Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB

Alaksandr Maŭčanaŭ naradziŭsia ŭ Barysavie. U 2010 hodzie jon byŭ siarod aktyŭnych udzielnikaŭ Płoščy. U pačatku 2011 hoda chłopca aryštavali za toje, što padčas pratestaŭ jon sarvaŭ dziaržaŭnyja ściahi z budynku KDB, a taksama nanios niekalki ŭdaraŭ pa dźviarach Doma ŭradu. Alaksandru prysudzili 3 hady źniavoleńnia — pravaabaroncy pryznali jaho palitźniavolenym. Ale ž vypuścili Maŭčanava raniej pa pamiłavańni.

U 2014 hodzie biełarus pajšoŭ dobraachvotnikam abaraniać Ukrainu. Vajavaŭ Alaksandr da 2024 hoda, nieadnarazova byŭ paranieny.

Niadaŭna z navin Maŭčanaŭ daviedaŭsia, što jahonaja byłaja kachanka Ina Kardaš nasamreč była špijonkaj KDB i napisaŭ emacyjanalny dopis u fejsbuku: «Karaciej, heta, za mnoj tut seks-špijonka ŭ maładości sačyła. Škada, viadoma, što ja nie zrazumieŭ i nie abnuliŭ samku, ale pryjemna, što KDB takoha ahienta dziela mianie zadziejničaŭ».

Ab ich adnosinach Alaksandr raspavioŭ «Našaj Nivie».

Jon kaža, što paznajomiŭsia ź Inaj u 2017 hodzie. Jana sama napisała jamu jak žurnalistka, chacieła sustrecca padčas adpačynku vajskoŭca i zapisać intervju.

— Sustrelisia, pahavaryli. Niekalki razoŭ jana pryjazdžała da mianie na Danbas, my byli ŭ pryfrantavych haradach.

Pavialičyć

Ciapier, užo viedajučy pra druhi bok žyćcia Iny, Alaksandr miarkuje, što, imavierna, u jaje była niejkaja zadača ad biełaruskaha KDB.

— Ja ŭ toj momant nie zajmaŭ niejkich pasad z dostupam da sakretnaj infarmacyi. Mabyć, kadebisty cikavilisia ahułam biełarusami ŭ USU.

Dla jakoha ŭkrainskaha ŚMI tady pisała Ina, Alaksandr zhadać nie moža — kaža, što materyjał atrymaŭsia vielmi nizkaj jakaści, a padpisała jaho žurnalistka psieŭdanimam.

Ale ramanu heta nijak nie pieraškodziła. Na pytańnie, čym ža začapiła Ina, mužčyna adkazvaje:

— Pryhožaja. I ja adčuvaŭ emacyjnuju prychilnaść. Usio ž ziamlačka, a ź biełarusami ja redka bačusia. Byli časam ad jaje frazy ŭ styli «rasijan na Danbasie niama», praz padobnaje ŭ nas uźnikali kanflikty.

Ci žyła Ina bahata? Nie, kaža Alaksandr. Jamu dziaŭčyna raskazvała, što žyvie na zarobak žurnalistki.

Ramantyčnyja adnosiny ŭ pary byli ź pierapynkami, skončylisia jany ŭ 2021 hodzie — tady ž Alaksandr bačyŭ Inu ŭ apošni raz. Pryčyny rasstańnia byli banalnyja.

— Nie syšlisia charaktarami. Jana vielmi šmat času nadavała pracy, dyj ja byŭ na ŭschodzie Ukrainy.

Z taho času Alaksandr nie cikaviŭsia losam byłoj kachanki — pakul nie pračytaŭ u ŚMI, što Ina zatrymanaja jak špijonka.

— Jak vam ciapier z dumkaj, što vy spali z ahientkaj KDB?

— Što prysunuŭ — heta dobra. Što paśla hetaha nie prystreliŭ — drenna.

• 25
• 3
• 70
• 15
• 1
• 3
• 0
• 1