U telehram-akaŭncie źnikłaha Anatola Kotava zaŭvažyli dziŭnuju aktyŭnaść
Kiraŭnik fondu ByHelp Alaksiej Lavončyk raspavioŭ Reform.news pra dziŭnuju aktyŭnaść telehram-akaŭnta źnikłaha Anatola Kotava, supracoŭnika Biełaruskaha fondu spartyŭnaj salidarnaści.
Uviečary 13 červienia polski numar Kotava ŭ Telegram padśviaciŭsia jak aktyŭny, a praź niekalki chvilin źnik.
«Źjaviŭsia polski numar, niedzie kala 23:20 pa Łondanie. I praz try chviliny vydaliŭsia. Ja jaho tolki ŭbačyŭ, jakraz siadzieŭ tam pisaŭ pa spravach listy. Hladžu, jaho numar, usio sychodzicca. Pryčym historyja vyčyščana. U nas ź im była historyja pierapiski, jana spyniłasia ŭ 2023 hodzie», — raspavioŭ Lavončyk Reform.news.
Pavodle słoŭ Lavončyka, jon vyrašyŭ pakul nie pisać na numar, a panazirać, ale praz try chviliny numar byŭ vydaleny.
«U maim razumieńni heta nie pieradača numara inšaj asobie, tamu što ŭ Kotava stajała dvajnaja aŭtentyfikacyja, na 100% upeŭnieny. Prosta aby-chto ŭ telehu b nie ŭlez, kali b nie mieŭ dostupu da dvajnoj aŭtentyfikacyi. Pa-druhoje, navat kali numar zdoch, jaho kamuści pieradali i navat niejak udałosia abyści hetuju dvajnuju aŭtentyfikacyju… Nie viedaju, jak zaraz rehistrujecca Telegram na numar, jaki zabrali ŭ byłoha ŭładalnika», — raspavioŭ Lavončyk.
Aktyŭnaść numara padałasia Lavončyku padazronaj: «Kali heta Kotaŭ, tam była dvajnaja aŭtentyfikacyja. Kali heta nie Kotaŭ, to čamu jon adrazu ž vydaliŭsia».
Anatol Kotaŭ źnik u žniŭni 2025 hoda. Viadoma, što jon adprasiŭsia z pracy ŭ ivent-ahienctvie Terra Group i 21 žniŭnia adpraviŭsia ŭ Stambuł i źnik. Pavodle dadzienych prakuratury Turcyi, pašpart Kotava adbiŭsia a 18:35:54 pry vyjeździe z Turcyi 21 žniŭnia praz port Trabzon.
Anatol Kotaŭ — pradstaŭnik Biełaruskaha fonda spartyŭnaj salidarnaści (BFSS). Skončyŭ Maskoŭski dziaržaŭny instytut mižnarodnych adnosin (MDIMA). Pracavaŭ u MZS Biełarusi, Administracyi prezidenta Respubliki Biełaruś, pasolstvie Biełarusi ŭ Polščy, Nacyjanalnym alimpijskim kamitecie, dyrekcyi Jeŭrapiejskich hulniaŭ — 2019 i Kiraŭnictvie spravami Łukašenki.
U žniŭni 2020 hoda ŭ znak pratestu syšoŭ u adstaŭku z pasady namieśnika zahadčyka adździeła finansavańnia dziaržaŭnych orhanaŭ hałoŭnaha finansavaha ŭpraŭleńnia Kiraŭnictva spravami Łukašenki. Apošnija hady znachodziŭsia ŭ vymušanaj emihracyi.
U 2024 hodzie Kotava zavočna prysudzili ŭ Biełarusi da 12 hadoŭ pazbaŭleńnia voli pa abvinavačańni ŭ zmovie z metaj zachopu ŭłady, kiraŭnictvie ekstremisckim farmiravańniem, spryjańni ekstremisckaj dziejnaści.
Ciapier čytajuć
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha6
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam5050
Kamientary
Pracujem dalej i razam!