Udzielniki «Jeŭrabačańnia» ad Biełarusi znajšlisia na Vaładarcy

Pavodle papiaredniaj infarmacyi pravaabaroncaŭ, Dźmitryju i Uładzimiru Karakinym inkryminavany art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak).

Nahadajem, pra ich zatrymańnie łukašysckija telehram-kanały napisali 13 kastryčnika — pavodle ich, braty «ŭdzielničali ŭ niezakonnych maršach ź pierakryćciem daroh, zaklikali i ahitavali ŭ sacyjalnych sietkach, supracoŭničali z ekstremisckimi arhanizacyjami».

Kab zatrymać 36-hadovaha Dźmitryja i 32-hadovaha Uładzimira Karakinych, da ich u dom ułamiŭsia SACHR u poŭnaj ekipiroŭcy.

Braty zasnavali hurt u 2005 hodzie, jašče ŭ škole. Heta adzin z samych viadomych estradnych hurtoŭ Biełarusi. Pieršuju mižnarodnuju ŭznaharodu jany vyjhrali ŭ 2006 hodzie — na Festival Internazionale di Maiori ŭ Italii.

Z hetaha času ich karjera išła ŭ haru: u 2010-m jany pradstavili Biełaruś na fiestyvali «Novaja chvala» ŭ Jurmale, a ŭ 2012-m — na «Jeŭrabačańni». Praŭda, tam jany nie patrapili ŭ finał, ale atrymali ŭznaharodu Eurostar Award, konkurs pa vynikach «Jeŭrabačańnia», dzie pieramožcaŭ vyznačajuć anłajn-hałasavańniem. 

Uładzimir taksama aŭtar piesień. Jon pisaŭ ich nie tolki dla hurta, ale i dla inšych zorak estrady: Ryty Dakoty, Hanny Šarkunovaj, Viery Karetnikavaj i inšych.

Jašče niadaŭna jany byli ŭ favory. Mienavita Litesound stvaryŭ himn dla Čempijanatu śvietu pa chakiei ŭ 2014-m hodzie i himny niekalkich spartyŭnych kamand. Muzyki ŭdzielničali ŭ konkursie piesień cyrymonij adkryćcia i zakryćcia druhich Jeŭrapiejskich hulniaŭ 2019 hoda, a taksama štohod vystupali na «Słavianskim bazary».

Z paviedamleńnia ŭ kanale siłavikoŭ vynikała, što bratoŭ zatrymali za ŭdzieł u demanstracyi 16 žniŭnia 2020 hoda, najbolšaha šeścia za ŭsiu historyju niezaležnaj Biełarusi. Taksama siłaviki śćviardžajuć, što «ŭ domie znajšoŭsia arsienał niezarehistravanaj zbroi, jaki naležaŭ ich baćku». Pa jakaści fota ciažka skazać, što heta za zbroja, ale bolšaść jaje adnaznačna nie bajavaja.

Padtrymać muzykaŭ možna listami, banderolami i hrašovymi pieravodami: Karakin Dźmitryj Jurjevič abo Karakin Uładzimir Jurjevič (jany siadziać u roznych kamierach). SIZA-1. 220030, Minsk, Vaładarskaha, 2. Nahadajem, što hrašovyja pieravody ŭ SIZA-1 možna rabić tolki z poštaŭ, praź internet-bankinh niamožna. 

Try nadziejnyja sposaby padtrymać inšych viaźniaŭ «Vaładarki»

• 2
• 0
• 1
• 7
• 1
• 7
• 34
• 0