U Biełaviežskaj puščy znajšli moch, jaki bolš za 100 hadoŭ ličyli źnikłym
Padčas metanakiravanych palavych daśledavańniaŭ u Biełaviežskaj puščy supracoŭnik Instytuta ekśpierymientalnaj bataniki NAN Biełarusi Alaksiej Astrelin znajšoŭ unikalny reliktavy moch — antytrychiju pavisłuju (Antitrichia curtipendula), paviedamlaje pres-słužba Nacyjanalnaha parku «Biełaviežskaja pušča».
Dla terytoryi sučasnaj Biełarusi heta faktyčna pieršaja paćvierdžanaja rehistracyja hetaha vidu. U navukovych archivach zachavalisia tolki dźvie zhadki pra jaho, datavanyja kancom XIX — pačatkam XX stahodździa. Pieršaje pachodzić z daśledavańniaŭ Franciška Ksavieryja Błonskaha, Antonija Ejsmanda i Karła-Frederyka Drymiera 1888 hoda, druhoje — z pracy Flejšera 1919 hoda.
Francišak Ksavieryj Błonski tady adznačaŭ, što znajšoŭ hety moch «adzin-adziny raz na śsiečanym dubie ŭ Hajnaŭskaj varcie kala ručaja Lutoŭnia». Adnak siońnia terytoryja hetaj varty całkam znachodzicca ŭ polskaj častcy Biełaviežskaj puščy. Paśla 1919 hoda moch u rehijonie bolš nie fiksavali.
Praz bolš čym stahodździe zabyćcia novaje miesca rostu redkaha vidu taksama znajšli na dubie — u termafilnaj dubrovie na terytoryi byłoha zubravodčaha hadavalnika.
Asablivuju navukovuju i praktyčnuju cikavaść maje toje, što moch pasialiŭsia na pavalenym stvale duba, jaki ŭpaŭ nie mienš za 20 hadoŭ tamu. Draŭnina ŭžo znachodzicca na hłybokaj stadyi raskładańnia. Mienavita jana stvaryła śpiecyfičnyja fizika-chimičnyja ŭmovy i stabilny mikraklimat, nieabchodnyja dla isnavańnia hetaha vielmi patrabavalnaha vidu.
Znachodka nahladna pakazvaje važnuju rolu bujnoj miortvaj draŭniny ŭ lasnych ekasistemach. Vydaleńnie takich pavalenych dreŭ moža pryvodzić da niezvarotnaha źbiadnieńnia bijaraznastajnaści, pakolki jany słužać asiarodździem dla redkich i śpiecyjalizavanych vidaŭ arhanizmaŭ.
Kamientary