Žonka Alaksandra Milinkieviča raskazała pra jahony stan: pamiać zachavałasia, ale z ruchalnym aparatam vialikija prablemy
Dynamika adnaŭleńnia palityka Alaksandra Milinkieviča paśla ciažkaj apieracyi zastajecca niestabilnaj. Jahonaja žonka Ina Kulej adznačaje, što niahledziačy na zachavańnie kahnityŭnych funkcyj, hałoŭnaj prablemaj zastajecca adnaŭleńnie ruchaŭ i nastupstvy ŭnutrybalničnych infiekcyj.
Padrabiaznaściami pra zdaroŭje palityka Ina Kulej padzialiłasia ŭ intervju «Radyjo Svaboda», jakoje pierakazvaje partał «Lusterka».
Jana acharaktaryzavała praces adnaŭleńnia jak «areli», dzie zaŭvažny prahres pieryjadyčna źmianiajecca nievialikim adkatam nazad. Hałoŭnym pazityŭnym momantam źjaŭlajecca toje, što paškodžańni mozhu nie zakranuli pamiać i maŭleńnie Alaksandra Milinkieviča. Adnak doŭhaje znachodžańnie ŭ łožku mocna adbiłasia na jahonym fizičnym stanie.
Zaraz śpiecyjalisty-reabilitołahi aktyŭna pracujuć nad adnaŭleńniem matoryki: palityka sprabujuć sadzić, stavić na nohi i vučać trymać pastavu. Hety praces dajecca najciažej.
Dadatkovaj pahrozaj źjaŭlajucca bakteryi, jakimi Milinkievič zaraziŭsia ŭžo padčas znachodžańnia ŭ špitali. Pa słovach Iny Kulej, jany znachodziacca ŭ paŭsonnym stanie, ale ŭ luby momant mohuć aktyvizavacca, što pieryjadyčna zapavolvaje praces reabilitacyi.
Prablemy sa zdaroŭjem u Alaksandra Milinkieviča abvastrylisia letaś u listapadzie. Abśledavańnie pakazała, što jahonaja pravaja šyjnaja arteryja była na 80 pracentaŭ pierakrytaja trombam. Miedyki papiaredzili pra vysokuju ryzyku insultu, tamu 25 listapada palityku praviali płanavuju apieracyju. Adnak paśla chirurhičnaha ŭmiašańnia pačałosia ŭskładnieńnie ŭ vyhladzie acioku mozhu, z-za čaho jon try tydni pravioŭ u adździaleńni intensiŭnaj terapii.
U vyniku levaja častka mozhu nie paciarpieła, adnak pravaja, jakaja adkazvaje za ruchi, atrymała paškodžańni. Z-za hetaha ŭ palityka pierastała pracavać levaja ruka i ŭźnikli surjoznyja prablemy z ruchomaściu noh. Na praciahłuju i składanuju reabilitacyju siamji patrabavałasia 120 tysiač złotych (kala 33 tysiač dalaraŭ). Hetuju sumu nieabyjakavyja biełarusy zdoleli sabrać usiaho za dva dni.
Kamientary