Z-błohiercy Taćcianie Mancian dali 1,5 hoda kałonii. Jana zaklikała da hvałtu ŭ dačynieńni da «sacyjalnaj hrupy asob «achranota»
Taćciana Mancian rehularna źjaŭlajecca ŭ biełaruskich praŭładnych ŚMI.
Varašyłaŭski mižrajonny sud u akupavanym Daniecku pryhavaryŭ da hoda i šaści miesiacaŭ kałonii ahulnaha režymu 54‑hadovuju Z-błohierku i jurystku Taćcianu Mancian, abvinavačanuju pa artykule ab zaklikach da «ekstremizmu» (častka 2 artykuła 280 KK), piša «Miedyjazona».
Razam z realnym terminam sud taksama zabaraniŭ Mancian administravać sajty na praciahu dvuch hadoŭ. Dziaržabvinavačańnie patrabavała dla błohierki piać hadoŭ kałonii-pasialeńnia.
Sprava suprać Mancian była raspačata ŭ vieraśni 2025 hoda.
Padstavaj stała fraza «achranotu mačyć biez usialakaha škadavańnia», skazanaja padčas strymu ŭ śniežni 2022-ha.
U sprečkach prakurorka kazała, što, zhodna ź linhvistyčnaj ekśpiertyzaj, u hetych słovach znajšli «zaklik da ažyćciaŭleńnia hvałtoŭnych dziejańniaŭ u dačynieńni da hrupy asob, nazvanaj jak «achranota».
Dziaržabvinavaŭca taksama zhadaŭ vysnovy jašče adnoj kompleksnaj linhvistyčnaj i psichołaha-linhvistyčnaj ekśpiertyzy, zhodna ź jakimi ŭ frazie Mancian źjaŭlajecca «pabudžeńnie ŭ formie zakliku» da hvałtoŭnych dziejańniaŭ suprać «sacyjalnaj hrupy asob «achranota».
Sama Mancian i jaje prychilniki tłumačyli, što «achranotaj» jana nazyvała błohieraŭ, jakija zamoŭčvajuć prablemy na froncie ŭ vyhadu ŭłady, a «mačyć» aznačała banić botaŭ u kamientarach da tranślacyi.
«Najbolšaja hańba, što jany raspaŭsiudžvali — heta toje, što my kradziem danaty. Voś sutkami jany ŭsim raskazvali: voś jany kraduć ešałonami. Jany kraduć, jany nie adličvajucca. Ludzi im kažuć, pahladzicie, voś ža ŭ ich usie pabliki zabityja spravazdačami, — kazała Mancian. — [Ludzi kazali], što vy ad ich chočacie? Nie, takich ludziej [achranota] baniła. Voś u takoj pryblizna abstanoŭcy my viali ŭtroch hety strym, jaki mnie ciapier inkryminujecca».
Paśla zaviadzieńnia spravy suprać Mancian kiraŭnica «Lihi biaśpiečnaha internetu» Kaciaryna Mizulina pisała, što jaje arhanizacyja źviarnułasia ŭ MUS z-za taho, što «vialikaja kolkaść hramadzian» skardziłasia na «dyskredytacyju vojska» ŭ publikacyjach błohierki. Raniej Mancian taksama krytykavali prapahandyst Uładzimir Sałaŭjoŭ i supracoŭnik jaho kanała Barys Jakimienka. Pavodle ich słoŭ, jana krała hrošy, atrymanyja pry zborach dla rasijskich vajskoŭcaŭ.
Mancian naradziłasia ŭ Krymie i pracavała advakatkaj va Ukrainie. U 2015 hodzie jaje ŭnieśli ŭ bazu ŭkrainskaha sajta «Miratvorac» za jurydyčnuju dapamohu vajskoŭcam z samaabvieščanych DNR i ŁNR.
U 2023 hodzie va Ukrainie suprać Mancian zaviali kryminalnuju spravu ab zaklikach da zrynańnia kanstytucyjnaha ładu, zamachu na terytaryjalnuju cełasnaść krainy, kałabaracyjnuju dziejnaść i apraŭdańni rasijskaj ahresii suprać Ukrainy. Pryvidam stali jaje vystupy na rasijskich prapahandysckich kanałach i publikacyi ŭ sacyjalnych sietkach.
Pa infarmacyi SBU, Mancian pierajechała ŭ Rasiju ŭ 2021 hodzie. U studzieni 2023 hoda jana stała kałumnistkaj kanała «Śpiecyjalna dla RT». Pavodle słoŭ Mancian, za 13 miesiacaŭ pracy tam jana zarabiła 4,5 młn rubloŭ (siońnia 54 tys. dalaraŭ).
Taksama jana rehularna źjaŭlajecca ŭ biełaruskich praŭładnych ŚMI.
Pra zatrymańnie jana pisała tak: paśla reabilitacyi ŭ maskoŭskaj balnicy na jaje nalacieli ludzi ŭ bałakłavach, jakija siłaj usadzili jaje ŭ aŭtamabil i pryvieźli na kvateru dla vobšuku.
«Jany skazali, što my z navałačkaj na hałavie zaraz adviaziem u Danieck, pa darozie prykapajem. Kali nie adamknieš dźviery, my ich złamajem, i jany zastanucca adčynienymi. Ja zrazumieła, što ŭ mianie biezvychadnaje stanovišča, i adamknuła dźviery. Paśla hetaha jany mnie pakazali pastanovu ab vobšuku na padstavie taho, što ja zaklikała «mačyć achovu» na strymie», — aburałasia błohierka.
Pa razmovach siłavikoŭ joj padałosia, što tyja spadziavalisia znajści ŭ kvatery «zaležy hrošaj, zołata, bryljantaŭ» — naprykład, pastajanna prastukvali ścieny.
«Ja ŭžo prosta śmiajałasia, kažu, nu ŭ tuju ścianu pastukajcie, tam vy jašče nie pravieryli. Pilicie, Šura, pilicie, hiry załatyja», — zhadvaje Mancian.
Praź niekatory čas, pavodle słoŭ Z-błohierki, śledčy Bahdan Bandarčuk «pahražaŭ joj usimi strašnymi pakutami i kazaŭ, što daremna jana tak siabie pavodzić, što lepš by źmiryłasia i padparadkavałasia, tamu što ŭsio roŭna jaje zabje ŭ SIZA jakaja-niebudź narkamanka».
Vystupajučy ŭ sudzie ŭ apošni dzień, jana praciahnuła krytykavać svaich apanientaŭ u Z-śfiery: «Biezumoŭna, usie ŭkrainskija pamyjnicy zaraz kryčać ad ščaścia prosta. Voś što budzie z takimi zdradnikami, jak Mancian? Nu što, dahavaryłasia ŭ AAN? Dahavaryłasia na fiederalnych kanałach? Dahavaryłasia z kałonak va ŭsiakich ŚMI typu RT? Atrymaješ! Voś takoje z taboj učynili tvaje maskali, i tak tabie i treba. Ja paŭtarusia, chto heta zrabiŭ, ja nie razumieju, ale hetyja ludzi dakładna źjaŭlajucca vorahami Rasii i pieramohi joj nie žadajuć».
Jana pakul što zastajecca na svabodzie pad padpiskaj ab niavyjeździe da ŭstupleńnia prysudu ŭ siłu
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju88
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju8
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im1414
Kamientary