Idealny finał. Pahladzieli treci siezon «Hulni ŭ kalmara»

Zakinuty vostraŭ u Paŭdniovaj Karei i 456 nieznajomcaŭ, zbolšaha z šalonymi daŭhami. Jany pryjechali tudy, kab paŭdzielničać u tajamničych hulniach i zarabić sabie na vyrašeńnie ŭsich prablem, ale akazalisia ŭ sistemie, adkul žyvym vyjdzie nie kožny.

Treci siezon «Hulni ŭ kalmara» ŭ apošni raz viartaje nas u hety śviet. Jak i raniej, naš hałoŭny pravadyr — Son Ki Chun, pieramožca adnaho ź siezonaŭ hulni, jaki ŭ druhim siezonie vyrašyŭ złamać sistemu znutry i dla hetaha viarnuŭsia na vostraŭ. Jon znoŭ atrymlivaje apošni numar u hulni i viartajecca ŭ jaje jak hulec 456, apošniaje źviano ŭ charčovym łancužku kapitalizmu. Mienavita hetuju sistemu ŭvasablaje hulnia ŭ kalmara, dzie daviedzienyja da adčaju ludzi hatovyja na ŭsio.

Druhi siezon vyjšaŭ u śniežni 2024-ha. Šmat kamu jon padaŭsia abarvanym. Ki Chun narešcie natchniaje kaleh pa hulni na sprobu paŭstańnia, i ŭ kancy druhoha siezona my pakidajem hulcoŭ u toj napružany momant. 

Pavialičyć

Chepi-enda nie zdaryłasia, i Ki Chun viartajecca ŭ hulniu. Ciapier jon — tolki cień siabie minułaha, apantanaha nadziejaj vajara, jaki žadaje parušyć sistemu. Na miesca nadziei pryjšła vina za žyćci ludziej, jakija pajšli za im, i šmat sumnievaŭ: ci maje jon prava znoŭ natchniać na supraciŭ, kali heta vyklikaje tolki novy bol?

Pakul hulec 456 šukaje novyja apory, nam raskryvajuć inšych hulcoŭ. Naprykład, heta hulcy 149 i 007, to-bok pažyłaja karejanka Čan Hym Dža i jaje syn Pak Jon Sik. Žančyna ŭdzielničaje ŭ hulni, kab pakryć daŭhi svajho syna-hulniamana, i sustrakaje ŭ hulniavych pamiaškańniach samoha Jon Sika — chłopiec taksama pryjšoŭ tudy, kab zarabić i vyrašyć svaje prablemy. Vobraz Hym Dža vielmi mocny, jana atačaje kłopatam nie tolki syna-niebaraku, ale i inšych hulcoŭ, i, adna ź niešmatlikich, trymajecca dabra ŭ luboj situacyi. 

U prajekt viarnuli VIP-haściej — bahatych zamiežnikaŭ, jakija pryjazdžajuć na vostraŭ, kab nazirać za hulnioj, rabić staŭki i dzie-nidzie prymać u joj udzieł. I kali sama «Hulnia ŭ kalmara» — heta žorstkaja satyra na kapitalizm, to VIP-hości — napamin, što jość tyja, kamu vyhadnaja ŭsia hetaja sistema. Praz toje, što jany źjavilisia, u trecim siezonie trochi mienš fizičnaha hvałtu. Jaho zamianiajuć razvahi VIP-haściej, jakija nie razumiejuć pryncypy «adkidaŭ hramadstva», jak jany nazyvajuć udzielnikaŭ hulni, i vyśmiejvajuć ich.

Pavialičyć

Pavialičyć

Sieryjał i ŭ detalach nie zhubiŭ svajoj śmiełaj ironii — naprykład, tam śmiajucca ź idei spraviadlivaha i demakratyčnaha hałasavańnia, jakoje byccam by daje hierojam mahčymaść vyjści z hulni. Tut i pra palityku dy svabodnuju volu, i pra toje, ci moža čałaviek pa svajoj voli syści ź sistemy kapitalizmu. Stvaralniki sieryjała adkazvajuć na hetaje pytańnie admoŭna.

Inšaja novaja ideja — toje, što ciapier u hulni — a značyć, i ŭ sistemie — možna ŭdzielničać ź pieršych chvilin žyćcia, kali anijaki śviadomy vybar zrabić niemahčyma. Tak «Hulnia ŭ kalmara» źniščaje apošnija iluzii pra svabodu vybaru.

Jak i raniej, sieryjał umieła bałansuje pamiž sacyjalnaj prablematykaj, žorstkaściu i dramaj, i z aptekarskaj dakładnaściu vymiaraje, kolki i čaho patrebna dla efiektyŭnaha vyniku. Treci siezon nie pašyraje suśviet «Hulni ŭ kalmara», a tolki stavić kropku pad usioj historyjaj.

I heta nie toje zakančeńnie, na jakoje spadziavalisia fanaty. Ale jano nie rasčaroŭvaje, i vodhuki heta paćviardžajuć: naprykład, na płatformie Rotten Tomatoes treci siezon maje prystojny rejtynh 90%, pry tym što druhi siezon atrymaŭ na toj ža płatformie rejtynh 85%.

Stvaralnik sieryjała Chvan Don Chiok abiacaŭ, što chepi-enda nie budzie, ale ź im možna paspračacca. «Hulnia ŭ kalmara» davodzić da zakančeńnia linii ŭsich piersanažaŭ, i ŭ kancy razumieješ — inakš i być nie mahło, i naŭrad ci hieroi, kali b im dali vybar, abrali b inšy šlach.

I navat niečakany hość u apošnija chviliny sieryjała, zdajecca, tut da miesca. Saha atrymała idealnaje zakančeńnie — chacia ci kaniec heta?

• 2
• 1
• 0
• 2
• 0
• 0
• 0
• 0