Ukranski vajskoviec, jakomu na žyvacie vyrazali słovy «Słava Rasii», raskazaŭ pra pieražytyja pakuty

Tym vajskoŭcam akazaŭsia bajec 79-j asobnaj desantna-šturmavoj bryhady USU Andrej Pieravierzieŭ. U intervju YouTube-kanału United24 mužčyna raskazaŭ svaju historyju. Jaho niekalki razoŭ katavali, a nadpis miedycynskim pajalnikam vypaliła chirurh balnicy ŭ Daniecku, piša «Ahienstvo».

Pieravierzieva ŭziali ŭ pałon paśla taho, jak pobač ź im vybuchnuła hranata, 24 lutaha 2024 hoda. Pavodle adkrytych krynic, u hety momant padraździaleńnie Pieravierzieva ŭdzielničała ŭ bajach za Novamichajłaŭku, jakija praciahvalisia z kanca vosieni 2023 hoda da kanca krasavika 2024-ha. Pry šturmie Novamichajłaŭki Rasija, pavodle acenak vajskovych analitykaŭ, mahła stracić bolš za 300 adzinak vajskovaj techniki.

Pieravierzieŭ prasiŭ rasijskich vajskoŭcaŭ, jakija znajšli jaho, «prykončyć» jaho, ale mužčynu daciahnuli da rasijskich pazicyj. Tam jaho ahledzieli, a taksama niekalki razoŭ udaryli piacilitrovaj kanistraj vady pa hałavie. Sa słoŭ vajskoŭca, rasiejcy jaho takim čynam «pavitali», kab «nie zabyvaŭ, dzie jon apynuŭsia».

Paźniej Pieravierzieva dapytali z užyvańniem katavańniaŭ — jaho bili tokam pa adkrytych ranach. Heta praciahvałasia da ranicy nastupnaha dnia. Tolki paśla hetaha mužčynu adpravili ŭ špital, dzie praapieryravali. Pa słovach vajskoŭca, jamu paviedamili, što jaho mačavy puzyr, močapuskalny kanał i pramuju kišku razarvała ad vybuchu, častku pramoj kiški jamu vydalili.

Paśla apieracyi Pieravierzieva pieraviali ŭ «špital №15» (vierahodna, majecca na ŭvazie Danieckaja haradskaja balnica №15). Tam u pałacie vajennapałonny ŭpieršyniu ŭbačyŭ vypaleny na žyvacie nadpis «Słava Rasii»: «Ja pahladzieŭ i achnuŭ. (…) Ja skazaŭ: «Vy ŭsie padonki. Ja zastrelu vas usich»».

Pavialičyć

Pieravierzieŭ ličyć, što nadpis na žyvacie jamu vypaliŭ chirurh z dapamohaj, vierahodna, miedycynskaha pajalnika.

Paźniej Pieravierzievu daviałosia prajści praź jašče adny katavańni ŭ špitali, jakija, na jaho dumku, byli «dla zabavy». Jon raskazaŭ, što pa jaho pryjšli mužčyny ŭ bałakłavach, ni adzin ź jakich nie pradstaviŭsia. Vajennapałonnaha adviali ŭ pakoj, dzie adzin mužčyna drukavaŭ na noŭtbuku, a druhi katavaŭ Pieravierzieva. Ź jahonych słoŭ, bili ŭ vobłaść vušej, pa patylicy i vykarystoŭvali elektrašokier.

«Jany spytali, kudy ja paranieny, ja skazaŭ: «U nahu». Jany stali bić elektrašokieram u nahu», — skazaŭ Pieravierzieŭ, pakazvajučy ślady ad udaraŭ.

Inšaje katavańnie było ŭ tym, što jamu mocna cierli ručnikom tvar u rajonie barady, z-za čaho skura pačała abłazić. Katavańni praciahvalisia 40 chvilin. Pa słovach Pieravierzieva, inšych pałonnych u špitali taksama katavali.

Paśla taho, jak Pieravierzieŭ staŭ na nohi, jaho adpravili z Daniecka ŭ kałoniju ŭ horadzie Čyściakova (pierajmienavany ŭkrainski Tarez). U dzień pryjezdu ŭ kałoniju vajennapałonnych praviali praz šerah achoŭnikaŭ z dubinkami. Achoŭniki bili dubinkami, kali čałaviek pavolna išoŭ, raspavioŭ Pieravierzieŭ. Pavodle jaho, dubinki ŭžyli da inšaha pałonnaha, u jakoha byli ranieńni noh. Mužčynu bili, pakul jon nie ŭpaŭ.

Adzin-dva ŭdary atrymali i inšyja źniavolenyja. Pieravierzieŭ kaža, što da ich pryjezdu ŭ kałoniju pryjom vajennapałonnych byŭ jašče bolš žorstki: vajennapałonnych sustrakali nie achoŭniki kałonii, a śpiecnaz, jaki ŭsich źbivaŭ.

Pieravierzieŭ byŭ vyzvaleny ŭ chodzie abmienu ŭ kancy traŭnia. Pa słovach vajennaha USU, 22 maja jaho i inšych ukrainskich vajennapałonnych pryvieźli ŭ Rastoŭ-na-Donie, adkul samalotami dastavili ŭ rajon abmienu. Va Ukrainu Pieravierzieŭ viarnuŭsia 24 traŭnia, śviedčyć fota, apublikavanaje ŭpaŭnavažanym pa pravach čałavieka va Ukrainie Dźmitryjem Łubincom.

Pavialičyć

Pieravierzieŭ zajaviŭ pra žadańnie viarnucca na front, kali jamu dazvolać daktary.

• 1
• 0
• 0
• 1
• 7
• 5
• 11
• 0