«Ja nie maju namieru z hetym mirycca». Kiraŭnik MUS Litvy choča pravieryć dziejnaść Volhi Karač

Ministr unutranych spraŭ Litvy Marcinas Kacialinas źvierniecca ŭ pravaachoŭnyja orhany z prośbaj dać pravavuju acenku dziejnaści Volhi Karač i hramadskaj ustanovy «Naš dom», jakoj jana kiruje. Taksama płanujecca pravieryć dziejnaść inšych asob, jakim nie dali prytułak, ich suviazi z varožymi dziaržavami i arhanizacyi, źviazanyja ź imi, piša LRT.

Pavodle słoŭ M. Kacialinasa, za apošnija dva hady ŭ Litvie vyjavili piać hramadzian Biełarusi, jakim admovili ŭ nadańni prytułku z pryčyny pahrozy dziaržaŭnaj biaśpiecy, adnak ich nielha vypravić u krainu pachodžańnia.

Jak adznačyŭ ministr, departavać takich asob nie dazvalajuć normy litoŭskaha i mižnarodnaha prava, jakija zabaraniajuć viartać čałavieka ŭ dziaržavu, dzie jamu mohuć pahražać katavańni, biesčałaviečnaje abo prynižalnaje abychodžańnie.

«Takim čynam uźnikaje absurdnaja situacyja: Litva ličyć čałavieka pahrozaj nacyjanalnaj biaśpiecy, admaŭlaje jamu ŭ nadańni prytułku, ale nie moža jaho departavać. U vyniku pavodle dziejnaha paradku jamu vydajuć dazvoł na pražyvańnie i pracu ŭ Litvie», — napisaŭ Marcinas Kacialinas u paniadziełak u fejsbuku.

Adnoj z takich asob ministr nazvaŭ Volhu Karač. Pavodle jaho słoŭ, zhodna z acenkaj Departamienta dziaržaŭnaj biaśpieki (DDB), jana niasie pahrozu nacyjanalnaj biaśpiecy Litvy, a ŭ 2015—2019 hadach supracoŭničała z rasijskimi śpiecsłužbami.

Jon taksama adznačyŭ, što ŭ 2024 hodzie Viarchoŭny administracyjny sud Litvy pryznaŭ zaklučeńnie DDB ab pahrozie z boku Volzie Karač matyvavanym i zasnavanym na faktach.

Zaniepakojenaść ministra vyklikaje i dziejnaść hramadskaj ustanovy «Naš dom», jakoj kiruje Volha Karač. Jon maje namier źviarnucca ŭ pravaachoŭnyja orhany, kab jany dali acenku dziejnaści arhanizacyi.

«Ja nie źbirajusia z hetym mirycca», — padkreśliŭ ministr.

M. Kacialinas taksama paprosić acanić dziejnaść inšych asob, jakija znachodziacca ŭ Litvie i jakim admovili ŭ nadańni prytułku z pryčyny pahrozy dziaržaŭnaj biaśpiecy, a taksama ich mahčymyja suviazi z varožymi dziaržavami.

Miž tym Departamient mihracyi paprosiać pravieryć, ci majuć hetyja asoby hramadzianstva inšych dziaržaŭ, prava na pražyvańnie ŭ inšych krainach abo mahčymaść vyjechać u biaśpiečnuju treciuju krainu. Ministerstva justycyi pavinna budzie acanić, ci dastatkova isnych pravavych instrumientaŭ dla abmiežavańnia dziejnaści takich asob i źviazanych ź imi arhanizacyj. Ministr adznačyŭ, što pry nieabchodnaści buduć inicyjavanyja źmieny ŭ zakanadaŭstva.

«Litva — nie toje miesca, dzie možna karystacca našaj pravavoj abaronaj i adnačasova dziejničać suprać našaj dziaržavy. Kali my nie možam vydalić čałavieka, heta nie aznačaje, što treba apuskać ruki i pakidać jamu ŭsie mahčymaści dziejničać tut. Dziaržava nie biaśsilnaja — i nie moža być takoj», — napisaŭ ministr.

U 2023 hodzie Departamient mihracyi admoviŭ u vydačy prytułku Volzie Karač, pakolki jaje pryznali pahrozaj nacyjanalnaj biaśpiecy Litvy. Adnak tym ža rašeńniem joj prapanavali dazvoł na časovaje pražyvańnie ŭ krainie terminam na adzin hod z humanitarnych mierkavańniaŭ.

Žančyna, jakaja maje dazvoł na pražyvańnie ŭ Litvie sa studzienia 2014 hoda, u 2022 hodzie vyrašyła paprasić palityčnaha prytułku, kali adčuła, što biełaruski režym nibyta sprabuje zamachnucca na jaje žyćcio. Pavodle słoŭ Karač, dazvołu na časovaje pražyvańnie ŭ krainie niedastatkova, kab jana adčuvała siabie ŭ biaśpiecy jak u Litvie, tak i za miažoj.

Raniej u ŚMI taksama paviedamlałasia, što aktyvistka supracoŭničała z rasijskaj raźviedkaj. Sama V. Karač kateharyčna źniapraŭdziła hetuju infarmacyju, piša LRT.

Pavodle źviestak DDB, pryčyny, na padstavie jakich było pryniata rašeńnie ab tym, što V. Karač niasie pahrozu dziaržaŭnaj biaśpiecy, nie supadajuć z tymi, pra jakija jana zajaŭlała publična.

Jak paviedamlaje Departamient mihracyi, kali ŭ krainie pachodžańnia čałavieku pahražaje niebiaśpieka dla žyćcia, jaho nielha viartać u hetuju dziaržavu. Taki čałaviek pryznajecca ŭciekačom i atrymlivaje dazvoł na časovaje pražyvańnie ŭ krainie z humanitarnych mierkavańniaŭ.

• 18
• 0
• 5
• 5
• 3
• 0
• 0
• 0