Birža Prakapieni zabaraniła rasiejcam handlavać akcyjami i kryptavalutami
Kryptabirža Currency.com prypyniaje apieracyi dla rezidentaŭ Rasii. Stvareńnie novych akaŭntaŭ dla rasiejcaŭ było zabłakavana jašče z pačatku vajny.
Prypynieńnie apieracyj budzie paetapnym. Na vyvad fijatnych srodkaŭ i kryptavalut abmiežavańni nie paŭpłyvajuć — klijentam budzie akazana nieabchodnaja dapamoha, vyvieści srodki jany zmohuć u luby čas.
«Rasijskaje ŭvarvańnie va Ukrainu stała dla naroda Ukrainy žorstkim i trahičnym. My kateharyčna asudžajem rasijskuju ahresiju. My padtrymlivajem Ukrainu i ŭsich, chto vystupaje suprać hetaj žudasnaj vajny. Na žal, pry takich abstavinach my nie možam praciahvać absłuhoŭvać našych rasijskich klijentaŭ. My pakłapocimsia pra toje, kab jany atrymali nieabchodnuju padtrymku ad našych śpiecyjalistaŭ dla vyvadu aktyvaŭ i vyrašeńnia pytańniaŭ, jakija ŭźnikajuć u vyniku prypynieńnia apieracyj», — skazaŭ Vital Kiedyk, kiraŭnik stratehii Currency.com.
Dadzienaje rašeńnie nie zakranie klijentaŭ ź inšych krain i rehijonaŭ, a taksama nie adabjecca na hłabalnych apieracyjach i ŭstojlivaści pracy sistem kryptobirži. Kampanija ŭ zvyčajnym režymie praciahnie absłuhoŭvać hłabalnuju klijenckuju bazu praz svaju mižnarodnuju sietku, jakaja ŭklučaje ofisy ŭ Łondanie, Ńju-Jorku, Hibrałtary i Vilni.
Z pačatku vajny Currency.com achviaravała bolš za $ 1 młn na padtrymku humanitarnaha kryzisu va Ukrainie. $500 tys. byli vydatkavanyja Ministerstvu achovy zdaroŭja i Čyrvonamu Kryžu Ukrainy — srodki pojduć na miedycynskuju dapamohu i pradmiety pieršaj nieabchodnaści biežancam z hetaj krainy. $200 tys. byli achviaravanyja ASAP Rescue — ukrainskaj vałanciorskaj arhanizacyi, jakaja dapamahaje evakujavać hramadzian padčas stychijnych biedstvaŭ i sacyjalnych biesparadkaŭ. Jašče $300 tys. adpraŭlenyja Ministerstvu sacyjalnaj palityki i dabračynnaj arhanizacyi Global Giving — jany dapamahajuć atrymać dostup da takich asnoŭnych patreb, jak ježa, žyllo i miedycynskaja dapamoha.
Currency.com — adna z samych chutkarosłych płatformaŭ abmienu kryptavalutami ŭ Jeŭropie. U 2021 hodzie kampanija paviedamiła pra rost svajoj klijenckaj bazy na 343%.
Kamientary