U Bierlinie rasijski apazicyjanier Illa Jašyn stvaryŭ partyju ŭ vyhnańni
Na źjeździe ŭ Bierlinie rasijskija apazicyjaniery ŭ emihracyi stvaryli palityčnuju partyju «Mirnaja Rasija».
Jašyn atrymaŭ 68 hałasoŭ delehataŭ. Jaho sapiernicy Volha Padolskaja i Raksana Kisialova nabrali 40 i adzin hołas adpaviedna, piša The Moscow Times.
Źjezd doŭžyŭsia dva dni, na im byŭ pryniaty manifiest i statut partyi, vyznačana jaje struktura kiravańnia i abrany kirujučyja orhany.
Namieśnikami staršyni stali Alena Kacionačkina, Kanstancin Kosaŭ i Volha Prakopjeva. U centralnuju palitradu ŭvajšli 25 čałaviek.
Pavodle słoŭ Jašyna, novaja palityčnaja siła budujecca vakoł troch klučavych pryncypaŭ — miru, svabody i spraviadlivaści.
«Naša zadača — uziać uładu ŭ Rasii. My stvorany za miažoj, ale my nie emihranckaja partyja», — zajaviŭ jon.
Jašyn dadaŭ, što, akramia hetaha, partyja maje namier pradstaŭlać intaresy antyvajenna nastrojenych suajčyńnikaŭ na mižnarodnaj arenie.
Asnoŭnymi kirunkami pracy «Mirnaj Rasii» stanuć «palityčnaja aśvieta ŭ internecie», padtrymka prychilnikaŭ unutry krainy i raźvićcio kantaktaŭ z zachodnimi dziaržavami.
Jašyn taksama zajaviŭ pra płany stvaryć sietku palityčnaha pradstaŭnictva za miažoj i dabivacca intehracyi členaŭ partyi ŭ parłamienty jeŭrapiejskich krain u jakaści ekśpiertaŭ i kansultantaŭ.
Pry hetym užo na etapie stvareńnia ŭ «Mirnaj Rasii» prajavilisia ŭnutranyja niazhody. Jašyna abvinavacili ŭ sprobie skancentravać uładu vakoł siabie i najbližejšaha atačeńnia.
Rehistravać partyju ŭ Rasii pakul nie płanujecca. Pavodle słoŭ Jašyna, u ciapierašnich umovach heta biessensoŭna, pakolki Kreml nie dapuścić źjaŭleńnia ŭ krainie lehalnaj niezaležnaj palityčnaj siły, «jakaja stavić zadaču pryjści da ŭłady».
Kamientary
partyja ružovych poni, džučy ułus NIKOLI NIE BYŬ PAKOJNY, ŭ impierskich miežach heta niemahčyma
Niaŭžo płanujuć brać uładu dystancyjna, z-za miažy?)