Były palitviazień znajšoŭ u Vilni padpracoŭku ŭ čacie — i trapiŭ pad kryminałku za pravakacyi suprać Ukrainy
Mikitu Saidava paprasili prynieści pachavalny vianok pad vilenski ofis abaronnaj kampanii. I zaadno partret jaje kiraŭnika z čornaj stužkaj.
27 žniŭnia kala vilenskaha ofisa abaronnaj kampanii RSI Europe pakinuli žałobnyja vianki i partret jaje kiraŭnika Tomasa Miłašaŭskasa z čornaj stužkaj. Usio zdymali na videa, jakoje nieŭzabavie pačało razychodzicca pa sacyjalnych sietkach i telehram-kanałach. Amal adnačasova padobnyja vianki źjavilisia kala ofisa zbrojevaj kampanii CSG u Čechii.
U Litvie zatrymali hramadzianina Ukrainy, jaki pryvioz vianki. Pavodle krynic litoŭskich miedyja, naniać jaho moh biełarus.
«Naša Niva» daviedałasia, što biełarus, jaki fihuruje ŭ hetaj historyi, — 23‑hadovy były palitviazień Mikita Saidaŭ. Chłopca adpuścili da suda, ciapier jon žyvie ŭ «Zamku».
Abiacali 400 jeŭra i pisali pra pamierłaha siabra
Mikita Saidaŭ znajšoŭ abjavu ŭ adnym z čataŭ z padpracoŭkami, raskazvaje kiraŭnica dabračynnaj arhanizacyi «Dapamoha» Natalla Kalehava.
Zakazčyk tłumačyŭ, što ŭ jaho pamior siabar, sam jon znachodzicca nie ŭ Litvie, tamu patrebny čałaviek, jaki kupić pachavalnyja vianki i adviazie ich pa nazvanym adrasie.
Za pracu nibyta prapanoŭvali 400 jeŭra. Častka hrošaj pavinna była pajści na sami vianki, astatniaje zastavałasia vykanaŭcu.
Saidaŭ, pavodle Kalehavaj, nie vaziŭ vianki da RSI Europe sam. Jon pieradaŭ padpracoŭku znajomamu, jaki i vykanaŭ zakaz. Natalla kaža, što partret kiraŭnika kampanii z čornaj stužkaj dastaviła paźniej inšaja asoba — z hetaj žančynaj Natalla nie znajomaja i dakładnych źviestak pra jaje rolu nie maje.
RSI Europe, da budynka jakoj pryvieźli vianki, vyrablaje bieśpiłotnyja sistemy, pastaŭlaje Ukrainie FPV-drony i sistemy dystancyjnaha padryvu. Pavodle Natalli Kalehavaj, Saidaŭ nie viedaŭ, čym zajmajecca kampanija.
Paśla zatrymańnia znajomaha źjechaŭ u Łatviju
Kali čałavieka, jaki advioz vianki, zatrymali, Mikita Saidaŭ spałochaŭsia i ŭciok u Łatviju.
Siabry Mikity paviedamili pra zdareńnie Kalehavaj. Jany nie mahli ź im źviazacca i viedali, što palicyja pryjšła da adnaho z chłopcaŭ ź ich kampanii. Natalla Kalehava znajšła Saidava i pierakanała jaho viarnucca.
«Ja skazała: «Ty pavinien pryjechać. Kali ty ličyš siabie nievinavatym, biehčy nielha». Jon viarnuŭsia z Łatvii i sam pryjšoŭ u palicyju», — raskazvaje jana.
Niejki čas Mikita Saidaŭ znachodziŭsia pad vartaj, Natalla Kalehava znajšła jamu advakata.
Chłopca padazrajuć u dapamozie inšaj dziaržavie ŭ dziejnaści suprać Litvy. Heta artykuł 118 Kryminalnaha kodeksa Litvy. Jaho pieršaja častka praduhledžvaje ad dvuch da siami hadoŭ pazbaŭleńnia voli.
Ciapier Mikitu vyzvalili da suda.
