Sajuźniki ŭhavorvajuć Niamieččynu dazvolić pastaŭki tankaŭ Leopard va Ukrainu
Vydańnie Politico paviedamlaje, što Francyja i Polšča sprabujuć pierakanać Niamieččynu razbłakavać pastaŭki tankaŭ Leopard, i Bierlinu stanovicca ŭsio bolš składana supraciŭlacca, asabliva z ulikam taho, što Brytanija, pa paviedamleńniach presy, razhladaje mahčymaść adpraŭki va Ukrainu svaich tankaŭ Challenger 2.
«Kali Vialikabrytanija zrobić heta, to Bierlinu budzie značna składaniej prykryvacca ciapierašnim arhumientam, što jon nie choča dziejničać u adzinočku, adpraŭlajučy ciažkaje ŭzbrajeńnie», — piša vydańnie.
«Ukraincy vielmi chočuć atrymać Leopard, tamu što ich šmat na składach pa ŭsioj Jeŭropie», — skazaŭ Politico francuzski čynoŭnik, daśviedčany ab chodzie pieramoŭ.
Tak jak tanki vyrablajucca miunchienskaj kampanijaj Krauss-Maffei Wegmann, ich pastaŭka va Ukrainu patrabuje dazvołu na reekspart ad krainy-vytvorcy, to-bok Niamieččyny.
Kancler Niamieččyny Ołaf Šolc zajaviŭ, što pa-raniejšamu pierakanany ŭ nieabchodnaści kaardynavać pastaŭki zbroi Ukrainie z sajuźnikami.
Na minułym tydni Niamieččyna abviaściła, što pieradaść Ukrainie bajavyja mašyny piachoty Marder. Hetaja zajava była zroblenaja ŭ toj ža dzień, kali ZŠA paabiacali dać Ukrainie bajavyja mašyny Bradley, i praź dzień paśla anałahičnaj zajavy Francyi, jakaja maje namier pastavić Kijevu kołavyja tanki.
Kijeŭ daŭno prosić i bolš ciažkija mašyny, takija, jak niamieckija tanki Leopard 2, — ich pastaŭka stała b značnym krokam u padtrymcy Ukrainy z boku Zachadu.
«Niamieččyna nie pojdzie na heta adna,— skazaŭ Šolc. — Niamieččyna zaŭsiody budzie zastavacca adzinaj sa svaimi siabrami i sajuźnikami… Inšaje było b biezadkazna ŭ takoj niebiaśpiečnaj situacyi».
Raniej pra pastaŭku Leopard zajaviła Finlandyja.
Tusk zajaviŭ pra hatoŭnaść adkryć Babroŭniki i Kuźnicu ź listapada55
Kamientary