Kab abrać adzinaha kandydata, apazicyja nabyła anłajn-płatformu češskaha miljardera. Jak jana pracuje?

Piać apazicyjnych partyj ahučyli svajo rašeńnie nakont vyłučeńnia adzinaha kandydata na prezidenckija vybary-2020. Heta nie samaja prostaja pracedura budzie mieć niekalki etapaŭ, adzin ź jakich — internet-hałasavańnie.

Pavialičyć

Na pres-kanfierencyi 27 studzienia było abvieščana, što dla hetaha hałasavańnia budzie stvorany admysłovy sajt. «NN» daviedałasia, na jakim partale budzie adbyvacca hałasavańnie.

Hałasavańnie projdzie na płatformie na asnovie češskaha sajta prezident21.cz. Jaho jašče ŭ 2016 hodzie stvaryŭ češski miljarder i matematyk Kareł Janaček pad prezidenckija vybary-2018. Faktyčna jon prapanoŭvaŭ u formie anłajn-hulni hałasavać za mahčymaha kandydata ŭ prezidenty.

Kožny hałasujučy atrymlivaŭ try hałasy «za», a taksama adzin hołas «suprać». Ahułam u češskim hałasavańni anłajn uziali ŭdzieł bolš za 320 tysiač čałaviek. Rehistracyja adbyvałasia praz sms. Nijakaj jurydyčnaj siły hetaje hałasavańnie, viadoma, nie mieła.

Na pieršym etapie hałasavańnia stać «kandydatami» mahli ŭsie, chto farmalna padychodzić pad patrabavańni, aproč samoha Janačeka, a ŭ druhim — užo zarehistravanyja kandydaty ŭ prezidenty.

Upeŭnienaje apošniaje miesca ŭ internet-hałasavancy atrymaŭ dziejny prezident Čechii Miłaš Zeman, ale mienavita jon zdabyŭ pieramohu na realnych vybarach, nabraŭšy 51,36%. Hałasavańnie na ŭčastkach nie mieła ničoha supolnaha z anłajnavym.

Darečy, Zeman byŭ faktyčna adzinym kandydatam, jaki całkam praihnaravaŭ prajekt prezident21.cz, jon nie zaklikaŭ svaich prychilnikaŭ brać udzieł u tym hałasavańni.

Cikava, što tolki 21% udzielnikaŭ hałasavańnia skarystali hałasy «suprać». 41% raźmierkavali ŭsie try svaje hałasy «za», a 40% addali tolki adzin hołas.

Janaček — heta čałaviek, jaki daŭno vystupaje za bolšuju internetyzacyju češskaha hramadstva. I prajekt prezident21.cz —adna z častak jahonaha najbujniejšaha prajekta Demokracie 21.

Nakolki viadoma «NN», u biełaruskaj apazicyi atrymałasia damovicca nakont vykarystańnia placoŭki. Pryčym zroblena heta było za dastatkova simvaličnyja hrošy.

Pavialičyć

Pakul pradumvajucca varyjanty, jak budzie adbyvacca hałasavańnie i rehistracyja, pryjarytetnym ličycca rehistracyja praz fejsbuk. Adnak heta moža pryvieści da stvareńnia fejkavych akaŭntaŭ. Što tyčycca sms-rehistracyi, to ŭ hetym varyjancie prysutničaje hrašovy faktar.

Rassyłka 100 tysiač sms-paviedamleńniaŭ z kodami paćvierdžańnia kaštuje kala $600. Pakul arhanizatary nie ŭpeŭnienyja, što na heta źjaviacca srodki.

U biełaruskim hałasavańni pa adzinym kandydacie pakul raspracoŭvajecca varyjant, pry jakim kožny «vybarnik» zmoža addać adzin hołas «za», a taksama adzin «suprać». Jość i varyjant z dvuma hałasami «za». U najbližejšy čas pavinny być vyrašany ŭsie techničnyja pytańni.

• 0
• 0
• 0
• 0
• 0
• 0
• 0
• 0