Pucin choča novaj «Jałty» — padziełu śvietu na śfiery ŭpłyvu miž Maskvoj, Vašynhtonam i Piekinam. Nad hałovami Jeŭropy i Ukrainy

Padčas telefonnaj razmovy z Donaldam Trampam 9 kastryčnika Uładzimir Pucin znoŭ abmiarkoŭvaŭ mahčymaść trochbakovaj sustrečy razam ź Si Czińpinam na samicie ACES 18—19 listapada, paviedamiła The Wall Street Journal. Pavodle krynicy haziety, Pucin raźličvaje na «novuju Jałtu» — pieramovy ab padziele śfier upłyvu pa anałohii z kanfierencyjaj 1945 hoda. 

Jak paviedamiŭ WSJ były supracoŭnik rasijskaj raźviedki, znajomy ź inicyjatyvaj, rasijski prezident uskładaje na trochbakovy farmat maštabnyja, choć i nierealistyčnyja nadziei:

jon chacieŭ by pieratvaryć sustreču ŭ druhuju Jałcinskuju kanfierencyju, na jakoj vialikija dziaržavy padzialili b śviet na śfiery ŭpłyvu.

Maskva prapanavała pravieści pieramovy na palach samitu ACES 18—19 listapada ŭ kitajskim Šeńdženi. Prapanovu pieradali Piekinu pa dypłamatyčnych kanałach. Kitaj daŭ zrazumieć, što nie piarečyć, kali pahodzicca Tramp, śćviardžajuć krynicy WSJ.

 Tramp pakul nie pahadziŭsia, ale moža padtrymać ideju dziela abiacańnia skončyć vajnu, paviedamiŭ vysokapastaŭleny amierykanski čynoŭnik. Farmat vyklučaje ŭdzieł Ukrainy i jaje jeŭrapiejskich sajuźnikaŭ.

Mahčymaść pieramoŭ paćvierdziŭ i dziaržsakratar ZŠA Marka Rubia. «Razmovy pra sustreču byli. Nie viedaju, ci ŭzhodnienaja jana kančatkova, ale prezident jasna daŭ zrazumieć, što choča zakančeńnia vajny pamiž Rasijaj i Ukrainaj», — skazaŭ jon Reuters u paniadziełak. Piaskoŭ paviedamiŭ WSJ, što pakul niama jasnaści ni nakont sustrečy, ni nakont paradku dnia, «choć usie try baki pryznajuć hipatetyčnuju mahčymaść praviadzieńnia takoj sustrečy».

U śniežni 2021 hoda Rasija pieradała ZŠA i NATA prajekty damoŭ ab «harantyjach biaśpieki». Maskva patrabavała jurydyčna zabaranić pašyreńnie aljansu, u tym liku za košt Ukrainy i inšych byłych respublik SSSR, spynić vajskovuju dziejnaść NATA va Ukrainie, Uschodniaj Jeŭropie, Zakaŭkaźzi i Centralnaj Azii, a taksama viarnuć raźmiaščeńnie vojskaŭ aljansu ŭ Jeŭropie da kanfihuracyi 1997 hoda.

NATA admoviŭsia začyniać dźviery dla novych členaŭ, prapanavaŭšy abmiarkoŭvać kantrol nad uzbrajeńniami i źnižeńnie ryzyk. Pucin zajaviŭ, što patrabavańni Rasii praihnaravanyja. Abviaščajučy 24 lutaha 2022 hoda pra ŭvarvańnie, jon skazaŭ, što Maskva 30 hadoŭ sprabavała damovicca z Zachadam, ale sutykałasia z «chłuśnioj» i «šantažom».

U červieni 2024 hoda na sustrečy z kiraŭnictvam MZS Rasii Pucin prapanavaŭ stvaryć novuju sistemu biaśpieki ŭ Jeŭrazii i pastupova zharnuć tam vajskovuju prysutnaść «źniešnich dziaržaŭ». U mai 2025 hoda Pucin znoŭ zapatrabavaŭ piśmovych harantyj niepašyreńnia NATA — u tym liku na Hruziju, Małdovu i inšyja byłyja savieckija respubliki.

U vieraśni 2026 hoda Pucin zajaviŭ, što pytańni jeŭrapiejskaj biaśpieki byli vyrašanyja pavodle vynikaŭ Druhoj suśvietnaj vajny, a źmieny paśla raspadu SSSR adbyvalisia sa zhody Rasii. Usio, što supiarečyć hetym damoŭlenaściam, supiarečyć intaresam Maskvy, skazaŭ jon.

Hetym razam ideja novaj Jałty hučyć na fonie pierahladu adnosin Vašynhtona i Maskvy. Na praciahu apošnich tydniaŭ ZŠA:

• dazvolili handal rasijskim dyzielnym palivam paśla razmovy Trampa z Pucinym 9 kastryčnika — niahledziačy na adsutnaść prahresu ŭ mirnych pieramovach;
• prypynili ŭviadzieńnie novych sankcyj, praduhledžanych pryniatym u vieraśni zakonam;
• patrabujuć ad Kijeva spynić udary pa rasijskich naftapierapracoŭčych zavodach;
• abmiarkoŭvali ździełki z zamiežnymi aktyvami «Łukojła» i ŭdzieł inviestara z ZŠA ŭ prajektach «Paŭnočnaha patoku», a taksama mahčymaje razmarožvańnie aktyvaŭ Rasii;
• amierykanskija pieramoŭščyki taksama viaduć razmovy ab adnaŭleńni zakupak Jeŭropaj rasijskich enierharesursaŭ.

• 1
• 3
• 3
• 10
• 0
• 0
• 37
• 0