Patryjarch Kirył u zvarocie da biełaruskaha naroda havaryŭ pra «prastory Rusi» i «ŭskrainnyja ziemli»
Padčas siońniašniaha vizitu ŭ Połack kiraŭnik Ruskaj pravasłaŭnaj carkvy pravioŭ liturhiju, padčas jakoj źviarnuŭsia da biełaruskaha naroda.
«Heta nie tolki śviata hetaj ziamli, adnoj z samych pieršych, što pryniali chryścijanstva na prastorach Rusi, ale heta śviata ŭsiaja Rusi. Mienavita tamu ja siońnia z vami. Tamu što sapraŭdy pryniaćcie chryścijanstva tut, u hetym miescy, pasłužyła vielmi mocnym šturškom da raspaŭsiudžvańnia viery Chrystovaj va ŭsich uskrainnych ziemlach.
I siońnia pravasłaŭnaja carkva źjaŭlajecca duchoŭnym apiryščam i Rasii, i Biełarusi, i Ukrainy — usich našych braterskich słavianskich krain», — skazaŭ patryjarch na ŭračystaj malitvie ŭ Spasa-Jeŭfrasińnieŭskim manastyry, pieradaje ANT.
Vizit kiraŭnika Ruskaj pravasłaŭnaj carkvy ŭ Biełaruś prymierkavany da 1030-hodździa pryniaćcia chryścijanstva na biełaruskich ziemlach.
Učora padčas naviedvańnia minskaha chrama Miefodzija i Kiryła patryjarch zajaviŭ:
«Kranuty, što na biełaruskaj ziamli, u centry horada Minska, stvorany hety chram i padvorak, dzie moža spyniacca patryjarch. Nie dumaju, što ja budu časta stamlać vas svaimi vizitami, ale sam fakt isnavańnia hetaha padvorka maje vialikaje duchoŭnaje i simvaličnaje značeńnie. Tamu što praz hety chram, praz hetaje miesca bačnym čynam demanstrujecca naša adzinstva, adzinstva Śviatoj Rusi.
Toje samaje adzinstva, dziakujučy jakomu sfarmavałasia psichałohija ruskaha čałavieka. Kali ja kažu «ruski», to maju na ŭvazie i biełarusaŭ, ukraincaŭ, usich tych, chto vyjšaŭ z Kijeŭskaj kupieli chryščeńnia.
Bolš za toje, praz hetaje adzinstva farmavałasia sistema kaštoŭnaściaŭ, jakaja spryjała tamu, što narod naš, histaryčna adziny narod, apynuŭsia zdolnym pieraadolvać vielizarnyja histaryčnyja vyprabavańni», — pieradaje jaho słovy sajt BPC.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki21
Kamientary