nie kožnamu pa kišeni kuplać ich pa 10—12, a to i 15 rubloŭ za kiłahram».
U adkaz joj zaŭvažyli, što takija ceny čaściej sustrakajucca ŭ pierakupščykaŭ i razdrobnych pradaŭcoŭ, tady jak zakupačny košt u vytvorcaŭ značna nižejšy. Pavodle infarmacyi ad fiermiera z Bresckaj vobłaści, fiermierskija kłubnicy pierakupy biaruć pa 8 rubloŭ. A ŭ nasielnictva, vyraščanyja dla siabie, pierakupščyki časam skuplajuć navat pa 2,5 rubla. U Dvarcy ŭ Łuninieckim rajonie kłubnicy 7 červienia skuplali pa 5 rubloŭ.
Karystalniki taksama padzialilisia cenami, jakija bačyli ŭ svaich haradach. Tak, adzin minčuk raskazaŭ, što 11 červienia kupiŭ kłubnicy pa 15 rubloŭ za kiłahram. U Maładziečnie, pavodle słoŭ miascovych žycharoŭ, jahady pradavali pa 8 rubloŭ za kiłahram, u Dziaržynsku — pa 15 rubloŭ, a ŭ Karmie košt dachodziŭ da 19 rubloŭ za kiłahram.
Čamu fiermiery časam vykidajuć uradžaj
Situacyi, kali častka ŭradžaju adpraŭlajecca na śmietnik, adbyvajucca nie tolki ŭ Biełarusi. Asabliva časta heta tyčycca jahad, sadaviny i harodniny z karotkim terminam zachoŭvańnia.
Navat kali pradukt jašče vyhladaje jadomym, jon moža chutka stracić tavarny vyhlad: pamiacca, puścić sok abo pačać psavacca. Dla pradaŭca heta aznačaje ryzyku pretenzij z boku kupcoŭ. Akramia taho, na sartavańnie, pieravozku i razdaču pradukcyi taksama patrabujucca čas i dadatkovyja vydatki.
Historyja z vykinutymi kłubnicami pakazała, nakolki pa-roznamu ludzi hladziać na prablemu. Adnyja ŭpeŭnienyja, što lubuju pradukcyju lepš addavać biaspłatna abo pradavać sa źnižkaj. Inšyja ličać, što karystalniki sacsietak nie zaŭsiody razumiejuć, ź jakimi ciažkaściami sutykajucca vytvorcy tavaraŭ, što chutka psujucca, i što nie ŭsie jahady, jakija trapili ŭ śmiećcievy kantejnier, prydatnyja dla spažyvańnia.
Ciapier čytajuć
«Pajezdkaj my zadavolenyja, ale sivych vałasoŭ dadałosia». Žycharka Śvietłahorska adpačnuła ŭ Hielendžyku i dzielicca emocyjami2
«Pajezdkaj my zadavolenyja, ale sivych vałasoŭ dadałosia». Žycharka Śvietłahorska adpačnuła ŭ Hielendžyku i dzielicca emocyjami
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1414
Kamientary