Eks-viadučy ANT Dźmitryj Siemčanka pravioŭ noč na Akreścina
Były viadučy i kiraŭnik prezidenckaha puła žurnalistaŭ na kanale ANT Dźmitryj Siemčanka pravioŭ noč u turmie na Akreścina. Žurnalista zatrymali 10 vieraśnia. Pra heta Svabodzie raskazała jaho žonka Julija, piša Radyjo Svaboda.
«Ja tolki što była ŭ Frunzienskim RUUS, z treciaj sproby mnie ŭdałosia daviedacca kankretnuju infarmacyju. Noč jon pravioŭ u IČU na vulicy Akreścina. Mnie skazali, što ŭ RUUS jaho nie buduć pryvozić, sud budzie dystancyjny, praz Skype. Kali jon pačniecca, mnie nie skazali».
A 14-j Julija paviazie Dźmitryju pieradaču na Akreścina.
U čym vinavaciać Dźmitryja Siemčanku?
«Učora, kali jaho zatrymlivali, skazali, što treba vyśvietlić, ci braŭ jon udzieł u niesankcyjanavanaj akcyi».
Dźmitryja Siemčanku zatrymali va ŭłasnaj kvatery. Kala 17 hadzin pazvanili ŭ dźviery troje čałaviek u cyvilnym, adzin byŭ biez maski, jon pakazaŭ svajo paśviedčańnie. Julija havoryć, što supracoŭniki pavodzili siabie taktoŭna i vietliva. Dzicia, jakomu čatyry z pałovaj hady, nie napałochałasia.
«Supracoŭnik, jaki pradstaviŭsia, skazaŭ, što Dźmitryja treba dastavić u Frunzienski RUUS, kab vyśvietlić, ci braŭ jon udzieł u masavych mierapryjemstvach. Dźmitryj skazaŭ, što nie ŭdzielničaŭ. Supracoŭnik adkazaŭ, što jon hetaha nie budzie vyśviatlać i što jon ceły dzień da nočy zajmajecca tolki dastaŭkaj ludziej u pastarunak, — kaža Julija. — My nie nadta ździvilisia, kali ŭbačyli hetych ludziej doma, my maralna byli hatovyja, viedajučy, što adbyvajecca ŭ krainie».
Miesiac tamu Dźmitryj zvolniŭsia z ANT i pakul źjaŭlajecca biespracoŭnym.
Julija kaža, što vielmi kiepska stavicca da taho, što adbyvajecca ŭ krainie.
«Jak my zrazumieli, zakon užo ŭ nas nie pracuje. Usio, što adbyvajecca, heta absalutnaja svavola. I heta, vidać, začepka, kab niejak adpomścić mužu».
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia2
Kamientary