Blinkien źbirajecca pahavaryć z Łaŭrovym — upieršyniu z pačatku vajny
Dziaržaŭny sakratar ZŠA Entani Blinkien u sieradu zajaviŭ, što maje namier najbližejšym časam pahavaryć z kiraŭnikom MZS Rasii Siarhiejem Łaŭrovym. Heta adbudziecca ŭpieršyniu z pačatku poŭnamaštabnaha ŭvarvańnia Rasii va Ukrainu. Pra heta paviedamlaje CNN.
Pa słovach Blinkiena, jon płanuje abmierkavać z Łaŭrovym «važnuju prapanovu», zroblenuju amierykanskim bokam niekalki tydniaŭ tamu. Jana tyčycca vyzvaleńnia dvuch niezakonna zatrymanych u Rasii hramadzian ZŠA — Poła Uiłana i baskietbalistki Brytni Hrejnier.
Uiłana z 2018 hoda trymajuć u rasijskim SIZA pavodle abvinavačvańnia ŭ špijanažy, a Hrejnier zatrymali ŭ lutym hetaha hoda za nibyta niezakonny ŭvoz narkotykaŭ: havorka idzie pra kanabioidny alej, jaki spartoŭka nabyła ŭ ZŠA pa receptu.
Dziaržsakratar nie ŭdakładniŭ, pra što pojdzie havorka, ale, pavodle źviestak krynic CNN, prezident Džo Bajden padtrymaŭ ideju abmianiać Uiłana i Hrejnier na asudžanaha ŭ ZŠA rasijskaha handlara zbrojaj Viktara Buta.
Akramia taho, Blinkien choča abmierkavać z Łaŭrovym niadaŭna padpisanaje pahadnieńnie ab razbłakavańni ekspartu ŭkrainskaha zbožža Čornym moram. Pry hetym kiraŭnik amierykanskaj dypłamatyi padkreśliŭ, što «abmierkavańnia Ukrainy biez Ukrainy» z Łaŭrovym nie budzie.
Apošni raz dziaržaŭny sakratar ZŠA i ministr zamiežnych spraŭ Rasii viali telefonnyja pieramovy 12 lutaha, za dva tydni da poŭnamaštabnaha rasijskaha nastupleńnia na Ukrainu. U Dziarždepie tady paviedamili, što Blinkien vykazaŭ Łaŭrovu aściarohi ZŠA z nahody taho, što Rasija moža pačać novuju ŭzbrojenuju ahresiju suprać Ukrainy ŭ najbližejšyja dni.
Kamientary