Z adnaho boku — dzieŭbanuŭ kryzis, najechała Rasija, ź inšaha — prarvana izalacyja i Zachad daje hrošy. To Łukašenka ŭ pantyfika dy Bierłuskoni haściuje, to da jaho zavitvajuć jeŭrakamisary dy zaakijanskija sienatary. «Siabry zdalok», jak jon skazaŭ. Amal što bratańnie na Elbie :)
Ale pramova 2 lipienia na schodzie ŭ Pałacy Respubliki lišni raz zaśviedčyła: pa vialikim rachunku ničoha nie źmianiłasia. «Bronia kriepka». U honar aficyjnaha śviata niezaležnaści Łukašenka pramaŭlaŭ pa-rasijsku. Pry hetym nazvaŭ raspad SSSR hieapalityčnaj trahiedyjaj i paraiŭ Zachadu adkinuć fanaberyju.
Pavodle aficyjnaha kiraŭnika, padčas kryzisu varta abapiracca na ŭłasnyja siły. Śpičrajtery, musić, nie ŭličyli, što teza nadta ž asacyjujecca ź idejaj čučche. Ale bolej pikantnym jość toje, što mienavita zaraz Minsk chapaje kredyty dzie tolki možna. Pryčym mnohim padajecca, što ŭłada nie nadta pierajmajecca, jak usio heta potym addavać z pracentami. Nam by tolki dzień prastajać dy noč pratrymacca.
Cikava taksama, što hod tamu ŭ anałahičnaj pramovie Łukašenka abiacaŭ zładzić demakratyčnyja vybary, kazaŭ pra pašyreńnie pravoŭ partyj i ŭsio takoje. Ciapier, musić, vyrašana, što sastupak i tak až zanadta.
Siońnia kiraŭnik zajaviŭ, što «zachodni śviet nie musić fanaberysta stavicca da inšych dziaržaŭ i ličyć, što tolki ŭnifikavany jeŭrapiejski šlach raźvićcia pravilny, a astatnija niepaŭnacennyja». Ź jaho słoŭ, «vidavočnym stanovicca, što Biełaruś nie pavinna całkam kapijavać zachodniuju palityčnuju sistemu».
Vo jak, kapijavali-kapijavali, niby starannyja vučni — i raptam schamianulisia: niešta nie toje, blin hareły!
Łukašenka patłumačyŭ, što «pierapałki nakont taho, čyj parłamient lepšy, dzie bolej demakratyi i pravoŭ čałavieka, — heta šlach u nikudy».
Dadamo, što i tak zrazumieła: biełaruski parłamient — samy kruty. Voś upiorsia roham u pytańni Abchazii z Paŭdniovaj Asiecijaj — i nichto jamu rady nie daŭ.
Z vysokaj trybuny taksama byli skrytykavany zahany hłabalizacyi (chto nie ŭ kursie pytańnia — pasłuchajcie pieśniu «Krambambuli» pra «panajechała haściej»:). Vykryta falš suśvietnych antykryzisnych forumaŭ.
Zrešty, treba ŭličvać, na jakuju aŭdytoryju pracuje kiraŭnik dziaržavy padčas takich imprez. U zale Pałaca Respubliki i nazaŭtra kala steły było bahata vieteranaŭ. Dy i paspality lud la televizaraŭ musić najpierš ubačyć, što pravadyr pa-raniejšamu mocny i nie zaziraje ŭ rot zachodnikam.
A novyja akcenty ŭsio ž zaŭvažany. Naziralniki ŭ Maskvie adrazu raŭniva adznačyli, što nie było zhadki pra sajuznuju dziaržavu. Dy i ŭvohule, maŭlaŭ, užo ni słova pra supolnaje z rasijskimi bratami zmahańnie. Nibyta tolki Biełaruś i pieramahła fašyzm.
Nu dyk a čaho ž vy, panovie, chacieli, kali kružełka «sumiesnaha hnijeńnia ŭ akopach» užo nie daje źnižak na haz?
Namiok na sajuznuju dziaržavu, zrešty, byŭ, ale nadta svojeasablivy. U kantekście temy biełaruska-rasijskich dačynieńniaŭ prahučała: «My musim vyrazna ŭśviedamlać, što nie štučnyja ŭtvareńni zdolejuć zblizić našy bratnija narody i zabiaśpiečyć ich dabrabyt — da hetaj vysakarodnaj mety pryviaduć kankretnyja kroki ŭ ekanamičnaj, palityčnaj, sacyjalnaj dy inšych śfierach». Karaciej, chočacie chaŭrusu — kuplajcie našy traktary i davajcie błakitnaje paliva pa smalenskich cenach!
A pakolki rajskich umoŭ ad Maskvy čakać užo nie vypadaje, to hetyja pasažy možna razhladać jak cichi rekvijem pa sajuznym prajekcie.
3 lipienia nas čakajuć tanki i salut. Ekspart zvaliŭsia napałovu, małaja adkrytaja ekanomika siniavokaj respubliki kałapsuje — ale hladzi, narod, jak my možam dać pa zubach lubomu ahresaru!
Chacia tyja, kaho tut tradycyjna zaličvali ŭ ahresary, zdajecca, užo zdalisia biez boju i spraŭna šluć nam miachi z tranšami :)
ZY. Štučnaść daty, vybranaj dla aficyjnaha dnia niezaležnaści, padśviadoma mulaje navat składalnikam śviatočnych tekstaŭ.
U vystup Viarchoŭnaha hałoŭnakamandujučaha na paradzie 3 lipienia zakłali dziŭnavaty biazadrasna-palemičny pasaž-apraŭdańnie: «Vyznačyŭšy hetu datu hałoŭnym dziaržaŭnym śviatam, biełaruski narod čarhovy raz davioŭ svaju mudraść. Bo krynicaj našaha suvierenitetu jość nie papiarovyja dekłaracyi (kamień u harod kolišniaha Viarchoŭnaha Savieta? — A.K.). Nie zajavy tak zvanych nacyjanalnych lideraŭ (Treciaja Ustaŭnaja hramata BNR i, adpaviedna, Dzień Voli? — A.K.). A vola naroda, jaho pavaha da svajoj hieraičnaj historyi...».
Sama ž impreza 3 lipienia, kali kazać koratka, była vytrymana całkam u duchu «linii Stalina». Prahrukatała vajskovaja technika pieravažna sastarełych savieckich marak. Potym rušyli hrejdery i bietonamiašałki.
A Miadźviedzieŭ na śviata tak i nie prylacieŭ. Adhukajecca małočnaja vajna, padčas jakoj daviałosia kidać na ŭschodniuju miažu nie tanki, a našych doblesnych mytnikaŭ. Dziela spraviadlivaści tre' było b i ich kałonu na parad :)
Kamientary