Finskaja hrupa kampanij Olvi vystupiła z zajavaj, što naŭrad ci pradaść svoj biełaruski aktyŭ — «Lidskaje piva» — u ahladnaj budučyni praź źmieny ŭ biełaruskim zakanadaŭstvie.
«U suviazi z uniasieńniem šerahu źmienaŭ u zakanadaŭstva Respubliki Biełaruś, jakija rehulujuć paradak prodažu aktyvaŭ zamiežnych kampanij na terytoryi Biełarusi, było pryniata rašeńnie ab tym, što prodaž AAT «Lidskaje piva», aktyvu Olvi ŭ Biełarusi, naŭrad ci adbudziecca ŭ najbližejšyja 12 miesiacaŭ», — havorycca ŭ paviedamleńni kampanii.
Tam rastłumačyli, što, zychodziačy ź finansavych standartaŭ hrupy, «Lidskaje piva» bolš nie moža być uklučana ŭ śpis aktyvaŭ, pryznačanych dla prodažu, i znoŭ uklučana ŭ kansalidavanuju spravazdačnaść kampanii.
Da hetaha ŭ pačatku sakavika rada dyrektaraŭ Olvi Group pryniała rašeńnie pakinuć biełaruski rynak. U žniŭni kampanija zajaviła, što na praciahu hoda maje namier pradać svajo AAT «Lidskaje piva».
Adnak 11 listapada padčas pracoŭnaj pajezdki ŭ Tałačynski rajon Alaksandr Łukašenka zajaviŭ, što majomaść zamiežnych inviestaraŭ, jakija pakidajuć Biełaruś, moža być nacyjanalizavanaja. Jon dadaŭ, što nie choča nazyvać kankretnuju kampaniju, ale jamu «jany ŭžo sihnalizujuć, što adnyja ŭciakli, finy».
«Mis Biełaruś» usio bolš nahadvaje konkurs pryhažości ŭ haremie23
Kamientary