Novy film «Netfliksa» bje rekordy prahladaŭ, choć krytyki jaho załažali

Siońnia ŭ śviecie kino skłałasia dziŭnaja situacyja: kab stać papularnym, filmu zusim nie abaviazkova być šedeŭram. Jak piša Onet.pl, jaskravy tamu prykład — novaja karcina ad «Netfliksa» pad nazvaj «Śmiarotnaja stychija» (Thrash). Usiaho za adzin dzień paśla vychadu hety tryler-katastrofa ŭźlacieŭ na pieršaje miesca pa prahladach u 91 krainie śvietu, u tym liku ZŠA, Vialikabrytanii i Polščy.

Ale samaje cikavaje pačałosia potym, kali hledačy i krytyki pahladzieli stužku i pačali vystaŭlać joj adznaki. Akazałasia, što rejtynh filma vahajecca na adznacy kala 30—38% sa sta, što ŭ śviecie kino ličycca sapraŭdnym pravałam.

Siužet filma davoli prosty i nahadvaje kłasičnyja historyi pra vyžyvańnie. Dziejańnie adbyvajecca ŭ nievialikim haradku ŭ Paŭdniovaj Karalinie, na jaki abrynajecca mahutny ŭrahan. Horad akazvajecca zatoplenym. U hetaj vadzie źjaŭlajucca akuły-byki — niebiaśpiečnyja drapiežniki, jakija mohuć žyć navat u presnaj vadzie. Žychary, jakija sprabavali schavacca ad niepahadzi, ciapier vymušanyja zmahacca z drapiežnikami ŭ svaich ułasnych damach i dvarach.

Taki siužet vidavočna natchniony kłasičnym halivudskim filmam «Skivicy» (Jaws), jaki ŭ 1970‑ia hady zrabiŭ historyi pra akuł adnym z samych papularnych žanraŭ. Netflix užo nie pieršy raz źviartajecca da padobnych tem: naprykład, francuzski tryler «Pad Paryžam» staŭ adnym z najbolš paśpiachovych prajektaŭ płatformy. «Śmiarotnaja stychija» praciahvaje hetuju liniju.

Hledačy paprakajuć stužku ŭ drennych śpiecefiektach, niełahičnych pavodzinach hierojaŭ i pradkazalnaści kožnaj nastupnaj sceny.

Krytyki byli jašče bolš žorstkimi ŭ svaich vysnovach. Vydańnie The Guardian pastaviła filmu ŭsiaho adnu zorku, adznačyŭšy, što karcina vyhladaje štučnaj i tannaj z samaha pačatku.

Niekatoryja ekśpierty navat nazvali film «ahresiŭna durnym», padkreślivajučy, što jon sprabuje być adnačasova i surjoznaj dramaj, i zabaŭlalnym ekšenam, ale ŭ vyniku nie spraŭlajecca ni z adnoj z hetych zadač.

Adnak siarod chvali niehatyvu znajšlisia i tyja, kamu film spadabaŭsia. Niekatoryja hledačy adznačajuć, što «Śmiarotnaja stychija» — heta vydatnaje «kino na adzin viečar», jakoje nie patrabuje hłybokich rozdumaŭ i dazvalaje prosta panazirać za pryhodami na ekranie.

Adzin z hałoŭnych faktaraŭ, jaki prymusiŭ miljony ludziej nacisnuć knopku prajhravańnia — heta zorny skład i viadomyja imiony stvaralnikaŭ. Hałoŭnuju rolu vykanała Fibi Dynevar, jakuju mnohija viedajuć pa papularnym sieryjale «Brydžertany». U filmie taksama źniaŭsia Džyman Chansu, naminant na «Oskar» i zorka «Hładyjatara».

Akramia taho, pradziusaram vystupiŭ Adam Makkiej — čałaviek, jaki staić za stvareńniem takich viadomych karcin, jak «Nie hladzicie ŭhoru» i «Hulnia na panižeńnie». 

U vyniku vypadak «Śmiarotnaj stychii» pakazvaje, što ŭ sučasnym kino papularnaść časta vyznačajecca nie jakaściu, a ŭvahaj publiki. Navat kali film atrymlivaje nizkija bały, jon usio roŭna zastajecca prajektam, jaki abmiarkoŭvajuć, što hraje na ruku stryminhavaj płatformie.

• 2
• 1
• 5
• 1
• 0
• 0
• 0
• 0