Taksistka z Tadžykistana naśmierć źbiła biełarusku ŭ Polščy — i spakojna pakinuła krainu
U Varšavie taksistka z Tadžykistana źbiła na piešachodnym pierachodzie 46‑hadovuju biełarusku-stamatołaha Natallu Boruchavu. Žančyna pamierła praz 16 dzion. A taksistka paśpieła spakojna źjechać z Polščy i ciapier nichto nie viedaje, dzie jana, piša vydańnie Wiadomosci.
1 červienia Natalla viartałasia z pracy, kali jaje na siaredzinie piešachodnaha pierachodu źbiła taksistka na «Tajocie». Kiroŭca pierajechała žančynu dvojčy. Śviedka raskazaŭ, što paśla pieršaha ŭdaru Natalla sprabavała padniacca, ale aŭto ŭrezałasia ŭ jaje druhi raz i prycisnuła da BMW, što było pobač. Taksi spynili tolki śviedki.
Za rulom była hramadzianka Tadžykistana Šachnaz M. Viza ŭ jaje była na pracu ŭ budaŭničaj firmie ŭ Ščecinie. Što jana rabiła ŭ Varšavie za rulom taksi, nieviadoma.
Siamja biełaruskich stamatołahaŭ
Natalla i jejny muž Pavieł — biełaruskija stamatołahi, jakija pierajechali ŭ Polšču ŭ lutym 2022 hoda. Pavieł lačyŭ pacyjentaŭ, a Natalla viała dakumienty i spravy kabinieta. Para hadavała dźviuch dačok. A ŭ mai, za niekalki tydniaŭ da trahiedyi, adkryli svaju kliniku.
U dzień avaryi Natalla sprabavała patelefanavać mužu, ale jon byŭ z pacyjentam i adchiliŭ zvanok. Pra avaryju jamu paviedamiła starejšaja dačka. Kali Pavieł prybieh, žonka jašče lažała častkova pad mašynaj, była blednaja i kazała, što nie adčuvaje noh.
Piać apieracyj
Natallu pavieźli ŭ kliničny špital MUS. Traŭmy byli vielmi ciažkija: raźbity taz i paškodžany tazaściehnavy sustaŭ, pierałomy adrostkaŭ pazvankoŭ, traŭma brušnoj połaści i razdušanyja ŭnutranyja orhany.
Žančyna pieraniesła piać apieracyj, niekroz kišečnika i straŭnika, miedykamientoznuju komu. Pavieł kožny dzień byŭ pobač i pierakonvaŭ žonku, što jana vytrymaje. Natalla pamierła 16 červienia.
Taksistka źjechała z Polščy na nastupny dzień paśla śmierci biełaruski
Pieršyja dva tydni sprava navat nie rasśledavałasia naležnym čynam. Vadzicielku nie dapytali, jaje telefon nie zabrali, jaje asobu nie pravieryli. Palicyja tolki ahledzieła miesca zdareńnia i pravieryła ŭdzielnikaŭ na ałkahol. Padazravanaja svabodna raźjazdžała pa Varšavie.
Sprava zrušyłasia tolki paśla śmierci Natalli. Ale ŭžo na nastupny dzień Šachnaz M. vyjechała z Polščy.
Pra heta nie viedali da vieraśnia, bo nichto nie pravieryŭ, ci jana jašče ŭ krainie.
Adnačasova advakaty siamji miesiacami nie mahli atrymać dostup da materyjałaŭ spravy.
2 vieraśnia prakuratura nakiravała ŭ sud materyjały, kab uziać padazravanuju pad vartu, i płanuje abviaścić jaje ŭ vyšuk. Ale navat kali Šachnaz M. znojduć u Tadžykistanie, damovy ab ekstradycyi pamiž Polščaj i Tadžykistanam niama, i Tadžykistan nie ŭdzielničaje ŭ Jeŭrapiejskaj kanviencyi ab ekstradycyi. Vydača zaležała b tolki ad dobraj voli tamtejšaha suda. Siamja sama naniała advakata ŭ Tadžykistanie, kab vyśvietlić, ci viarnułasia tudy vadzicielka.
Pavieł zastaŭsia ź dźviuma dočkami. Małodšaj 11 hadoŭ. Starejšaja ŭziała akademičny adpačynak i viarnułasia ŭ Varšavu dapamahać baćku vieści kliniku. Pavieł kaža, što ŭsio žyćcio žonka była jaho adzinaj luboŭju i najlepšym siabram, i što ciapier u jaho zastalisia tolki dzieci.
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam23
Kamientary
Nu a palicyja ŭ Eŭropie kaniešnie supierskaja. Tam vidać hałoŭnaja zadača kab nie było lišnich papier, kab, kryj boža, nie zavieści spravu, a potym jaje raskručvać.