Prezident ZŠA Donald Tramp zrabiŭ šerah hučnych zajaŭ adnosna vajennaj apieracyi ŭ Iranie. U intervju amierykanskim ŚMI jon adnačasova pachvaliŭsia pośpiechami bambardzirovak, jakija, pavodle jaho słoŭ, «iduć z apiaredžańniem hrafika», i niečakana abviaściŭ ab svajoj zhodzie pačać pramyja pieramovy z pradstaŭnikami iranskaha režymu.
U telefonnaj razmovie z telekanałam CNBC Donald Tramp vykazaŭ poŭnaje zadavalnieńnie chodam vajennaj apieracyi.
«Heta vielmi žorstki režym, adzin z samych žorstkich u historyi, — skazaŭ Tramp. — My vykonvajem svaju pracu nie tolki dziela siabie, ale i dziela ŭsiaho śvietu. I ŭsio idzie z apiaredžańniem hrafika». Jon dadaŭ, što «ciapier padziei raźvivajucca vielmi pazityŭna».
Adnak litaralna adrazu paśla hetaha ŭ razmovie z žurnalistam vydańnia The Atlantic Majkłam Šereram amierykanski lidar abviaściŭ ab kardynalnaj źmienie taktyki.
«Jany chočuć pahavaryć, i ja pahadziŭsia pahavaryć, tak što ja budu havaryć ź imi. Im treba było zrabić heta raniej. Jany zanadta doŭha ciahnuli», — zajaviŭ Tramp u razmovie sa svajho kłuba Mar-a-Łaha.
Pry hetym prezident ZŠA daŭ zrazumieć, što vajennyja ŭdary nanieśli surjoznuju škodu kiraŭnictvu Irana. Kali žurnalist udakładniŭ, ci buduć u pieramovach udzielničać tyja ž asoby, što i raniej, Tramp adkazaŭ:
«Bolšaści z hetych ludziej bolš niama. Niekatoryja z tych, z kim my viali spravy, syšli, tamu što heta byŭ vialiki — heta byŭ vialiki ŭdar, — skazaŭ jon. — Im treba było zrabić heta raniej, Majkł. Jany mahli zaklučyć ździełku. Jany pasprabavali zhulać zanadta chitra».
Na pytańnie, ci praciahnucca amierykanskija bambardziroŭki, kali ŭ Iranie pačniecca narodnaje paŭstańnie suprać režymu, Tramp nie daŭ dakładnaha adkazu, zachavaŭšy intryhu.
«Mnie treba budzie hladzieć na situacyju ŭ toj momant, kali heta adbudziecca, Majkł. Na hetaje pytańnie nielha dać adkaz zahadzia», — adznačyŭ jon.
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny23
Kamientary