Ale daŭ čas na toje, kab padać jaho nanova.
Sudździa sa štata Fłaryda adchiliŭ pazoŭ prezidenta Donalda Trampa da haziety Wall Street Journal na 10 młrd dalaraŭ. Tramp abvinavaciŭ hazietu ŭ paklopie na jaho ŭ artykule ab jaho suviaziach z pamierłym finansistam i asudžanym piedafiłam Džefry Epštejnam, piša Bi-bi-si.
Akruhovy sudździa Daryn Hiejłs zajaviŭ, što Tramp u svaim pazovie «navat i blizka nie pakazaŭ», što hazieta dziejničała sa złosnym namieram u dačynieńni da jaho — a heta ŭ ZŠA źjaŭlajecca abaviazkovaj umovaj dla abvinavačvańnia ŭ paklopie.
Sudździa daŭ Trampu čas da 27 krasavika, kab pierafarmulavać pazoŭ i padać jaho znoŭ. Člen jurydyčnaj kamandy Trampa skazaŭ Bi-bi-si, što jany tak i zrobiać.
«[Prezident] praciahnie pryciahvać da adkaznaści tych, chto handluje fejkavymi navinami i dezinfarmuje narod Amieryki», — zajaviŭ advakat.
Donald Tramp padaŭ pazoŭ suprać Wall Street Journal, News Corporation, jakaja joj vałodaje, i kiraŭnika karparacyi Rupierta Miordaka za artykuł ad 17 lipienia minułaha hoda, u jakim havaryłasia, što ŭ albomie vinšavańniaŭ Epštejnu z dniom naradžeńnia ŭ 2003 hodzie było i vinšavańnie ad Trampa.
Heta vinšavańnie, jak napisała hazieta, było napisana pavierch malunka aholenaha žanočaha cieła.
Praź niekalki tydniaŭ členy Kanhresa ad Demakratyčnaj partyi apublikavali kopiju hetaha pasłańnia. Hazieta ŭ svaim artykule vyjavu nie publikavała, a dała słoŭnaje apisańnie, ale jano ŭ dakładnaści supała z karcinkaj, apublikavanaj kanhresmienami.
Donald Tramp zajaviŭ, što heta falšyŭka, i nijakaha vinšavańnia Epštejnu jon nie pisaŭ i nie malavaŭ.
Tramp nie admaŭlaje, što siabravaŭ z Epštejnam bolš za 10 hadoŭ, ale śćviardžaje, što pasvaryŭsia ź im jašče ŭ samym pačatku nulavych.
Pavodle amierykanskich zakonaŭ iściec, jaki zajaŭlaje pra paklop na jaho, pavinien pakazać najaŭnaść «realnaha złosnaha namieru», heta značyć, adnačasova dakazać, što publičnaja zajava, na jakuju jon skardzicca, była chłuśnioj, i što aŭtar zajavy viedaŭ ci pavinien byŭ viedać, što heta chłuśnia.
Sudździa Hiejłs u pastanovie ab adchileńni pazovu Trampa napisaŭ, što prezident «nie dakazaŭ pierakanaŭčym čynam, što adkazčyki apublikavali artykuł z realnym złosnym namieram».
Ciapier čytajuć
Ministr kultury vyciahnuŭ u efir čarhovaha Astapa Bendara. I heta stała apošniaj kroplaj: suprać hetaha fiermiera-chvalka vystupiła siamja25
Kamientary