«A dzie ŭsie?» Biełdziaržcyrk šukaje adrazu 15 rabotnikaŭ. U kamientarach — šapito
Biełaruski dziaržaŭny cyrk abviaściŭ vialiki nabor supracoŭnikaŭ — patrebnyja jak artysty amal usich asnoŭnych cyrkavych žanraŭ, tak i techničny piersanał. Abviestka vyklikała sotni žartaŭ pra toje, kudy padzieŭsia raniejšy kalektyŭ i chto moh by zamianić usich adrazu.
Abviestku Biełdziaržcyrk raźmiaściŭ u Threads 12 kastryčnika. Za sutki jana nabrała bolš za paŭtysiačy kamientaroŭ.
Cyrk šukaje artysta-akrabata, dyvanovaha artysta, dresiroŭščyka žyvioł, najeźnika, muzyčnaha ekscentryka, ekvilibrysta, pavietranaha himnasta i režysiora-pastanoŭščyka.
Heta nie ŭsio. Taksama patrebnyja administratar mastacka-artystyčnaha piersanału, viadučy ekanamist, rabočy pa kompleksnym ramoncie i absłuhoŭvańni budynkaŭ, prybiralščyk, achoŭnik, bufietčyk i butafor. Usiaho — 15 śpiecyjalistaŭ.
Niezvyčajny nabor vyklikaŭ u biełarusaŭ hałoŭnaje pytańnie: a dzie ŭsie papiarednija supracoŭniki?
«U vas tam što, uvieś kalektyŭ zvolniŭsia?»
«Prabačcie, a što stałasia z papiarednimi artystami i asabliva z pavietranymi himnastami?»
«Tyhraŭ nie było čym karmić?»
«Možna było prosta napisać: «U Biełaruski dziaržaŭny cyrk patrabujucca ŭsie». Nie dopis, a niejki cyrk, ščyra kažučy».
«Voś heta demarš, takoha strajku nichto nie ładziŭ z 1917 hoda».
«My tolki nabyli bilety na 1 listapada. Kali vy šukajecie ceły štat, to na kaho my budziem hladzieć?»
Niekatoryja zaŭvažyli, što ŭ doŭhim śpisie niama vakansii kłoŭna.
«Kłoŭn nie patrebny? Moj były šukaje pracu».
«Cikava, što šukajuć usich, akramia kłoŭnaŭ. Navodzić na dumku, što cyrk źjechaŭ».
«Adčuvaju, što ŭ vas kiraŭnictva — jašče tyja kłoŭny».
Znajšlisia ŭ kamientataraŭ i ŭniviersalnyja kandydaty na pasady.
«Usiebiełaruski narodny schod u poŭnym składzie».
«Śpis vakansij dla luboj škoły».
«Biarycie lubuju vychavacielku ź dziciačaha sadka. Adnoj chopić na ŭsie pasady».
«Łukašenka ŭ vas užo jość — artyst i haspadarnik. Prafiesijanał va ŭsich śfierach, z žyviołami ładzić, majstar i dyvanovych, i paddyvanovych spraŭ. Pryhledźciesia. Jon prosta reziume adpraŭlać nie ŭmieje».
«Viedaju takoha čałavieka: jon i chakieist, i futbalist, i historyk, umieje źbirać kavuny i raźbirajecca ŭ virusach. Kłoŭnam siabie nie ličyć. U vojsku słužyŭ, u cyrku nie śmiajecca. Vaš čałaviek. Moža siadzieć na niekalkich kresłach i ŭmieje siadać na vialiki špahat».
Ciapier čytajuć
Hety małady biełarus stajaŭ la vytokaŭ ChatGPT. Voś što jon zrabiŭ2
Kamientary