U 19 hadoŭ trapiŭ u žodzinskuju turmu
Dla Mikity Saidava heta ŭžo treciaja kryminalnaja sprava ŭ žyćci. Biełaruskija siłaviki zatrymali jaho 8 žniŭnia 2022‑ha — spačatku pavodle administracyjnaj spravy, zatym dajšło da palityčnaj kryminałki. Da suda chłopca trymali ŭ turmie №8 u Žodzinie.
Saidava sudzili za ŭdzieł u paślavybarčych pratestach pavodle častki 1 artykuła 342 Kryminalnaha kodeksa. Na momant «złačynstva» chłopiec byŭ niepaŭnaletnim.
Adnačasova jamu vystavili abvinavačvańnie i ŭ niezakonnym abarocie narkotykaŭ biez mety zbytu — častka 1 artykuła 328 Kryminalnaha kodeksa.
U śniežni 2022 hoda Saidavu pryznačyli dva z pałovaj hoda chatniaj chimii. Jon vyrašyŭ źjechać, i ŭžo ŭ studzieni 2023 hoda znachodziŭsia ŭ Litvie.
«Vyjšaŭ ź biełaruskaj turmy — i musiŭ adrazu stać darosłym»
Z Saidavym Natalla Kalehava paznajomiłasia paśla jaho ŭciokaŭ ź Biełarusi. Jašče da pierasiačeńnia miažy siabry chłopca źviazalisia z «Dapamohaj», kab paćvierdzić jaho asobu i paprasić miesca ŭ «Zamku»: jany bajalisia, što inakš jon trapić u łahier dla ŭciekačoŭ.
«My pravieryli jaho praz ahulnych znajomych. Kali litoŭskija słužby spytali, ci zabiarom jaho, ja adkazała: «Tak». Pieršy čas jon žyŭ u nas, paśla źjechaŭ. My dapamahali jamu z dakumientami», — raskazvaje Natalla.
U Litvie Saidaŭ atrymaŭ palityčny prytułak. Jon braŭsia za roznuju pracu, jeździŭ na zarobki ŭ Ispaniju. Natalla apisvaje jaho jak cichaha i spakojnaha chłopca, jaki drenna raźbiraŭsia ŭ praviłach žyćcia ŭ novaj krainie.
«Mikita — zvyčajny spakojny chłopiec. U jaho narmalnaje koła znosin — biełarusy, ukraincy, litoŭcy. Kali jon ciapier znachodziŭsia pad vartaj, siabry jaho nie kinuli: źbirali hrošy, pieradavali ježu i cyharety.
Kali jon trapiŭ u turmu ŭ Biełarusi, jamu było 19 hadoŭ. U takim uzroście ludzi jašče tolki vučacca sami prymać rašeńni. A jon vyjšaŭ biez adukacyi, biez prafiesii, biez žyćciovaha dośviedu — i amal adrazu apynuŭsia ŭ emihracyi, dzie treba samomu šukać pracu, płacić za žyćcio, raźbiracca sa strachoŭkaj i dakumientami», — razvažaje Natalla Kalehava.
Pavodle jaje, u padobnym stanoviščy apynulisia mnohija maładyja biełarusy, jakim daviałosia terminova ŭciakać z krainy. U novaj krainie jany časta mohuć pretendavać tolki na ciažkuju i nizkaapłatnuju pracu, a pobač z abjavami pra budoŭlu, skład ci dastaŭku im traplajucca prapanovy chutka zarabić niekalki socień jeŭra.
Ciapier «Dapamoha» adkryła zbor na advakata dla Mikity.
Rasśledavańnie historyi ź viankami praciahvajecca. Pravaachoŭniki vyśviatlajuć, chto arhanizavaŭ akcyju i jak źviazanyja incydenty ŭ Litvie i Čechii.
Ciapier čytajuć
Były palitviazień znajšoŭ u Vilni padpracoŭku ŭ čacie — i trapiŭ pad kryminałku za pravakacyi suprać Ukrainy16
Kamientary