Pasiaredniki vyviedzieny z pracesu realizacyi jurydyčnym asobam ajčynnych i impartnych tavaraŭ.
Pasiaredniki vyviedzieny z pracesu realizacyi jurydyčnym asobam ajčynnych i impartnych tavaraŭ na terytoryi Biełarusi.
Heta praduhledžana pastanovaj Savieta ministraŭ № 991 «Ab niekatorych pytańniach nabyćcia tavaraŭ na terytoryi Respubliki Biełaruś» ad 28 lipienia. Tekst dakumienta raźmieščany na Nacyjanalnym pravavym interniet-partale Respubliki Biełaruś.
U adpaviednaści z pastanovaj jurydyčnyja asoby z hetaha času pavinny nabyvać tavary (za košt ułasnych, pazykovych srodkaŭ i srodkaŭ biudžetu) tolki ŭ tych pastaŭščykoŭ, jakija źjaŭlajucca vytvorcami, abo ŭ ich aficyjnych handlovych pradstaŭnikoŭ.
Pieraliki aficyjnych handlovych pradstaŭnikoŭ, u jakich jurasoby zmohuć zakuplać tavary, buduć zaćviardžacca respublikanskimi i miascovymi orhanami dziaržkiravańnia pa ŭzhadnieńni ź vice-premjerami, jakija kuryrujuć peŭnuju śfieru ekanomiki. Dla ŭklučeńnia ŭ pieralik aficyjnych handlovych pradstaŭnikoŭ nieabchodna pradstavić ekanamičnaje abhruntavańnie nabyćcia tavaraŭ u pastaŭščyka.
Pastanova pryniata «ŭ metach zabieśpiačeńnia efiektyŭnaha raschodavańnia hrašovych srodkaŭ i praviadzieńnia na terytoryi Respubliki Biełaruś adzinaj finansavaj palityki z ulikam upłyvu faktaraŭ suśvietnaha finansavaha i ekanamičnaha kryzisu».
Kiraŭnik arhkamiteta pa stvareńni Asacyjacyi małoha i siaredniaha pradprymalnictva Siarhiej Bałykin ličyć pastanovu «vielmi dziŭnym i niezrazumiełym dakumientam».
U svaim kamientary jon źviartaje ŭvahu na toje, što «dziaržava pa-raniejšamu ŭmiešvajecca ŭ haspadarčuju dziejnaść pryvatnych kamiercyjnych arhanizacyj».
«Z tekstu vynikaje, što dakumient raspaŭsiudžvaje svajo dziejańnie na ŭsie vidy jurydyčnych asob i nabyvaje moc z momantu jaho aficyjnaha apublikavańnia. Ale dzie tady śpis upaŭnavažanych pradstaŭnikoŭ?» — zaŭvažaje Bałykin.
Akramia taho, pavodle jaho słoŭ, «zusim niezrazumieła, ci raspaŭsiudžvaje hety narmatyŭny akt svajo dziejańnie tolki na zakupki pa tenderach abo na ŭsie ździełki kupli-prodažu».
«Pačakajem aficyjnych kamientaraŭ. Vielmi chaciełasia b pamylicca, ale jon całkam moža aznačać niejki novy vitok baraćby z pasrednikami. I kali heta tak — jak ža być z razmovaj pra libieralizacyju?» — zadaje pytańnie ekśpiert.
Kamientary