«Vahnier» vyvozić zołata z Afryki ŭ Biełaruś — WSJ

Apošnija try miesiacy zołata z Centralnaafrykanskaj Respubliki, zdabyču jakoha kantraluje «Vahnier», adpraŭlajuć u Biełaruś. Biełaruski śled apisany ŭ materyjale WSJ pra 28‑hadovaha spadkajemca zasnavalnika «Vahniera». Hazieta spasyłajecca na čynoŭnikaŭ, byłych paplečnikaŭ vahnieraŭcaŭ i daśledčykaŭ ich dziejnaści.

Pavodle vydańnia, u krasaviku Pavieł Pryhožyn sabraŭ u hateli ŭ stalicy CAR Banhi pradstaŭnikoŭ «Vahniera» i ŭrada.

Jany abmiarkoŭvali, jak zachavać ekspart zołata, paźbiahajučy mižnarodnaha kantrolu i abminajučy rynki Abjadnanych Arabskich Emirataŭ.

Paśla pieramoŭ ministr zdabyŭnoj pramysłovaści CAR pahadziŭsia dapamahać z dakumientami, jakija pradstaŭlajuć zołata jak dziaržaŭnuju ŭłasnaść, raskazali surazmoŭcy WSJ. Pavodle čynoŭnikaŭ i miascovych daśledčykaŭ, apošnija try miesiacy hetyja hruzy nakiroŭvajucca ŭ Biełaruś.

Pavieł Pryhožyn atrymaŭ spadčynu paśla hibieli baćki ŭ avijakatastrofie ŭ žniŭni 2023 hoda — praz dva miesiacy paśla miaciažu «Vahniera». Jamu tady było 25 hadoŭ.

Raniej jaho viedali jak amatara pryvatnych samalotaŭ i raskošnych jacht, ale baćka zahadzia rychtavaŭ syna da kiravańnia siamiejnymi spravami. Da 20 hadoŭ Pavieł Pryhožyn kiravaŭ raskošnymi asabniakami i majomaściu siamji, a paźniej udzielničaŭ u vajskovych apieracyjach u Siryi i Ukrainie, dzie słužyŭ apierataram bieśpiłotnikaŭ i supracoŭnikam raźviedki.

Centram jaho ciapierašniaha biznesu stała CAR. Pavodle WSJ, pad kamandavańniem Pryhožyna znachodziacca kala 500 najmitaŭ. Jany achoŭvajuć prezidenta Fastena-Arkanža Tuadera, vajujuć suprać paŭstancaŭ i majuć upłyŭ u miascovych siłavych strukturach.

Pryhožyn rehularna prylataje ŭ Banhi ź Pieciarburha i spyniajecca ŭ hateli Ledger Plaza, jaki faktyčna słužyć jaho štabam. Uzbrojenaja achova praviaraje navat vysokapastaŭlenych čynoŭnikaŭ, jakija prychodziać na sustrečy.

Pavodle acenki Global Initiative Against Transnational Organized Crime, košt hadavoj zdabyčy na najbujniejšym załatym rudniku, jaki kantraluje hrupoŭka, dasiahaje 250 miljonaŭ dalaraŭ.

Ahulnyja štohadovyja pastupleńni siamiejnaha biznesu — lehalnaha i kryminalnaha — daśledčyki aceńvajuć bolš jak na 400 miljonaŭ dalaraŭ.

Akramia zołata, struktury Pryhožyna, pavodle rasśledavańnia, zarablajuć na pastaŭkach zbroi ŭzbrojenym hrupoŭkam u Sudanie i Livii, vytvorčaści piva i harełki, a taksama kantralujuć značnuju častku miascovaha rynku tramadołu — apioidnaha abiazbolvalnaha.

Paśla śmierci Jaŭhiena Pryhožyna Maskva sprabavała padparadkavać afrykanskija apieracyi «Vahniera» Ministerstvu abarony praz stvorany «Afrykanski korpus». Adnak u CAR jaho syn zachavaŭ kantrol: pavodle dypłamataŭ, Tuadera sam prasiŭ Kreml nie zamianiać vahnieraŭcaŭ rasijskimi vajskoŭcami.

Daśledčyki dapuskajuć, što Pavieł Pryhožyn moh damovicca z Kramlom pra praciah pracy. Pry hetym struktury «Vahniera» pa-raniejšamu finansujuć u CAR prarasijskuju prapahandu.

Biełaruś i raniej źviazvali z afrykanskaj łahistykaj «Vahniera». U listapadzie 2023 hoda iSANS paviedamlaŭ pra rejs Ił-76 z Babrujska ŭ Banhi, a ŭ vieraśni 2024‑ha byŭ pieralot z Oršy ŭ stalicu CAR. Daśledčyki mierkavali, što samaloty mahli pieravozić najmitaŭ abo ich majomaść.

Paśla miaciažu Jaŭhiena Pryhožyna ŭ červieni 2023 hoda častka najmitaŭ pierabazavałasia ŭ Biełaruś. U lipieni Ministerstva abarony Biełarusi aficyjna paviedamiła, što vahnieraŭcy navučajuć biełaruskija terytaryjalnyja vojski pad Asipovičami.

• 0
• 0
• 0
• 6
• 2
• 0
• 11
• 0