«Jon, napeŭna, u paralelnym suśviecie žyvie». Parady ministra Ivanca vyklikali buru reakcyj
Mała pa jakich temach reakcyi nastolki adnaznačna niehatyŭnyja. «Heta ŭžo nie sistema adukacyi, a režym. Dzieci škołu nienavidziać».
Niadaŭniaje intervju ministra adukacyi Andreja Ivanca vyklikała burnyja emocyi siarod biełaruskich baćkoŭ i vučniaŭ. Kiraŭnik viedamstva zajaviŭ, što kateharyčna nie prymaje pasłuh repietytaraŭ, ličačy školnuju prahramu nastolki prostaj, što lubyja tata ci maci zdolnyja samastojna dapamahčy svajmu dziciaci. Bolš za toje, ministr padkreśliŭ: jaho ŭłasnyja dzieci dadatkovych nastaŭnikaŭ nie naviedvajuć, i heta jaho pryncypovaja pazicyja.
Videarolik z hetymi tezisami ŭ TikTok za sutki nabraŭ amal paŭmiljona prahladaŭ, sabraŭšy zvyš 1600 kamientaroŭ.
Pieršaje, što zacikaviła internet-karystalnikaŭ — heta ŭmovy, u jakich vučacca dzieci samoha ministra.
Samaj papularnaj stała zaŭvaha, jakaja nabrała zvyš 8 tysiač łajkaŭ: «vidać, u jaho dzieci ŭ pryvatnaj».
U adkaz na heta inšyja skieptyčna dadali: «jaho dzieci nie płanujuć vučycca ŭ RB».
Hradus niezadavolenaści pracaj ministerstva akazaŭsia nastolki vysokim, što pytańnie «Kali jaho zdymuć z pasady» apynułasia na druhim miescy pa papularnaści (amal 6 tysiač upadabańniaŭ).
Ludzi taksama tonka padkałoli Ivanca: «Jak doŭha ministr u svoj čas pracavaŭ u škole?». Reč u tym, što staŭlenik Alaksandra Łukašenki nie pracavaŭ u škole ni dnia.
Ahulny nastroj kamientataraŭ možna apisać adnoj frazaj: «Jon, napeŭna, u paralelnym suśviecie žyvie».
Biełarusy pierakananyja, što za adukacyjny praces pavinna adkazvać škoła, a nie baćki:
«A nastaŭnik tady što robić na pracoŭnym miescy?»;
«A moža, nastaŭniki pačnuć vykładać, a nie na baćkoŭ usio skidvać».
«Navat pieśnia takaja jość: vučać u škole, a nie baćki pavinny dapamahać».
«Mnie zdajecca, što z urokami pavinny dapamahać nastaŭniki, a kali dzieci nie razumiejuć, to ŭžo pytańnie da tych, chto ich vučyć».
Chto pavinien karmić, a chto — vučyć?
Pa mierkavańni bolšaści, zadača baćkoŭ — zabiaśpiečyć bazavyja patreby dziciaci i jaho psichičny stan, a nie vykonvać funkcyi vykładčykaŭ pa ŭsich pradmietach.
«Baćki žyvuć na pracy, kab utrymlivać siamju», — pišuć karystalniki. Hetuju dumku raźvivajuć i inšyja:
«Tak, pačakajcie, zadača nastaŭnika — navučyć, maja zadača — apranuć, nakarmić, vychavać emacyjna stabilnym i psichična ŭraŭnavažanym čałaviekam, padkazać u žyćci, jak rabić, ale VUČYĆ jość ŠKOŁA!»;
«Baćka pavinien zrabić tak, kab dzicia było badziorym, vietlivym, sytym i achajna apranutym. NAVUČAŃNIE — HETA VOTČYNA ŬSTANOVY ADUKACYI».
Nie abyšłosia i bieź ironii ŭ bok samoha ministra:
«A ministry, napeŭna, zamiest baćkoŭ na pracu chadzić buduć, a taksama bytavymi momantami zajmacca».
Karystalniki źviartajuć uvahu i na kampietencyju baćkoŭ u tych halinach, jakija jany sami nie vyvučali abo daŭno zabylisia.
«Tak-tak, baćki dapamohuć z zamiežnaj movaj, jakoj jany nie vučyli, i nie tolki».
Da abmierkavańnia dałučylisia i sami vučni:
«Nie dumaju, što ŭ baćkoŭ jość žadańnie dapamahać nam z urokami paśla pracy».
«U mianie baćki pracujuć pa 12 hadzin, u ich času i sił chapaje tolki na toje, kab spytać, jak u mianie prajšoŭ dzień».
«Mazhi zakipajuć»
Kali dla ministra prahrama «prostaja», to tyja, chto sutykajecca z sučasnymi padručnikami štodnia, staviać pad sumnieŭ adekvatnaść navučalnych materyjałaŭ:
«A jon padručniki ŭ ruki braŭ?».
«Ministr taki ž, jak školnaja prahrama».
«Vypusk 2005 hoda. Ciapier 2026 hod, dačka ŭ 9 kłas idzie. Pytańnie. Ci pamiataju ja, što było ŭ školnaj prahramie, kali jana kožny hod mianiajecca?»
Kamientatary dzielacca ŭłasnym dośviedam:
«Maja ŭnučka pračytała ŭsłych historyju… ja vytrymała tolki adzin abzac!!!! Mazhi zakipajuć, zakrucili, zaviarcieli tak… Raniej daty my vučyli i historyju, a ciapier tam……»
«Vam jašče matematyku nie čytali. Voś dzie vybuch usiaho. A ja naiŭna mierkavała, što viedaju matematyku», — zaŭvažaje jašče adzin kamientatar.
Sistemny kryzis
Niekatoryja kamientatary hladziać na prablemu hłybiej, źviazvajučy stan adukacyi z ahulnaj palityčnaj situacyjaj u krainie. Dla ich słovy ministra — tolki viaršynia ajśbierha:
«Biełaruskaja adukacyja — dno. Patrebna reforma, i najsurjoźniejšaja. Pieratvaryli ŭ niejkaje źniasilvajučaje katavańnie dla dziciaci i dla baćkoŭ. Zabivajuć indyvidualnaść, tvorčaść, heta ŭžo nie sistema adukacyi, a režym. Dzieci škołu nienavidziać».
Pry hetym ludzi spačuvajuć i samim nastaŭnikam, jakija stali zakładnikami sistemy:
«Vy sabie ŭjavić nie možacie, jak pakutujuć nastaŭniki i administracyja škoł ad ministerstva i takich ministraŭ!»;
«Jak i paŭsiul u takich arhanizacyjach Biełarusi, zahad na zahadzie, pravierka na praviercy. Pracavać niama kali, nastaŭniki taksama zakładniki hetaha režymu».
Ci jość tyja, chto zhodny?
Spraviadlivaści dziela varta adznačyć, što znajšlisia i tyja, chto padtrymaŭ mierkavańnie ministra. Adnak takija hałasy zastalisia ŭ vidavočnaj mienšaści:
«Nu ŭ niečym jon maje racyju, nu nie takaja składanaja adukacyja, viadoma, jość składanyja temy, ale kali ty nie možaš niešta zrazumieć, to možna prosta i biez repietytaraŭ, jakraz z tymi ž baćkami, abo chopić navat adnaho videa na tym ža jutubie».
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary