28 kastryčnika ŭviečary adbyłosia pasiadžeńnie dyscyplinarnaj kamisii Minskaj haradskoj kalehii advakataŭ, na jakim razhladałasia sprava Jaŭhiena Pylčanki, apošniaha abaroncy Viktara Babaryki.
Kamisija pryniała rašeńnie vyklučyć z advakatury Jaŭhiena Pylčanku — za sistematyčnyja parušeńni zakanadaŭstva ab advakatury.
Raniej, 19 kastryčnika, pavodle zahadu ministra justycyi ŭ dačynieńni da Jaŭhiena Pylčanki była raspačataja dyscyplinarnaja vytvorčaść, i jaho adchilili ad pracy.
U čaćvier na pasiadžeńnie źjavilisia 7 čalcoŭ kamisii, staršyniavaŭ Alaksandar Piatrovič. Doŭžyłasia sustreča paŭtary hadziny. Jakija pretenzii da pracy abaroncy Viktara Babaryki vykazała dyscyplinarnaja kamisija Minskaj haradskoj kalehii advakataŭ? «Radyjo Svaboda» raskazaŭ sam Jaŭhien.
«Kamisija vyniesła davoli vialikuju pastanovu na 7 albo 8 arkušach — jany nie pranumaravanyja. Asnoŭnych pretenzij dźvie.
Pieršaja — nibyta ja ŭ replikach padčas sudovych sprečak pa spravie Viktara Babaryki daŭ acenku vystupleńniam inšych advakataŭ. To-bok za toje samaje, za što vyklučyli Dźmitryja Łajeŭskaha.
A druhoje — za toje, što ja abaraniaŭ adnačasova Viktara Babaryku i Śviatłanu Kuprejevu, siabroŭku jahonaj siamji. I nibyta ŭ ich byŭ kanflikt intaresaŭ: KDB dasłaŭ list, što jość kanflikt intaresaŭ — biez abhruntavańniaŭ i pradastaŭleńnia dakumientaŭ. Nasamreč, nijakaha kanfliktu intaresaŭ tam niama. Ni śledstva, ni sud ciaham 1,5 hoda nijakich mnie pretenzij nie vykazvali. I niama nijakich dakumientaŭ, jakija b paćviardžali, što kanflikt intaresaŭ jość. Dyscyplinarnaja kamisija pavieryła KDB, a nie mnie. I vyrašyła, što ja parušyŭ prafiesijnuju etyku», — raspavioŭ Jaŭhien Pylčanka.
Advakatam Jaŭhien Pylčanka pracuje z 2012 hoda, z 2018 — u advakackim biuro «Łajeŭski i partniory».
Pylčanka abaraniaŭ eks-bankira Viktara Babaryku, siabroŭku siamji Babarykaŭ Śviatłanu Kuprejevu, svajho kalehu advakata Maksima Znaka.
Ciapier u Viktara Babaryki niama nivodnaha z šaściarych advakataŭ. Maksim Znak asudžany na 10 hadoŭ, Illa Salej źjechaŭ ź Biełarusi, Alaksandra Pylčanku pazbavili licenzii jašče bolš za hod tamu, Dźmitryja Łajeŭskaha — u lipieni 2021 hoda, Natallu Mackievič adchilili ad pracy 13 kastryčnika, a 25 kastryčnika vyklučyli z kalehii. I voś ciapier pazbaŭleny licenzii apošni advakat Babaryki Jaŭhien Pylčanka.
Ciapier čytajuć
Vyzvaleny palitviazień Mikita Jemialjanaŭ, jakoha aryštavali jašče ŭ 2019 hodzie, 19‑hadovym4
Vyzvaleny palitviazień Mikita Jemialjanaŭ, jakoha aryštavali jašče ŭ 2019 hodzie, 19‑hadovym
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary