Tramp upieršyniu ŭvioŭ pošliny suprać Rasii. Pačałasia druhaja handlovaja vajna z usim śvietam?
Ź piatnicy ZŠA ŭviali pošliny pamieram 10—12,5% na impart tavaraŭ z 60 krain śvietu. Upieršyniu za čas taryfnych vojnaŭ druhoha prezidenckaha terminu Trampa pad ich trapiła i Rasija, piša Bi-bi-si.
Novyja taryfy pryjšli na źmienu časovym starym, a tyja, u svaju čarhu, zamianili pieršapačatkovyja pošliny ŭ adkaz Trampa, jakija byli skasavanyja Viarchoŭnym sudom. Pra ich jon ź vialikaj uračystaściu abviaściŭ jak pra «Dzień vyzvaleńnia Amieryki» paśla viartańnia ŭ Bieły dom viasnoj minułaha hoda.
Bolšaść tych taryfaŭ Tramp u vyniku źniziŭ abo admianiŭ, bo miery ŭ adkaz pryniali nie tolki hałoŭny supiernik ZŠA — Kitaj, ale i sajuźniki — Kanada, Jeŭropa i Mieksika.
Paźniej vyśvietliłasia, što jon uvohule nie mieŭ prava ŭvodzić hetyja myty. Amierykanskija sudy, uklučajučy Viarchoŭny sud, pryznali, što Tramp pieravysiŭ svaje paŭnamoctvy. Pavodle zakanadaŭstva ZŠA prava ŭvodzić padatki naležyć tolki Kanhresu, a impartnaje myta faktyčna źjaŭlajecca padatkam dla amierykanskich pakupnikoŭ zamiežnych tavaraŭ.
Paśla parazy ŭ sudach Tramp nieadkładna ŭvioŭ 10‑pracentnaje myta na ŭvieś impart, spasłaŭšysia na nadzvyčajnuju situacyju z płaciežnym bałansam. Zakonnych padstaŭ dla takoha kroku nie prahladałasia, tamu suprać Biełaha doma adrazu padali pazovy. Adnak Trampa heta nie chvalavała: pavodle zakona takija taryfy možna ŭvodzić tolki na 150 dzion, a sudovyja razhlady zajmajuć značna bolš času.
24 lipienia termin dziejańnia hetych mier skončyŭsia. I Tramp uvioŭ novyja — ciapier užo pad padstavaj abarony pracoŭnych va ŭsim śviecie.
Rasija ŭpieršyniu trapiła ŭ śpis
Amierykanskaje zakanadaŭstva dazvalaje abmiažoŭvać handal z krainami, jakija, na dumku ZŠA, niedastatkova aktyŭna zmahajucca z rabstvam i prymusovaj pracaj.
Pa daručeńni Trampa było praviedziena rasśledavańnie, paśla čaho čynoŭniki prapanavali ŭvieści 12, 5‑pracentnaja pošlina ŭ adnosinach da krain, dzie faktyčna adsutničajuć zakony suprać prymusovaj pracy.
Rasija trapiła mienavita ŭ hetuju katehoryju. U pieršapačatkovym śpisie taryfaŭ «Dnia vyzvaleńnia» jaje nie było, chacia tudy ŭvajšli navat niezasielenyja astravy kala Antarktydy, dzie žyvuć tolki pinhviny. Tady Bieły dom tłumačyŭ heta tym, što pamiž ZŠA i Rasijaj niama istotnaha tavaraabarotu praz užo dziejučyja sankcyi, uviedzienyja paśla ŭvarvańnia va Ukrainu i pieraśledu apazicyi. U toj ža katehoryi znachodzilisia Biełaruś, Kuba i Paŭnočnaja Kareja.
Ciapier Rasija ŭsio ž uklučana ŭ śpis, choć i z ahulnymi dla ŭsich vyklučeńniami.
Pieralik hetych vyklučeńniaŭ zaniaŭ 55 staronak. Pakolki Tramp pastajanna zaklučaje, skasoŭvaje i pierahladaje handlovyja pahadnieńni, na adny myty nakładvajucca inšyja, i da kožnaha novaha ŭkaza davodzicca rychtavać dadatkovyja śpisy vyklučeńniaŭ.
Ekanamisty adznačajuć, što asnoŭny ciažar taryfaŭ kładziecca na amierykanskich spažyŭcoŭ i biźnies, pakolki jany pavyšajuć košt tavaraŭ i kamplektujučych. Zamiest abiacanaha adradžeńnia amierykanskaj pramysłovaści i ŭmacavańnia aŭtarytetu ZŠA ŭ śviecie taryfnyja vojny, na ich dumku, pryviali da skaračeńnia zaniataści ŭ pramysłovaści, paharšeńnia adnosin z sajuźnikami i źnižeńnia mižnarodnaha aŭtarytetu krainy.
Na kožny novy etap taryfnaj vajny śviet reahuje ŭsio bolš strymana.
Na hety raz reakcyja prahučała amal adrazu, bo ŭsie byli hatovyja: paśla rašeńnia amierykanskaha suda Tramp užo nie moža ŭvodzić taryfy raptoŭna praz paviedamleńni ŭ sacyjalnych sietkach i ciapier dziejničaje praz praciahłuju zakonnuju praceduru.
Kitaj znoŭ zajaviŭ, što vystupaje suprać adnabakovych taryfaŭ i padtrymlivaje svabodny handal. Francyja čarhovy raz paabiacała adstojvać svaje intaresy i nie iści na sastupki. A hałoŭnyja sajuźniki ZŠA — Vialikabrytanija — padziakavali Trampu za pryznańnie ich zasłuh u baraćbie z prymusovaj pracaj i za abnuleńnie myta na viski.
Kamientary