Simptomy, pieraściarohi, praviły pavodzin. Karanavirus u Biełarusi
1. Simptomy Covid-19: u čym roźnica ad hrypu.
Karanavirus-2019 raspaŭsiudžvajecca padobna da hrypu, i jaho simptomy padobnyja da simptomaŭ hrypu. Haračka, bol u horle, słabaść, bol u hałavie… Dva asablivyja simptomy novaha karanavirusa ŭ jaho ciažkich vypadkach — heta suchi kašal i zadyška.
2. Čamu da karanavirusa-2019 nielha stavicca niesurjozna?
Čamu krainy prymajuć takija rašučyja zachady pieraściarohi? Tamu što jon časta vyklikaje mocnuju pnieŭmaniju, jakaja chutka raźvivajecca. Ad uskładnieńniaŭ u vyniku zvyčajnaha hrypu pamiraje prykładna 0,13% usich chvorych, śmiarotnaść ad karanavirusa składaje na siońnia (pakul niama śpiecyfičnych srodkaŭ lekavańnia) ad 2 da 3 %, amal u 20 razoŭ bolš.
3. Ustrymajciesia ad pajezdak u harady, dzie adbylisia ŭspyški karanavirusa
Na siońnia heta Uchań u Kitai, Tehu ŭ Paŭdniovaj Karei, paŭnočnaja Italija, Kum i Tehieran u Iranie.
4. Kali vy ŭ horadzie, dzie raspaŭsiudžvajecca infiekcyja, to
minimizujcie pajezdki na hramadskim transparcie, pachody na kancerty, u carkvu i tak dalej.
5. Ci ad karanavirusa ratujuć maski?
Kali vy sutykajeciesia z chvorymi, to abaviazkova. Ale na vulicach imi karystacca nieabaviazkova. Prosta starajciesia čaściej myć ruki, nie trycie vočy, kali vy ŭ aŭtobusie, nie kałupajciesia ŭ nosie paśla paciskańnia ruki ź nieznajomym, nie davajcie dzieciam lizać parenčy ŭ mietro.
6. Nijakaha psichozu i paniki. Virus lohka spyniajuć zvyčajnyja karancinnyja miery.
Va ŭsich krainach zvyčajnyja zachady izalacyi i karancinu spynili raspaŭsiud virusa. Toje samaje budzie i ŭ nas, navat kali virus dojdzie da Biełarusi.
7. Abierahajcie starejšych.
Śmiarotnaść ad Covid-19 minimalnaja ŭ chvorych da 50 hadoŭ. Dzieci pieranosiać karanavirus lohka, ciažka jon praciakaje tolki ŭ ludziej z panižanym imunitetam, chraničnymi chvarobami. Śmiarotnaść u ludziej va ŭzroście 70-80 hadoŭ — kala 8%, u starych ad 80 hadoŭ — kala 15 %. Heta značyć, kali karanavirus pryjdzie, pastarajciesia abierahčy vašych babulaŭ i dziadulaŭ. Vyzvalicie ich ad pachodaŭ u kramu i h.d.
8. Kali skončycca?
A voś heta ciažka pradkazać. Virusołahi schilnyja ličyć, što, jak i hryp, Covid-19 — zaraza siezonnaja, a z nadychodam viesnavoha ciapła źniknie, ale heta nie peŭna.
Akramia taho, užo viadoma, što jaho mutacyjnaść u 10 razoŭ vyšejšaja, čym u atypovaj pnieŭmanii 2002-2003 hadoŭ. U kožnym pakaleńni jaho hienietyčny kod mianiaje, umoŭna kažučy, 1 litaru z 1000. Heta aznačaje, što jon moža stać jak bolš niebiaśpiečnym, tak i mienš niebiaśpiečnym, jak bolš zaraznym, tak i mienš zaraznym.
Vakcyna ad jaho ŭžo teścirujecca, i za paru miesiacaŭ jaje možna budzie vykarystoŭvać, ale taksama ž usich adrazu nie vakcynuješ, dyj pavyšanaja mutacyjnaść moža adbicca na efiektyŭnaści vakcyny.
Ale, paŭtorymsia, usio pakul pakazvaje na toje, što da krasavika-maja virus maje spynicca.
9. Skul u Jeŭropie ciahnucca nitački?
Nie ŭdałosia znajści taho «pacyjenta 0», jaki pryvioz virus z Kitaja ŭ Italiju, ale bolšaść novych zaražeńniaŭ u Jeŭropie źviazanyja ź plamaj u Italii, a kankretniej, u Łambardyi (rajon Miłan, Breša) i Vieniecyi (rajon Padui — toj samaj, skarynaŭskaj). Virus u inšyja krainy pryvieźli italjanskija turysty abo padarožniki, što viarnulisia z rehijona Miłana.
Rajony raspaŭsiudžvańnia zarazy izalujuć na karancin. Hateli, dzie vyjaŭlajuć chvorych, taksama źmiaščajuć na karancin. Ludziam daviadziecca prasiadzieć tam dva tydni.
Adnak krainy Jeŭrasajuza nie ličać patrebnym zakryvać miežy, bo škoda ekanomicy moža być bolšaj, čym škoda ad epidemii.
U Biełarusi pieršy chvory — heta student ź Irana, jaki prybyŭ u Minsk rejsam z Baku 22 lutaha. Virus u jaho byŭ vyjaŭleny 27 lutaha. Student i koła jaho kantaktaŭ izalavanyja ŭ infiekcyjoncy.
Kamientary