New York Times: Spadarožnikavyja zdymki całkam abviarhajuć viersiju Rasii, što zabojstvy ŭ Bučy adbyvalisia paśla sychodu jaje vojskaŭ
Analiz spadarožnikavych zdymkaŭ abviarhaje śćviardžeńni Rasii ab tym, što zabojstvy mirnych žycharoŭ u Bučy adbylisia paśla taho, jak jaje sałdaty pakinuli horad, piša The New York Times.
Kali ŭ vychodnyja źjavilisia vyjavy ciełaŭ zabitych mirnych žycharoŭ, jakija lažać na vulicach Bučy — u niekatorych byli źviazanyja ruki, u niekatorych ahniastrelnyja ranieńni ŭ hałavu, — Ministerstva abarony Rasii admaŭlała svaju adkaznaść.
U paviedamleńni Telegram u niadzielu Ministerstva vykazała zdahadku, što cieły byli niadaŭna vykinutyja na vulicy paśla taho, jak «usie rasijskija padraździaleńni całkam vyjšli z Bučy» kala 30 sakavika. Rasija zajaviła, što vyjavy byli «čarhovym fejkam» i zaklikała da ekstranaha sklikańnia Rady Biaśpieki AAN.
Ale ahlad videazapisaŭ i spadarožnikavych zdymkaŭ pakazvaje, što mnohija cyvilnyja asoby byli zabityja bolš za try tydni tamu, kali rasijskija vajskoŭcy kantralavali horad. Na adnym videa, źniatym členam miascovaj rady 2 krasavika, vidać mnostva ciełaŭ, raskidanych pa vulicy Jabłonskaj u Bučy.
Spadarožnikavyja zdymki, dadzienyja NYT kampanijaj Maxar Tecnology, pakazvajuć, što pa mienšaj miery 11 ź ich byli na vulicy z 11 sakavika, kali Rasija, pa jaje ŭłasnym pryznańni, akupavała horad.
Kab paćvierdzić, kali źjavilisia cieły i kali achviary, vierahodna, byli zabityja, vizualnaja śledčaja hrupa NYT praviała analiz spadarožnikavych zdymkaŭ da i paśla. Na zdymkach bačnyja ciomnyja abjekty pamieram z čałaviečaje cieła, jakija źjavilisia na vulicy Jabłonskaj u pieryjad z 9 pa 11 sakavika.
Abjekty źjaŭlajucca ŭ dakładna tym stanoviščy, u jakim byli vyjaŭlenyja cieły paśla taho, jak ukrainskija vojski adbili Buču, pavodle kadraŭ ad 2 krasavika. Dalejšy analiz pakazvaje, što abjekty zastavalisia ŭ takim stanoviščy bolš za try tydni. Pryčyny śmierci niajasnyja.
Niekatoryja cieły byli pobač z tym, što, vidać, źjaŭlajecca varonkaj ad bomby. Inšyja — kala kinutych mašyn. Try cieły lažali pobač z rovarami. U niekatorych ruki źviazanyja za śpinoj biełaj tkaninaj. Achviary byli raskidanyja bolš čym na paŭmili pa vulicy Jabłonskaj.
Na druhim videa, źniatym na vulicy Jabłonskaj, bačnyja jašče try cieły. Adno lažyć pobač z rovaram, jašče adno kala kinutaj mašyny. Spadarožnikavyja zdymki pakazvajuć, što kinutyja aŭtamabili i bližejšyja cieły źjaŭlajucca ŭ pieryjad z 20 pa 21 sakavika.
Heta tolki niekatoryja z achviaraŭ siarod cyvilnaha nasielnictva, vyjaŭlenych z suboty. The Associated Press apublikavała fatahrafii pa mienšaj miery šaści miortvych mužčyn, jakija lažać razam u zadniaj častcy ofisnaha budynka, u niekatorych ruki byli źviazanyja za śpinoj.
Budynak znachodzicca ŭ mili na zachad ad inšych achviaraŭ, znojdzienych na vulicy Jabłonskaj. Jašče za milu dalej fatohraf z NYT vyjaviŭ cieła mužčyny z ahniastrelnym ranieńniem u hałavu, jon lažaŭ pobač z rovaram.
Kamientary