Jak vieny buduć vykarystoŭvacca dla identyfikacyi čałavieka
Aŭstralijskija daśledčyki pierakananyja, što identyfikacyja čałavieka z dapamohaj vien na tylnym baku dałoni źjaŭlajecca bolš nadziejnaj za inšyja mietady.
Bijamietryčnaja identyfikacyja stanovicca ŭsio bolš raspaŭsiudžanaj. Technałohija raspaznavańnia tvaraŭ užo vykarystoŭvajecca na rehistracyi ŭ aeraportach, u pastarunkach palicyi i navat u načnych kłubach. U toj ža čas adbitki palcaŭ i sistemy raspaznavańnia hołasu abo radužnaj abałonki ŭžo daŭno stali nieabchodnymi ŭ roznych halinach dla zabieśpiačeńnia biaśpieki, piša CNN.
Adnak daśledčyki z Univiersiteta Novaha Paŭdniovaha Uelsa, što ŭ Aŭstralii, adznačajuć, što bolšaść sučasnych bijamietryčnych mietadaŭ majuć peŭnyja niedachopy. Adbitki palcaŭ lohka źniščajucca z pavierchni, sistemy raspaznavańnia tvaru možna padmanuć fotazdymkam z sacsietki, a kantaktnyja linzy mohuć vykarystoŭvacca dla taho, kab źbić sistemu raspaznavańnia radužnaj abałonki.
«Uzory vien znachodziacca pad skuraj, tamu nie pakidajuć adbitkaŭ, jakija možna źniščyć abo padrabić, da ich niama dostupu ŭ sacsietkach, u adroźnieńnie ad fotazdymkaŭ tvaru», — pierakanany Said Šach, daśledčyk z Univiersiteta Novaha Paŭdniovaha Uelsa. — Tamu my vierym, što novy mietad identyfikacyi z dapamohaj vien padmanuć budzie bolš składana».
Z dapamohaj kamiery hłybini Intel RealSense daśledčyki zrabili kala 17 500 vyjaŭ ad 35 čałaviek, jakija ściskali ruku ŭ kułak, i ŭzor vien na tylnym baku dałoni stanaviŭsia vyrazna bačnym. Paśla štučny intelekt vyłučaŭ z hetych vyjaŭ admietnyja prykmiety, jakija zatym mahli vykarystoŭvacca dla identyfikacyi čałavieka z dakładnaściu 99%.
Daśledčyki śćviardžajuć, što taki mietad moža być vykarystany dla aŭtentyfikacyi ludziej na piersanalnych pryładach, naprykład, na noŭtbukach ci smartfonach.
Kamientary