«Mianie zaŭsiody ratavała viera…» Vyjšła kniha ŭspaminaŭ pra kardynała Śviontka

Heta kniha-śviedčańnie tych, chto dobra viedaŭ kardynała, chto ź im pracavaŭ, chto mieŭ ščaście ź im kantaktavać i być śviedkam jaho žyvoj niepachisnaj viery, jaho addanaści Chrystu i kaściołu, paviedamlaje catholic.by.

Ustupnaje słova da vydańnia napisaŭ arcybiskup emieryt Tadevuš Kandrusievič.

Zasłužany biełaruski ijerarch, jaki ŭ 1991 hodzie ŭdzialiŭ budučamu kardynału biskupskaje paśviačeńnie, a ŭ 2007 hodzie staŭ jaho nastupnikam na Minska-Mahiloŭskaj kafiedry, va ŭstupnym słovie piša pra Kazimira Śviontka:

«Jaho imia jak žyvoha mučanika časoŭ ateistyčnych hanieńniaŭ na vieru, pieršaha Minska-Mahiloŭskaha Mitrapalita, Apostalskaha Administratara Pinskaj dyjacezii, a taksama pieršaha i šmathadovaha Staršyni Kanfierencyi Katalickich Biskupaŭ u Biełarusi załatymi litarami ŭpisanaje ŭ sučasnuju historyju adradžeńnia katalickaha kaścioła na Biełarusi.<…>

Svaim achviarnym słužeńniem ciaham 20-i hadoŭ kardynał Kazimir Śviontak pakinuŭ važki śled u historyi katalickaha kaścioła na Biełarusi.

Najvažniejšymi viechami jaho słužeńnia nieabchodna ličyć adnaŭleńnie minskaj archikafiedry Imia Najśviaciejšaj Panny Maryi i dziejnaści Miždyjacezijalnaj vyšejšaj duchoŭnaj sieminaryi imia śviatoha Tamaša Akvinskaha ŭ Pinsku, u jakoj jon sam atrymaŭ śviatarskuju farmacyju, praviadzieńnie Sinodu Minska-Mahiloŭskaj archidyjacezii, Pinskaj i Viciebskaj dyjacezij, zasnavańnie nieabchodnych dla dziejnaści kaścioła struktur, u tym liku takich važnych jak vydaviectva i ŚMI, padrychtoŭku i vydańnie liturhičnaj i katechietyčnaj litaratury, arhanizacyju dabračynnaj dziejnaści i šmat čaho inšaha.

Sustrakajučysia i pracujučy razam z kardynałam Kazimiram Śviontkam, ja pieradusim byŭ uražany kłopatam Jaho Eminencyi pra kaścioł i jaho budučyniu. Kaścioł jamu byŭ Maci, jakaja jaho naradziła dla duchoŭnaha žyćcia, i jakoj jon achviarna słužyŭ da kanca svaich dzion.

U kardynale Śviontku ŭražvała taksama i toje, što jon nikoli nie narakaŭ na ciažkaści, navat na tyja, što spaznaŭ u viaźnicy, budučy asudžanym na vyšejšuju mieru pakarańnia — rasstreł.

U samych składanych situacyjach jon daviaraŭ Božamu Providu, a nie «mocnym» hetaha śvietu. Pa žyćci jaho viała hłybokaja viera ŭ Boha i apieka Najśviaciejšaj Panny Maryi»,— adznačaje arcybiskup Kandrusievič.

Prezientacyja novaha vydańnia adbyłasia z udziełam arcybiskupa Kandrusieviča 22 kastryčnika ŭ kafiedralnym kaściole Najśviaciejšaha Imia Maryi ŭ Minsku paśla śviatoj Imšy ŭ hadavinu rekansiekracyi hałoŭnaj śviatyni Minska-Mahiloŭskaj archidyjacezii.

• 0
• 0
• 0
• 0
• 0
• 1
• 0
• 0