Biełaruskaja fitnes-trenierka dva hady pakutavała ad nieviadomaj chvaroby. Zdajecca, jana znajšła adkaz — ale ad jaho nie lahčej

Chvaroba pačałasia, kali Valancina žyła na Bali. Pieršyja simptomy — słabaść, hałaŭny bol, dyskamfort u pajaśnicy, zakładzieny nos i pacieńnie pa načach. Za nastupnyja paŭhoda boli ŭ śpinie i prablemy z nosam pahoršylisia. 

Valancina šukała ŭ Indaniezii daktaroŭ, jakija b joj dapamahli, ale biezvynikova. Za nastupny hod jana prajšła bahata abśledavańniaŭ u Biełarusi i inšych krainach, piła šmat lekaŭ i navat chadziła da ekstrasensaŭ, ale ničoha nie dapamahała. Da raniejšych simptomaŭ dadalisia šmat inšych, u tym liku mocnyja boli va ŭsim ciele.

Dziaŭčyna padazravała, što maje niejkuju parazitarnuju infiekcyju ci prablemy z pazvanočnikam. Ale ŭ siaredzinie 2025‑ha daviedałasia, što sprava, vierahodna, nie ŭ ich.

Pavialičyć

Valancina palacieła ŭ Indyju, kab trapić da tamtejšych infiekcyjanistaŭ — maŭlaŭ, kali jany ŭsio žyćcio pracujuć z trapičnymi infiekcyjami, to dapamohuć joj ź jaje mierkavanaj parazitarnaj infiekcyjaj. Vizit nie prynios vynikaŭ. 

Ale paśla jaho biełaruska paznajomiłasia ź dziaŭčynaj u padobnaj situacyi, jakaja maje anałahičnyja simptomy i jakoj na toj čas try hady nie mahli dapamahčy daktary. Jana prapanavała Valancinie pahladzieć film «Pad majoj skuraj» pra ludziej, chvorych na chraničnuju chvarobu Łajma, i biełaruska paznała ŭ simptomach siabie. 

Valancina zdała analiz, i ŭ jaje znajšli antycieły da ŭzbudžalnika chvaroby Łajma. Dziaŭčyna ŭspomniła, što raniej, da pierajezdu na Bali, lubiła bavić čas na pryrodzie. Mahčyma, tady jaje ŭkusiŭ klešč, ad jakoha jana atrymała barelii — tak nazyvajuć bakteryi, jakija vyklikajuć chvarobu Łajma.

Pavialičyć

Ciapier Valancina ličyć, što ŭ jaje chraničnaja chvaroba Łajma i kainfiekcyi, to-bok ad taho samaha klašča dziaŭčyna atrymała i inšyja mikroby. Paśla taho, jak źjaviŭsia hety dyjahnaz, biełaruska šukaje doktara. Jana zapisała videa z subcitrami na anhlijskaj movie, dzie paprasiła paraić joj luboha miedyka ŭ luboj krainie, hatovaha papracavać z chraničnaj chvarobaj Łajma.

U sučasnaj miedycynie dyskutujuć nakont dyjahnazu «chraničnaja chvaroba Łajma», bo niama istotnych dokazaŭ, što paśla vylečvańnia vostraj formy chvaroby ŭ arhaniźmie zastajucca barelii. Pry hetym analiz na antycieły moža zastavacca stanoŭčym i niejki čas paśla taho, jak pacyjent ačuniaŭ, tamu jon nie dakazvaje najaŭnaść aktyŭnaj infiekcyi prosta ciapier. Toje ž samaje i z kainfiekcyjami — kali analizy na ich stanoŭčyja, heta nie zaŭždy aznačaje najaŭnaść aktyŭnaj infiekcyi.

Miedyki, adnak, pryznajuć, što paśla chvaroby Łajma simptomy mohuć zachoŭvacca hadami. Ale bolšaść daktaroŭ ličać, što pravilniej vydzialać taki stan u asobny dyjahnaz — postbarelijozny sindrom, a nie kazać pra chraničnuju chvarobu Łajma.

U nastupnyja miesiacy Valancina sprabavała lačycca, ale jaje stan tolki paharšaŭsia. Dziaŭčyna źviazała heta z tym, što praz nastupstva adnoj z kainfiekcyj praciahvała špihavać siabie rečami, jakija nibyta musili palehčyć jaje stan. Jana pryznajecca ŭ instahramie, što prajšła praz roznyja schiemy antybijotykaŭ, płazmafierez, prymała ziołki i lačyłasia z dapamohaj pčoł.

Dziaŭčyna dahetul pakutuje ad sutarhaŭ i mocnych bolaŭ, joj prapisvajuć trankvilizatary, kab choć trochi palepšyć jaje stan. Jana piša ŭ storys, što ŭ studzieni 2026‑ha trapiła ŭ RNPC nieŭrałohii i nieŭrachirurhii, dzie pa jaje spravie zładziać respublikanski kansilium.

Pavialičyć

Ale jana nie čakaje, što pa vynikach atrymaje lačeńnie mienavita ad chvaroby Łajma:

«Nieŭrołahi tut prysłuchalisia da taho, kab pahladzieć dakumientalny film «Pad našaj skuraj» […] Zrazumieła, što suprać sistemy nichto nie pojdzie. Nie viedaju, što budzie na kansiliumie praz paru dzion».

Siły ŭ dziaŭčyny ŭžo zakančvajucca. U jaje instahramie apublikavali hałasavoje paviedamleńnie ad jaje:

«Viedaješ, mnie siońnia tak mocna drenna, što ja ŭžo, kali ščyra, raźvitvajusia z žyćciom. Nie viedaju, ci jość u hetym niejki sens».

• 0
• 1
• 2
• 2
• 7
• 52
• 0
• 0