Da 5,5 hadoŭ kałonii: prakurory zapytali terminy dla piataj častki abvinavačanych pa «masavych biesparadkach» u Breście
Praces u Leninskim sudzie Bresta nad piataj partyjaj abvinavačanych pa kryminalnaj spravie ab masavych biesparadkach za padziei 10 žniŭnia 2020 hoda pačaŭsia jašče ŭ kancy lipienia. Za čas pracesu kolkaść abvinavačvanych vyrasła z 13 da 19 čałaviek: niekatorych mužčyn pieramiaścili ź inšych partyj praz chvarobu, taksama ŭ hety praces uklučyli zatrymanych padčas pierasiačeńnia miažy ź Litvoj Rusłana Vołkava i Hleba Ramanava. Usich ich sudziać pavodle č. 2 art. 293 Kryminalnaha kodeksa, paviedamlajuć pravaabaroncy.
19 kastryčnika dziaržabvinavačvańnie zapatrabavała nastupnyja pakarańni dla ŭdzielnikaŭ pracesu:
pavodle dvuch artykułaŭ — č. 2 art. 293 i č. 3 art. 205 KK (kradziež) — šlacham składańnia:
- Šafarenka Jakaŭ — 5 hadoŭ 6 miesiacaŭ kałonii ŭzmocnienaha režymu + štraf 100 bazavych;
- Filimonaŭ Stanisłaŭ — 5 hadoŭ kałonii ŭzmocnienaha režymu + štraf 100 bazavych.
pavodle č. 2 art. 293 KK:
- Piakač Jaŭhien — 5 hadoŭ kałonii ŭzmocnienaha režymu (šlacham składańnia ź nieadbytaj «chimijaj» u 1,5 hoda);
- Cielešman Alaksandr — 4 hady 6 miesiacaŭ kałonii ahulnaha režymu;
- Antonaŭ Mark, Vieramiej Illa, Vołkaŭ Rusłan, Harčaniuk Ihar, Kancevič Filip, Soŭpiel Ivan, Traciuk Siarhiej — pa 4 hady kałonii ŭzmocnienaha režymu kožnamu;
- Klimčuk Arciom, Kazłoŭski Viktar, Ramanaŭ Hleb, Sidziuk Raman, Cialipka Leŭ, Cimafiejeŭ Alaksandr, Chabaviec Daniła — pa 3 hady 6 miesiacaŭ kałonii ŭzmocnienaha režymu kožnamu;
- Maźko Pavieł — 3 hady 6 miesiacaŭ ahulnaha režymu.
Što viadoma pra sudovy praces?
10 žniŭnia Ivan Soŭpiel kupiŭ u restaranie KFS dva burhiery ŭ papiarovym pakiecie. Kali z boku supracoŭnikaŭ prylacieła śviatłošumavaja hranata, jon na emocyjach kinuŭ hety pakiet. Taksama Soŭpielu stavicca ŭ vinu toje, što jon padniaŭ plitku i apuściŭ jaje pobač z saboj. Svaju vinu mužčyna nie pryznaje.
Taksama ŭ materyjałach spravy jość videa ad 10.08.2020, pavodle jakoha 19-hadovy Leŭ Cialipka štości kidaje, pavodle viersii abvinavačvańnia, u bok milicyjanieraŭ. Na pasiadžeńni chłopiec raspavioŭ, što jon tady prosta stajaŭ i zdymaŭ na telefon, paśla čaho jaho pchnuli — telefon vypaŭ z ruk i raźbiŭsia; na emocyjach chłopiec u bok ad siabie kinuŭ čachoł ad telefona, toj pralacieŭ usiaho paru mietraŭ, a adlehłaść da milicyjanieraŭ była kala 50 mietraŭ. Bolš nijakich dziejańniaŭ Lvu nie inkryminujecca, adnak abvinavačvańnie kvalifikuje ŭčynak chłopca jak «udzieł u masavych biesparadkach».
Na adnym z pracesaŭ Siarhiej Traciuk zajaviŭ, što 10 žniŭnia byŭ paranieny. Jon lažaŭ u lakarni, dzie jamu pierasadžvali skuru (daviedki pradstaŭleny sudu). A sudziać jaho za toje, što jon kinuŭ płastykavuju butelku nibyta ŭ bok supracoŭnikaŭ i padniaŭ kavałak asfaltu. Viadoma, što z materyjałami spravy Siarhiej aznajomiŭsia tolki na sudzie, u SIZA takoj mahčymaści jamu nie dali.
Stanisłavu Filimonavu i Jakavu Šafarenku taksama staviać u vinu kradziež 6 ton trub da śniežnia 2020. Na sudzie mužčyny tłumačyli, što truby lažali iržavyja i zarosłyja, pobač ź niedabudavanym budynkam, dzie ŭžo niekalki hadoŭ ničoha nie adbyvajecca i kudy možna bieśpieraškodna trapić. Tamu jany paličyli truby mietałałomam i pačali zdavać ich u adpaviedny punkt pryjomu.
Nahadajem, u ramkach spravy pra tak zvanyja «biesparadki» 10 žniŭnia 2020 hoda ŭ Breście ŭžo asudžana 46 čałaviek. U sumie jany atrymali 171 hod i 6 miesiacaŭ źniavoleńnia.
Kamientary