Hramadzianie Šviejcaryi na ahulnanacyjanalnym refierendumie adchilili supiarečlivuju prapanovu ab abmiežavańni kolkaści nasielnictva krainy maksimalnaj adznakaj na 10 miljonaŭ čałaviek. Hetaja inicyjatyva, vyłučanaja pravakansiervatyŭnaj Šviejcarskaj narodnaj partyjaj (SVP), mahła pryvieści da skasavańnia klučavych pahadnieńniaŭ ź Jeŭrapiejskim Sajuzam i radykalnaha pierahladu mihracyjnaj palityki krainy.
Jak paviedamlaje Deutsche Welle, zhodna ź pieršymi vynikami padliku hałasoŭ ad Fiederalnaha statystyčnaha viedamstva Šviejcaryi (BFS), suprać hetak zvanaj «inicyjatyvy ŭstojlivaha raźvićcia» prahałasavali kala 55% hramadzian, u toj čas jak padtrymali jaje tolki 45%. Prychod na refierendumie skłaŭ 57,7%, pryčym pieravažnaja bolšaść šviejcarcaŭ tradycyjna skarystałasia mahčymaściu prahałasavać pa pošcie.
Što prapanoŭvali i čaho ŭdałosia paźbiehnuć
Jak my pisali raniej, na siońniašni ŭ alpijskaj respublicy pražyvaje kala 9,1 miljona čałaviek, pry hetym dola zamiežnikaŭ składaje rekordnyja dla Jeŭropy 27%. Inicyjatary refierendumu źviartali ŭvahu na toje, što z momantu dałučeńnia Šviejcaryi da jeŭrapiejskaha pahadnieńnia ab svabodnym pieramiaščeńni ŭ 2002 hodzie nasielnictva krainy pavialičyłasia na 1,7 miljona čałaviek pieravažna za košt mihracyi.
SVP prapanoŭvała ŭvieści žorstki demahrafičny limit. Kali b kolkaść nasielnictva dasiahnuła 9,5 miljona, urad byŭ by abaviazany vykarystać ekstranyja zachady dla skaračeńnia mihracyi, u tym liku istotna ŭskładnić uźjadnańnie siemjaŭ i pracedury nadańnia prytułku.
U vypadku pieravyšeńnia miažy na 10 miljonaŭ čałaviek Šviejcaryja pavinna była b uvohule skasavać pahadnieńni ab svabodnym pieramiaščeńni ź ES, što pastaviła b pad pahrozu ŭdzieł krainy ŭ Šenhienskaj zonie i Dublinskaj sistemie. Žurnalisty i palitołahi ŭžo achryścili patencyjnyja nastupstvy takoj izalacyi «Šviejcarskim Brexit».
Suprać hetaj radykalnaj inicyjatyvy vystupili ŭsie bujnyja palityčnyja siły krainy, akramia samoj SVP i jaje sajuźnikaŭ.
Pravał inicyjatyvy na refierendumie zdymaje pahrozu mahčymaha kadravaha kryzisu dla šviejcarskaj ekanomiki, jakaja mocna zaležyć ad zamiežnych śpiecyjalistaŭ — ad miedykaŭ i supracoŭnikaŭ śfiery dohladu da vysakakłasnych prafiesijanałaŭ u farmaceŭtyčnaj halinie. Heta taksama supakoić sotni tysiač hramadzian krain ES (tolki niemcaŭ u Šviejcaryi pražyvaje amal 330 tysiač), jakija majuć dazvoł na žycharstva abo štodzionna pryjazdžajuć u Šviejcaryju na pracu.
Źmieny ŭ hramadzianskaj słužbie
Razam z adchileńniem mihracyjnych abmiežavańniaŭ šviejcarcy prahałasavali pa jašče adnym važnym pytańni. Ź nievialikaj pieravahaj (kala 53% suprać 47%) hramadzianie padtrymali prapanovu ab uskładnieńni ŭmoŭ pierachodu na alternatyŭnuju hramadzianskuju słužbu biez zbroi.
Hetaje rašeńnie było vyklikana rekordnym rostam kolkaści maładych ludziej, jakija admaŭlajucca ad tradycyjnaj vajskovaj słužby. Letaś dopusk da alternatyŭnaj słužby atrymali bolš za 7 tysiač čałaviek, što stała histaryčnym maksimumam dla krainy. Urad i vajskovaje kamandavańnie spadziajucca, što ŭskładnieńnie pracedury dapamoža vyrašyć prablemu niedachopu asabovaha składu ŭ vojsku i sistemie hramadzianskaj abarony.
Prapahanda rychtuje hramadstva da zahadkavaj «praciahłaj kamandziroŭki» Łukašenki39
Kamientary