Biusthaltar zamiest topa — novy trend siezona zachoplivaje podyumy

Na pakazie znakamitaha modnaha domu Miu Miu italjanskaja madeljerka Miŭča Prada, jakuju ŭ śviecie mody ličać hałoŭnaj zakanadaŭcaj trendaŭ, vypuściła madelaŭ na podyum u spartyŭnych topach-bra, karotkich ełastyčnych šortach, spartyŭnych štanach i tałstoŭkach na małancy.

Spałučeńnie sportu i vysokaj mody samo pa sabie ŭžo daŭno nie navina. Jak zaŭvažaje ahladalnica mody The New York Times Vanesa Frydman, kudy bolš pakazalnaj detallu stali staniki i padobnyja da ich topy, jakija ciapier nosiać jak samastojny vierch.

Ich spałučajuć sa strohimi pinžakami, skuranymi kurtkami i kłasičnymi płaščami, a taksama sa spadnicami ź vielmi nizkaj pasadkaj abo svabodnymi spartyŭnymi štanami. U vyniku adkryty žyvot i bializna napakaz stali adnymi z najbolš charakternych elemientaŭ novych kalekcyj.

I heta ŭžo nie ekśpierymient adnaho-dvuch dyzajnieraŭ. I Miu Miu tut daloka nie adziny. Trend pačaŭ vyrazna prajaŭlacca jašče na pakazach u Miłanie, dzie padobnyja rečy źjavilisia ŭ Prada i Fendi. U Paryžy varyjantaŭ stała jašče bolš.

Pavialičyć

U Valentino pakazali šaŭkovyja topy-bra ź pierakryžavanymi detalami, u Hermès — staniki biez šlejek, zroblenyja sa skury i šaŭkovych chustak. U Loewe biusthaltary z kvietkavymi matyvami stali častkaj śviatočnych sukienak. A na pakazie Jean Paul Gaultier źjavilisia najbolš ekstravahantnyja madeli — svojeasablivaja novaja viersija znakamitaha kaničnaha stanika hetaha doma.

Pavialičyć

Čamu ŭsie raptam pakazvajuć biusthaltary

U hetaha trendu jość całkam łahičnyja pryčyny, bo vysokaja moda zaŭsiody reahuje na toje, čym žyvie hramadstva. Z adnaho boku, za apošnija hady ludzi nastolki zvykli da spartyŭnaha i maksimalna zručnaha adzieńnia, što dyzajnieram nie zastałosia ničoha inšaha, jak uzakonić hety kamfort i zrabić jaho častkaj vysokaha stylu.

Pavialičyć

Z druhoha boku, zaraz na piku papularnaści znachodzicca nastalhija pa 2000‑ch hadach ź ich kultam adkrytaha cieła, nizkaj talijaj džynsaŭ i estetykaj tahačasnych muzyčnych klipaŭ. Da taho ž u suśvietnaj kultury tryvała zamacavałasia moda na adkrytaść, kali demanstracyja fihury ŭsprymajecca jak naturalnaja forma samavyjaŭleńnia i śmiełaści.

Frydman nazyvaje i jašče adzin faktar — papularnaść preparataŭ GLP-1 dla źnižeńnia vahi. Na jaje dumku, žadańnie prademanstravać cieła paśla prykmietnaha pachudzieńnia taksama padšturchoŭvaje modu da ŭsio bolš adkrytych vobrazaŭ.

Zrešty, na podyumie i ŭ paŭsiadzionnym žyćci adzin i toj ža trend amal zaŭsiody vyhladaje pa-roznamu. Naŭrad ci bolšaść budzie litaralna paŭtarać vobrazy z pakazaŭ i vychodzić na vulicu ŭ adnym biusthaltary. Značna bolš imavierna, što ideja piarojdzie ŭ masavuju modu ŭ bolš strymanym vyhladzie. Ale sama miaža ŭžo zrušyłasia: reč, jakuju jašče niadaŭna treba było chavać pad adzieńniem, dyzajniery prapanujuć ličyć adzieńniem.

• 4
• 0
• 6
• 6
• 1
• 0
• 0
• 1