Try hady chatniaj chimii za siem litar. Minčanku asudzili za abrazu byłoha milicyjanta
U sudzie Hancavickaha rajona 29 sakavika adbyŭsia razhlad kryminalnaj spravy ŭ dačynieńni da žycharki Minska Iryny Staškievič. Jaje abvinavacili ŭ abrazie pradstaŭnika ŭłady (art. 369 KK). Paciarpiełym pa spravie akazaŭsia były milicyjanier Vital Kulašoŭ.
Sudovy praces vioŭ sudździa Uładzimir Kosmač, paviedamlajuć pravaabaroncy.
U vinu Irynie Staškievič staviłasia toje, što 21 kastryčnika 2020 hoda pad zdymkam Kulašova ŭ adnym z telehram-kanałaŭ jana napisała kamientaryj u try słovy: «Nu i roža».
Padčas śledstva pravodziłasia linhvistyčnaja ekśpiertyza słova «roža». Vyniki byli ahučanyja na sudovym pasiadžeńni.
Sam paciarpieły Kulašoŭ na sudovy praces nie źjaviŭsia «z pryčyny chvaroby i dalokaści pražyvańnia». Jon taksma zajaviŭ isk ab materyjalnaj kampiensacyi 1000 rubloŭ.
«Hetaja abraza vyklikała ŭ mianie pieražyvańni, u vyniku čaho ŭ mianie padniaŭsia cisk, mnie było vielmi niekamfortna pierad padnačalenymi, što ŭ ich taki kiraŭnik, i ja nie moh naležnym čynam vykanać svaje słužbovyja abaviazki», — rastłumačyŭ Kulašoŭ u svaim liście-chadajnictvie ab praviadzieńni sudovaha pasiadžeńnia ŭ jahonuju adsutnaść.
U vyniku sud pryznaŭ Irynu Staškievič vinavataj i asudziŭ jaje da troch hadoŭ abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»). Mienavita stolki prasiŭ i dziaržabvinavaŭca.
Svaju vinu ŭ złačynstvie, źviazanym z abrazaj pradstaŭnika ŭłady, Iryna Staškievič pryznała. Adnak u svaim apošnim słovie jana zapytvała:
«Za što try hady? Ja maci-adzinočka…».
Heta ŭžo treci sud nad Irynaj Staškievič. U pieršych dvuch vypadkach jana taksama była asudžanaja da chatniaj chimii za abraźlivyja kamientaryi ŭ dačynieńni da milicyjantaŭ.
Vital Kulašoŭ byŭ načalnikam Hancavickaha RUUS da žniŭnia 2020 hoda, paśla jaho źniali z pasady, jon staŭ kiraŭnikom sielskahaspadarčaha pradpryjemstva.
U kastryčniku 2021 hoda stała viadoma, što Kulašova nakiravali ŭ RNPC psichičnaha zdaroŭja, što ŭ Navinkach, mierkavana, z pryčyny sproby suicydu, ale dakładnaj infarmacyi nie było.
Na momant, kali Iryna Staškievič napisała toj samy kamientaryj, Kulašoŭ pradstaŭnikom ułady ŭžo nie źjaŭlaŭsia.
Mienavita Kulašoŭ kiravaŭ 20 červienia 2020 hoda ŭ Hancavičach brutalnym zatrymańniem udzielnikaŭ «Łancuha salidarnaści» (padčas jakoha hałavu adnaho pratestoŭca milicyjanty prycisnuli kalenam da asfalta, i niekalki čałaviek, u tym liku dvuch žurnalistaŭ miascovaha vydańnia «Hancavicki čas», zatrymali).
Zatrymanych udzielnikaŭ akcyi asudzili pavodle administracyjnych spraŭ. Praces nad imi vioŭ toj ža sudździa, jaki ciapier sudziŭ Irynu Staškievič, — Uładzimir Kosmač. Paśla jon syšoŭ z pasady staršyni Hancavickaha suda «pavodle ułasnaha žadańnia», adnak sudździom Hancavickaha suda zastaŭsia.
-
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak
-
Paviedamleńnie, što na fest u Budsłavie pryjazdžaŭ mitrapalit Vienijamin, było pamyłkovym
-
Na Sož spuścili «Pasiejdona». U Homieli stvaryli sučasny ciepłachod z soniečnymi panelami i pieršym u Biełarusi vadamiotnym ruchačom
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak6
Kamientary